އޭސީސީން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި ބައްދަލުކޮށްފި
މޯލްޑިވްސް އެންޓި ކޮރަޕްޝަން ކޮމިޝަނުން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއާއި ބައްދަލުކުރައްވައިފިއެވެ. މި ބައްދަލުވުމުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމްއާއި، ޕާމަނަންޓް ސެކްރެޓަރީ ޟައުފިޝާން ޢަބްދުالله ކަމާލުއްދީންގެ އިތުރުން ވުޒާރާގެ ސީނިއަރ އޮފިޝަލުން ވަނީ ބައިވެރިވެވަޑައިގަންނަވާފައެވެ.
މި ބައްދަލުވުމުގައި ވަނީ ދިވެހިރާއްޖޭގެ ސިއްހީ ވެލްފެއާ ނިޒާމުގައި ހުރި ބާގަނޑުތައް ދެނެގަނެ، އިސްރާފު ކުޑަކުރުމާއެކު، އެނިޒާމުގެ ތެރެއިން ހުރިހާ ރައްޔިތުންނަށް ވެސް ހަމަހަމަކަމާއެކު ޚިދުމަތް ދެވޭނެ ގޮތްތަކަށް އަލިއަޅުވާލައި މަޝްވަރާކޮށްފައެވެ.
ހަމައެއާއެކު، ސަރުކާރުން މިހާރު ފަށާފައިވާ ރިފޯމު މަސައްކަތްތަކަށް ބާރުލިބޭނެހެން، ދިވެހިރާއްޖޭގެ ޞިއްޙީ ވެލްފެއާ ނިޒާމާއި ގުޅިގެން ޤާނޫނީ އޮނިގަނޑު އޮތް ގޮތް ދެނެގަނެ، މި ނިޒާމު ހިންގުމުގައި ކޮރަޕްޝަނަށް މަގުފަހިވާ ގޮތަށް ހުރި ކަންކަން ފާހަގަކޮށް މި ނިޒާމު އިތުރަށް ހަރުދަނާކުރުމަށް ލަފާދިނުމުގެ މަޤްސަދުގައި މޯލްޑިވްސް އެންޓި ކޮރަޕްޝަން ކޮމިޝަނުން އެކުލަވާލާފައިވާ ދިރާސާ ކަރުދާސް ވަނީ ވަޒީރު ޑރ. ޢާއިޝަތު ޝިހާމްއާއި ހިއްސާކުރައްވާފައެވެ. އަދި މި ދިރާސާ ރިޕޯޓުގައި މޯލްޑިވްސް އެންޓި ކޮރަޕްޝަން ކޮމިޝަނުން ފާހަގަކޮށްފައިވާ ކަންކަމާއި ގުޅޭ ގޮތުން ވެސް ވަނީ މަޝްވަރާކޮށްފައެވެ.
ސަރުކާރުގެ ޚަރަދު ކުޑަކުރުމުގެ ސިޔާސަތުގެ ދަށުން އާސަންދަ ސްކީމް މެދުވެރިކޮށް، އާއްމު ރައްޔިތުންނަށް ލިބިދެވެނީ ފެންވަރު ރަނގަޅު ބޭސްކަން ކަށަވަރުކޮށް، ދެމެހެއްޓެނިވި އުޞޫލަކުން ބޭސް ލިބޭނެގޮތް ހަމަޖެއްސުމުގެ މަޤްޞަދުގައި ސަރުކާރުން މިހާރު ދަނީ ބަލްކް ޕްރޮކިޔުމަންޓް ޕްރޮޖެކްޓެއްވެސް ކުރިއަށް ގެންދަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
