ބާ ކައުންސިލުން އެމްކިއުއޭ އާއި ބައްދަލުކޮށްފި

ބާ ކައުންސިލް އޮފް ދަ މޯލްޑިވިސްގެ މެންބަރުންނާއި ޤާނޫނީ ދާއިރާގައި މަތީ ތަޢުލީމު ފޯރުކޮއްދެއްވާ އިންސްޓިއުޓްތަކުގެ އިސްވެރިން މޯލްޑިވްސް ކޮލިފިކޭޝަން އޮތޯރިޓީ(އެމްކިއުއޭ) އާއި ބައްދަލު ކުރައްވައިފިއެވެ.

އެމްކިއުއޭ ގައި މި މަހުގެ 4 ވަނަ ދުވަހު ބޭއްވެވި މި ބައްދަލުވުމަކީ ގާނުނީ ދާއިރާގެ އިންސްޓްޓިއުޓްތަކުން ކުރިއަށް ގެންދާ ކޯސްތަކާއި އިމްތިހާނުތަކާއި ގުޅޭގޮތުން މަޝްވަރާކުރެއްވުމަށް ބޭއްވި ބައްދަލުވުމެކެވެ.

މި ބައްދަލުވުމުގެ މައިގަނޑު މަޤްސަދަކީ ބާ ކައުންސިލްގެ ލަފަޔާއި އިރުޝާދުގެ ދަށުން، ޤާނޫނާއި ގުޅޭ ތަޢުލީމު އުގަންނައިދޭ އިންސްޓްޓިއުޓްތަކުގައި އިމްތިހާނުތައް ކުރިއަށް ގެންދިޔުމުގައި ސަމާލުކަން ދޭންޖެހޭ އުޞޫލުތަކާއި ޤަވާޢިދުތަކާއި ގުޅޭގޮތުން މަޝްވަރާކުރުމެވެ. އެގޮތުން، އީ-ލާނިންގ މޮޑާލިޓީގެ ދަށުން އޮންލައިންކޮށް އިމްތިހާނު ބޭއްވުމުގެ އުޞޫލުތަކާއި ހުއްދައާއި ގުޅޭގޮތުން ވެސް މި ބައްދަލުވުމުގައި މަޝްވަރާކުރެއްވިއެވެ.

ބާ ކައުންސިލް އޮފް ދަ މޯލްޑިވިސްއަކީ ދިވެހި ދަޢުލަތުގައި އިންސާފު ޤާއިމުކުރުމަށް އަމާޒުކޮށް، ދިވެހިރާއްޖޭގެ ޤާނޫނީ ދާއިރާގެ ފެންވަރު ބެލެހެއްޓުމާއި ހިފެހެއްޓުމަށް މަސައްކަތްކުރަމުން އަންނަ އިދާރާއެކެވެ. އެގޮތުން، މި އިދާރާ އިން ވަނީ ހަމަތަކާއި އުޞޫލުތަކުގެ މަތިން ވަކީލުންނަށް ޤާނޫނީ ދާއިރާގައި ކުރިއަރައި ދިޔުމަށް އެތަށް ދޮރުތަކެއް ހުޅުވައިލާފައެވެ.

މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ދަށުން މަސައްކަތްކުރަމުން އަންނަ މޯލްޑިވިސް ކުއަލިފިކޭޝަން އޮތޯރިޓީ (އެމްކިއުއޭ) އިން އަންނަނީ ތަފާތު އެކި ދާއިރާތަކުން މަތީ ތަޢުލީމު ފޯރުކޮއްދޭ އިންސްޓިޓިއުޓްތަކާއި ކޮލެޖުތަކުގެ އިތުރުން ކަމާ ބެހޭ މުޢައްސަސާތަކާއި ބައްދަލުކުރައްވައި،އެކި ކޯސްތަކާއި އިމްތިހާނުތައް ކުރިއަށް ގެންދިޔުމުގެ އުޞޫލުތަކާއި ޤަވާޢިދުތަކާއި ގުޅޭގޮތުން އިރުޝާދު ދެއްވަމުންނެވެ.