މިހާރުގެ ސިޔާސަތަކީ ބިރާއި އަނިޔާއިން މިނިވަން ސިޔާސަތެއް: ރައީސް މުޢިއްޒު

ދިވެހިރާއްޖޭގައި ކުރިން އޮތް ސިޔާސީ ބަދަލުހިފުމާއި ސިޔާސީ ލީޑަރުން ޖަލަށްލުމުގެ ސަގާފަތް ނައްތާލައި، ރާއްޖޭގައި ސިޔާސީ ހަމަޖެހުން ނުވަތަ "ޕޮލިޓިކަލް ސްޓޭބިލިޓީ" ޤާއިމުކޮށްދެއްވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމްގެ "ނޭޝަނަލް ޗެޓް" ޕްރޮގްރާމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، އެމަނިކުފާނުގެ ވައުދުފުޅާ އެއްގޮތަށް ސިޔާސީ ގޮތުން މީހުން ހައްޔަރުކޮށް ބިރުދެއްކުން މިހާރު ނިމުމަކަށް އައިސްފައިވާ ކަމަށެވެ. އަދި މިހާރު ރާއްޖޭގައި ސިޔާސީ ހަރަކާތްތައް ހިންގުމަށް އެއްވެސް ބިރެއް ނެތްކަން އެމަނިކުފާނު ފާހަގަކުރެއްވިއެވެ.

"ސިޔާސީ ޕާޓީތައް މިހާރު މި ހިނގަނީ މުޅިން މިނިވަންކޮށް. އެހެންވެ މި ޤައުމުގައި ސިޔާސީ ސްޓޭބިލިޓީ ގެނެސްފިން. ސިޔާސީ މަޤާމެއްގައި ހުރެގެން ނުވަތަ ސިޔާސީ ހަރަކާތް ކުރަން މިހާރު ބިރުގަންނަން ޖެހޭކަށް ނެތް،" ރައީސް ވިދާޅުވިއެވެ.

ކުރީގެ ސަރުކާރުތަކުން ކުރީގެ ރައީސުން ޖަލަށްލުމަކީ "ހޮބީ" އެއްގެ ގޮތުގައި ކުރަމުންދިޔަ ކަމެއްކަން ފާހަގަކުރައްވައި، ރައީސް ވިދާޅުވީ އެއީ އެމަނިކުފާނު ގަބޫލުކުރައްވާ އުސޫލެއް ނޫން ކަމަށެވެ. އަދި މިއީ އެމަނިކުފާނު ހާސިލުކުރެއްވި ބޮޑު ކާމިޔާބީއެއް ކަމަށާއި، ކުރިއަށް އޮތް ތަނުގައި ވެސް މި ހަމަޖެހުން ދަމަހައްޓަވާނެ ކަމުގެ ޔަގީންކަން ރައީސް ދެއްވިއެވެ.

އިސްލާމީ އުސޫލުތަކާއި ޤާނޫނު އަސާސީގެ ހުދޫދުތައް ހުރިހާ ރައްޔިތުންގެ މައްޗަށް އެއްގޮތަކަށް ތަންފީޒުވާނެކަން ފާހަގަކުރައްވަމުން ރައީސް ވިދާޅުވީ، ޤާނޫނު ތަންފީޒުކުރުމަކީ ރައީސުލްޖުމްހޫރިއްޔާގެ ހައިސިއްޔަތުން އެމަނިކުފާނުގެ ޒިންމާއެއް ކަމަށެވެ.

ރައީސް މިފަދައިން ވިދާޅުވެފައިވަނީ، އިދިކޮޅު ފަރާތްތަކުން ޑިމޮކްރަސީގެ އުސޫލުތަކާ ޚިލާފަށް ސަރުކާރު ބަދަލުކުރުމުގެ ވާހަކަތައް ދައްކަމުންދާ ދަނޑިވަޅެއްގައެވެ. ރައީސް ވިދާޅުވި ގޮތުގައި، އިދިކޮޅު ފަރާތްތަކުން މަސައްކަތް ކުރަމުންދަނީ ޤައުމުގެ ސިޔާސީ ހަމަޖެހުން ބަލިކަށިކޮށްލުމަށެވެ.

މި މޭރުމުން ވާހަކަފުޅު ދައްކަވަމުން، ވަކި ބޭފުޅެއްގެ ނަން ނުގަތް ނަމަވެސް، ކުރީގެ ރައީސް މުޙައްމަދު ނަޝީދު ދާދިފަހުން ވަނީ ސަރުކާރު ބަދަލުކުރުމަށް މަޖިލީހުގެ މެޖޯރިޓީ ހޯދުމަށް މަސައްކަތް ކުރައްވާނެ ކަމަށް ވިދާޅުވެފައެވެ. ނަޝީދު ވިދާޅުވެފައިވަނީ ކުރީގެ ރައީސް ޔާމީން ވެސް މި މަސައްކަތުގައި ބައިވެރިވެވަޑައިގަންނަވާނެ ކަމަށާއި، ވެރިކަން ކުރާ ޕީއެންސީގެ ބައެއް މެންބަރުން ޕާޓީ ބަދަލުކުރާނެ ކަމަށެވެ.

ނަމަވެސް، 93 މެންބަރުން ހިމެނޭ ރައްޔިތުންގެ މަޖިލީހުގެ ސުޕަރ މެޖޯރިޓީ މިހާރު އޮތީ ސަރުކާރު ހިންގާ ޕީއެންސީއަށެވެ. އިތުބާރު ނެތްކަމުގެ ވޯޓެއް ފާސްކުރުމަށް 62 ވޯޓު ބޭނުންވާއިރު، ޕީއެންސީގައި މިވަގުތު 73 މެންބަރުން އެބަތިއްބެވިއެވެ.

މީގެ އިތުރުން، ކުރީގެ ރައީސް އިބްރާހީމް މުޙައްމަދު ޞާލިޙު ވެސް ވަނީ ދާދިފަހުން ބޭއްވި ކެމްޕޭން ޖަލްސާއެއްގައި، މިހާރު ސަރުކާރު ބަދަލުކުރުމުގެ ބޭނުމެއް އޮތް ކަމަށް ވިދާޅުވެ ވާހަކަދައްކަވާފައެވެ.