ދަރަނި ދެއްކުމާއި ރައީސް މުޢިއްޒަށް ދެވަނަ ދައުރެއްގެ ޓިކެޓް އެރުވުމަކީ ލިބުނު ވަރަށް ބޮޑު ދެ އުފާ: އިޤްތިޞާދީ ވަޒީރު

މިއަދަކީ ދިވެހިރާއްޖެއަށާއި ދިވެހި ރައްޔިތުންނަށް ވަރަށް ބޮޑު ދެ އުފަލެއް ލިބިގެންދިޔަ ތާރީޚީ ދުވަހެއް ކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް، މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރ މިހެން ވިދާޅުވީ މީސްމީޑިއާގެ މަންސަ އެކްސްގައި ކުރެއްވި ޕޯސްޓެއްގައެވެ.

މިނިސްޓަރ ފާހަގަކުރެއްވި ގޮތުގައި ފުރަތަމަ އުފަލަކީ، ނިމިދިޔަ އެމްޑީޕީގެ ވެރިކަމުގައި މާލީ ނިޒާމު ބޮއްސުންލައިގެން ދިޔުމަށް ދޫކޮށްލައި، މަތިމައްޗަށް ދަރަނި ނަގަމުން، ދައުލަތުގެ ބަޖެޓުން އިސްރާފު ޚަރަދުތައް ކުރުމުގެ ތެރޭގައި ނަގާފައިވާ 150 މިލިއަން އެމެރިކާ ޑޮލަރުގެ ލޯނެއް މި ސަރުކާރުން އަނެއްކާވެސް ދައްކައި ޚަލާޞްކޮށްދެއްވުމެވެ. އަދި މިއީ ރައްޔިތުންގެ ބޮލުގައި އަޅުވާފައި އޮތް ބޮޑު ދަރަންޏަކުން ސަލާމަތްކޮށްދެއްވި ކަމުގެ އުފާ ކަމުގައި ވަޒީރު ބަޔާންކުރެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ދިވެހި ރައްޔިތުން ކުރި އިތުބާރަކީ، ޤައުމު ދަރައި ވިކުނަ ނުދެއްވައި، ކާޑާއި، ގޭހާއި އަދި ތެލަށްވެސް ޖެހުނަ ނުދެއްވައި ޤައުމު ސަލާމަތުގެ އައްސޭރިއަކަށް ގެންގޮސްދެއްވާނެ ކަމުގެ އިތުބާރު ކަމަށް މިނިސްޓަރު ވިދާޅުވިއެވެ. އަދި އިރާދަކުރެއްވިއްޔާ ރައީސް ގެންދަވަނީ ރެޔާއި ދުވާލު އެ މަސައްކަތްޕުޅު ކުރައްވައި، ޢަމަލީ ނަތީޖާ ދައްކަވަމުން ކަމަށްވެސް އެކްސް ޕޯސްޓުގައި ވެއެވެ.

ދެވަނަ އުފަލެއްގެ ގޮތުގައި ވަޒީރު ފާހަގަކުރެއްވީ، ރާއްޖޭގެ އެންމެ ބޮޑު ސިޔާސީ ޕާޓީ ކަމަށްވާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން އެ އިތުބާރު ދަމަހައްޓައި، މިހާރު ކުރިއަށްދާ ކޮންގްރެސްގެ މަތީ މަޖިލީހުގެ އިއްތިފާޤުން ރައީސް ޑރ. މުޙައްމަދު މުޢިއްޒަށް ރިޔާސީ ދެވަނަ ދައުރެއްގެ ޓިކެޓް އެރުވުމަށް ނިންމި ތާރީޚީ އަދި ޤައުމީ ނިންމުމެވެ.

މި ނިންމުމުގެ ސަބަބުތައް ވަރަށް ސާފުކަން ހާމަކުރައްވަމުން މިނިސްޓަރު ވިދާޅުވީ، ޕީއެންސީގެ ރައީސް، ޤައުމުގެ ރިޔާސަތުގައި ހުންނަވައިގެން ކުރިމަތިވި އެތައް އުނދަގޫ ޙާލަތްތަކެއް ގިރާކުރައްވަމުން ގެންދަވާ ކަމަށެވެ. އަދި "ދިވެހީންގެ ރާއްޖެ" އަމާން ބަނދަރަކަށް ގެންދިއުމުގެ ޒިންމާ ނަންގަވަމުން އެ ގެންދަވަނީ ނުހަނު އަމާނާތްތެރިކަމާއެކު ދިވެހި ޤައުމާއި ރައްޔިތުންގެ މަޞްލަޙަތު އިސްކުރައްވައިގެން ކަމަށްވާތީ ކަމުގައި އިޤްތިޞާދީ ވަޒީރުގެ ޕޯސްޓުގައި ފާހަގަކުރައްވާފައިވެއެވެ.