ކާރިސާތަކާ ގުޅުންހުރި މަޢުލޫމާތު ފޯރުކޮށްދިނުމަށް ހުޝިޔާރުގެ ނަމުގައި ވެބްސައިޓެއް
ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އާއި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އާއި ގުޅިގެން ހުޝިޔާރު ނަމުގައި ކާރިސާތަކަށް ތައްޔާރުވުމާއި ރިސްކް ކޮމިއުނިކޭޝަނަށް ޚާއްޞަ ވެބްސައިޓެއް ތަޢާރަފު ކޮށްފިއެވެ.
އެންޑީއެމްއޭއިން ބުނީ މިއީ ކާރިސާތަކަށް ތައްޔާރުވުމާ ބެހޭ ގޮތުން މުޅި ރާއްޖޭގައި ހިންގާ ރިސްކް ކޮމިއުނިކޭޝަން ކެމްޕޭނެއް ކަމަށެވެ. އަދި މި ކެމްޕޭނުގެ އެންމެ މުހިންމު އެއް މަޤްސަދަކީ ކުއްލި ކާރިސާތަކާ ބެހޭ ގޮތުން މުޖުތަމައު ހޭލުންތެރިކުރުވުން ކަމަށް ވެސް ބުނެފައިވެއެވެ.
މޯލްޑިވިއަން ރެޑް ކްރެސެންޓާ ގުޅިގެން އެންޑީއެމްއޭ އިން އިސްނަގައިގެން ކުރިއަށް ގެންދާ މި ކެމްޕޭނަކީ މޫސުމަށް އަންނަ ނުރައްކާތަކާ މެދު ހޭލުންތެރިކަން އިތުރުކޮށްދީ، ތައްޔާރަށް ތިބުމަށް މުޖުތަމައުތައް ބާރުވެރިކުރުވާ ކެމްޕޭނެކެވެ.
އިންކްލޫސިވް، މަލްޓިލިންގުއަލް ފީޗާސްތަކާއެކު ތައްޔާރުކޮށްފައިވާ މި ޕްލެޓްފޯމްގައި އަވަސް އިންޒާރުދޭ އެލާޓްތަކާއި، ނުރައްކަލަށް ޚާއްޞަ ގައިޑްލައިންތަކާއި، އިންސްޓްރަކްޝަނަލް ވީޑިއޯތަކާއި، ހޭލުންތެރިކުރުމުގެ ތަކެތި އަދި ރެސްޕޮންސް ޓޫލްކިޓްތައް ފޯރުކޮށްދެއެވެ. މި ޕްލެޓްފޯމް ފަރުމާކުރެވިފައިވަނީ ޚާއްސަ އެހީއަށް ބޭނުންވާ ފަރާތްތަކަށް ވެސް ފަސޭހައިން ބޭނުންކުރެވޭ ގޮތަށެވެ.
ރަސްމީކޮށް ހުޝިޔާރު ވެބަސައިޓް ތަޢާރަފުކޮށްފައި ވަނީ މިއަދު ފާހަގަކުރާ ބައިނަލްއަޤްވާމީ ކާރިސީ ހިރާސް ކުޑަކުރުމުގެ ދުވަހާއި ގުޅިގެން އެންޑީއެމްއޭ އިން އިސްނަގައިގެން ބޭއްވި ވިލުންތެރި ފެސްޓު ގައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
