ބިދޭސީންގެ ފީ ޤަވާއިދުން ނުދައްކާ ކުންފުނިތަކަށް އިތުރު މުހުލަތެއްދީފި

ބިދޭސީންގެ ފީ ޤަވާއިދުން ނުދައްކާ ކުންފުނިތަކުން ފީދެއްކުމަށް ދިން ފުރުސަތު މިމަހުގެ ނިޔަލަށް އިތުރުކޮށްފިއެވެ.

ވަޒީފާ އަދާކުރާ ބިދޭސީންނާ ގުޅިގެން ދައްކަންޖެހޭ ފީތަކާއި ޖޫރިމަނާ އެއްލައްކައަށްވުރެ މައްޗަށް އަރާފައިވާ ފަރާތްތަކުން، ދައުލަތަކަށް ދައްކަންޖެހޭ ޖޫރިމަނާ ފައިސާ ދެއްކުމަށް މުހުލަތެއްދީ އެ ފަރާތްތަކުގެ ލިސްޓު ދާޚިލީ ސަލާމަތާ ބެހޭ ވުޒާރާއިން ނެރުނީ މިދިޔަ ޖުލައި މަހުގެ 24ވަނަ ދުވަހުއެވެ. އަދި ފުރަތަމަ މުހުލަތެއްގެ ގޮތުގައި ދިނީ މިމަހުގެ 12 ވަނަ ދުވަހުގެ ނިޔަލަށް ފައިސާ ދައްކައި ޚަލާސްކުރުމަށެވެ.

އެގޮތުން ފީތަކާއި ޖޫރިމަނާތަކުގެ ޢަދަދު ލައްކައަކަށްވުރެ މައްޗަށް އަރާފައިވާ 1000އަށް ވުރެ ގިނަ ފަރާތުގެ ނަމާއި، އެ ފަރާތުން ދައްކަންޖެހޭ ފައިސާގެ ތަފްޞީލު ހިމެނޭ ލިސްޓެއް މިނިސްޓްރީން ގެޒެޓުގައި ޝާޢިއުކުރިއެވެ. މީގެ ތެރޭގައި އެކި ސިނާޢަތްތަކުގައި ހަރަކާތްތެރިވާ ބައެއް ބޮޑެތި ކުންފުނިތަކާއި ވަކިވަކި ފަރުދުންވެސް ހިމެނެއެވެ.

ތަފާސްހިސާބުތަކުން ދައްކާގޮތުގައި މުއްދަތު ހަމަވިއިރު ޖުމްލަ 182،954،572 (ސަތޭކަ އައްޑިހަ ދެ މިލިއަން ނުވަ ލައްކަ ފަންސާސް ހަތަރުހާސް ފައްސަތޭކަ ހަތްދިހަ ދެ) ރުފިޔާ ރިކަވަރ ކޮށްފައިވެއެވެ. އަދި މިހާތަނަށް 453 މިލިއަނެއްހާ ރުފިޔާ ދައުލަތަށް ނުލިބިވާކަން މިނިސްޓްރީން ފާހަގަކުރެއެވެ.

ފީތައް ނުދައްކާ ފަރާތްތަކަށް އިތުރު ފުރުސަތެއް ދިނުމުގެ ގޮތުން ވުޒާރާއިން ވަނީ އިތުރު މުހުލަތެއް ދީފައެވެ. އެގޮތުން މިމަހުގެ 31 ވަނަ ދުވަހުގެ ނިޔަލަށް ހުރިހާ ފީއަކާއި ޖޫރިމަނާ ދައުލަތައް ދައްކައި ޚަލާސްކުރުމަށް އެ ވުޒާރައިން ވަނީ އަންގާފައެވެ. އަދި އެގޮތަށް ޢަމަލު ނުކުރާ ފަރާތްތަކަށް ފިޔަވަޅު އަޅާނެކަމުގެ އިންޒާރު ވަނީ ދެއްވާފައެވެ. އެގޮތުން އެކްސްޕެޓް ސިސްޓަމުން ދެމުންއަންނަ ޚިދުމަތްތައް މެދުކަނޑާލައި ނިޒާމް ބޭނުން ކުރުމުން އެފަރާތްތައް ސަސްޕެންޑް ކުރެވޭނެއެވެ.

ވުޒާރާއިން އާންމުކުރި ލިސްޓުން ދައްކާ ގޮތުގައި 123 ކުންފުންޏަކުން ދައުލަތަށް ދައްކަން ޖެހޭ އަދަދު މިލިއަނަކަށްވުރެ ގިނައެވެ. ބައެއް ކުންފުނިތަކުން ދައްކަން ޖެހޭ ފައިސާގެ އަދަދު 26 މިލިއަނަށް ވުރެ މައްޗަށް އަރައެވެ.