ރާއްޖޭގެ ރަސްމީ ރިޒާވް ޖޫން މަހު ދަށަށް ގޮސްފި، ބޭނުންކުރެވޭ ރިޒާވް މިދިޔަ އަހަރަށްވުރެ އިތުރު

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، މިދިޔަ ޖޫން މަސް ނިމުނުއިރު ރާއްޖޭގެ ރަސްމީ ރިޒާވް ހުރީ 686.8 މިލިއަން އެމެރިކާ ޑޮލަރުގައެވެ. މިއީ މޭ މަހާ އަޅާބަލާއިރު 18 މިލިއަން ޑޮލަރުގެ ދަށްވުމެކެވެ. އަދި 2025 ވަނަ އަހަރުގެ ޖޫން މަހާ އަޅާބަލާއިރު މިއީ 145.6 މިލިއަން ޑޮލަރު ނުވަތަ 17.5 އިންސައްތައިގެ ދަށްވުމެކެވެ.

ޖުމްލަ ރިޒާވް ދަށަށް ދިޔަ ނަމަވެސް، ރިޒާވްއިން ކުރު މުއްދަތުގެ ދަރަނިތައް އުނިކުރުމުން ބާކީވާ 'ޔޫޒަބަލް ރިޒާވް' ނުވަތަ ބޭނުންކުރެވޭ ރިޒާވް ވަނީ މިދިޔަ އަހަރުގެ ޖޫން މަހާ އަޅާބަލާއިރު 23 އިންސައްތަ އިތުރުވެފައެވެ. މިދިޔަ އަހަރުގެ ޖޫން މަހު ބޭނުންކުރެވޭ ރިޒާވްގައި 203 މިލިއަން ޑޮލަރު ހުރިއިރު، މިއަހަރުގެ ޖޫން މަސް ނިމުނުއިރު މި އަދަދު ހުރީ 248.9 މިލިއަން ޑޮލަރުގައެވެ. ނަމަވެސް މޭ މަހާ އަޅާބަލާއިރު ޔޫޒަބަލް ރިޒާވްއިން ވެސް ވަނީ 11.9 މިލިއަން ޑޮލަރު މަދުވެފައެވެ.

އެމްއެމްއޭއިން ހާމަކުރި ގޮތުގައި ޖޫން މަހު ރިޒާވް ދަށަށް ދިއުމުގެ މައިގަނޑު ސަބަބަކީ ބޭރު ފައިސާގެ ޚަރަދުތައް އިތުރުވުމެވެ. ޚާއްޞަކޮށް ބޭންކުތަކާއި މުދާ އެތެރެކުރާ ފަރާތްތަކުން ޑޮލަރަށް އޮތް ޑިމާންޑް ބޮޑުވުމާ ގުޅިގެން، އެމްއެމްއޭއިން ބާޒާރަށް ނެރުނު ޑޮލަރުގެ މިންވަރު މޭ މަހާ އަޅާބަލާއިރު 43 އިންސައްތަ އިތުރުވެފައިވާކަން އެ އޮތޯރިޓީން ފާހަގަކުރެއެވެ.

ރާއްޖޭގެ މާލީ ހާލަތާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދިފަހުން ވިދާޅުވެފައިވަނީ، މި ސަރުކާރުން ވެރިކަމާ ހަވާލުވިފަހުން ބޭރުގެ ދަރަނީގެ ގޮތުގައި 1.29 ބިލިއަން ޑޮލަރު ދައްކާފައިވާ ކަމަށެވެ. މީގެ ތެރޭގައި ކުރީގެ ސަރުކާރުން ވާރުތަވި 891 މިލިއަން ޑޮލަރާއި، އޭގެ ކުރީގެ ސަރުކާރުތަކުގެ 195 މިލިއަން ޑޮލަރުގެ އިތުރުން ރައީސް ނަޝީދާއި ރައީސް ވަޙީދުގެ ދައުރުގެ 62.5 މިލިއަން ޑޮލަރުގެ ދަރަނި ހިމެނެއެވެ.

އެމްއެމްއޭއިން ލަފާކުރާ ގޮތުގައި މިއަހަރު ނިމޭއިރު ރާއްޖޭގެ ރަސްމީ ރިޒާވް 904 މިލިއަން ޑޮލަރަށް އަރާނެއެވެ. ވޯލްޑް ބޭންކުގެ 'މޯލްޑިވްސް ޑިވެލޮޕްމަންޓް އަޕްޑޭޓް 2026' ރިޕޯޓުގައި ވެސް ވަނީ ރާއްޖޭގެ އާމްދަނީ އިތުރުވެ، ޚަރަދުތައް ކުޑަކުރުމަށް އަޅަމުންދާ ފިޔަވަޅުތަކުގެ ސަބަބުން ބަޖެޓް ޑެފިސިޓް ކުޑަވަމުންދާކަން ފާހަގަކޮށްފައެވެ.