ހިތަދޫ އުތުރު ދާއިރާގެ ބައި-އިލެކްޝަން: 11:00 އާ ހަމައަށް 19 އިންސައްތަ މީހުން ވޯޓުލައިފި

އައްޑޫ ސިޓީ ހިތަދޫ އުތުރު ދާއިރާގެ ރައްޔިތުންގެ މަޖިލީހުގެ ގޮނޑިއަށް މެންބަރަކު އިންތިޚާބު ކުރުމަށް މިއަދު ބާއްވާ ބައި-އިލެކްޝަންގެ ވޯޓުލުން ކުރިއަށްދާއިރު، ހެނދުނު 11:00 އާ ހަމައަށް ވޯޓުލީ މީހުންގެ ނިސްބަތް 19.29 އިންސައްތައަށް އަރައިފިއެވެ.

އިލެކްޝަންސް ކޮމިޝަނުން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މިއަދު ހެނދުނު 11:00 އާ ހަމައަށް ޖުމްލަ 795 މީހުން ވަނީ ވޯޓުލާފައެވެ. އޭގެ ތެރޭގައި ހިމެނެނީ 386 އަންހެނުންނާއި 409 ފިރިހެނުންނެވެ. މި އިންތިޚާބުގައި ވޯޓުލުމުގެ ހައްގު ލިބިފައިވާ 4،121 މީހުންގެ ތެރެއިން މިހާތަނަށް ވޯޓު ނުލާ ތިބީ 3،326 މީހުންނެވެ. އެއީ ވޯޓުލުމުގެ ހައްގު ލިބިފައިވާ އާބާދީގެ 80.71 އިންސައްތައެވެ.

މި އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ ޖުމްލަ އަދަދަކީ 4،121 އެވެ. އެއީ 2,073 އަންހެނުންނާއި 2,048 ފިރިހެނުންނެވެ. ވޯޓުލުން މިއަދު ހެނދުނު 8:00 އިން ފެށިގެން ކުރިއަށްދާއިރު، ހަވީރު 4:00 އާ ހަމައަށް ވޯޓުލުން ކުރިއަށްދާނެ ކަމަށް އިލެކްޝަންސް ކޮމިޝަނުން ބުނެއެވެ.

ވޯޓުލުމަށްޓަކައި އައްޑޫ ސިޓީ ހިތަދޫ ސްކޫލުގައި 5 ވޯޓު ފޮށި އަދި މާލޭގެ ދަރުމަވަންތަ ސްކޫލުގައި 2 ވޯޓު ފޮށި ވަނީ ބަހައްޓާފައެވެ.

މި ބައި-އިލެކްޝަންގައި ވާދަކުރައްވަނީ ސަރުކާރު ހިންގާ ޕީއެންސީގެ ކެންޑިޑޭޓް އަޙްމަދު ސަޢީދު (ސޮޑާ) އާއި އިދިކޮޅު އެމްޑީޕީގެ ކެންޑިޑޭޓް ޢަބްދުﷲ ޞާދިޤް (ސޯބެ) އެވެ. ހިތަދޫ އުތުރު ދާއިރާގެ ގޮނޑި ހުސްވީ، ކުރިން އެ ގޮނޑި ފުރުއްވި ޕީއެންސީގެ މެންބަރު މުޙައްމަދު ސިނާންގެ މައްޗަށް ސާބިތު ދަރަންޏެއް އޮތް ކަމަށް ސުޕްރީމް ކޯޓުން ކުރި ހުކުމަކާ ގުޅިގެން އޭނާގެ މެންބަރުކަމުގެ ޝަރުތު ގެއްލުމުންނެވެ.

މި އިންތިޚާބުގެ ވަގުތީ ނަތީޖާ ވޯޓުލައި ނިމޭތާ ކުޑަވަގުތުކޮޅެއްގެ ތެރޭގައި އިއުލާން ކުރަން ފަށާނެ ކަމަށް ބެލެވެއެވެ. މިހާރު މަޖިލީހުގައި ޕީއެންސީގެ 74 މެންބަރުން ތިއްބަވާއިރު، އެމްޑީޕީ ތަމްސީލުކުރައްވަނީ 12 މެންބަރުންނެވެ.