އަހަރުގެ ފުރަތަމަ އަށް މަސްދުވަހު ހިލޭ އެހީގެ ގޮތުގައި 32.4 މިލިއަން ޑޮލަރު ލިބިއްޖެ

މި އަހަރުގެ ފުރަތަމަ އަށް މަސްދުވަހުގެ ތެރޭގައި ދިވެހިރާއްޖެއަށް ހިލޭ އެހީގެ ގޮތުގައި 32.4 މިލިއަން ޑޮލަރު ލިބިއްޖެއެވެ. މިއީ މުޅި އަހަރަށް ލަފާކޮށް ދައުލަތުގެ ބަޖެޓުގައި ކަނޑައަޅާފައިވާ އަދަދަށްވުރެ އިތުރު އަދަދެކެވެ.

މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާންމުކޮށްފައިވާ އެންމެ ފަހުގެ "ވީކްލީ ފިސްކަލް ޑިވެލޮޕްމަންޓްސް" ރިޕޯޓުން ދައްކާ ގޮތުގައި، މި އަހަރުގެ އޮގަސްޓް މަހުގެ ނިޔަލަށް ދައުލަތަށް ވަނީ 32.4 މިލިއަން ޑޮލަރުގެ ހިލޭ އެހީ ލިބިފައެވެ. މުޅި އަހަރު ދުވަހަށް ދައުލަތުގެ ބަޖެޓުގައި ހިލޭ އެހީގެ ގޮތުގައި ލިބޭނެ ކަމަށް ލަފާކޮށްފައިވަނީ 24.2 މިލިއަން ޑޮލަރެވެ.

މި އަހަރުގެ ފުރަތަމަ އަށް މަސްދުވަހު ލިބުނު ހިލޭ އެހީގެ އަދަދަކީ ވޭތުވެދިޔަ އަހަރުގެ މި މުއްދަތާ އަޅާބަލާއިރު ވެސް ބޮޑު އަދަދެކެވެ. މިދިޔަ އަހަރުގެ މި މުއްދަތުގައި ހިލޭ އެހީގެ ގޮތުގައި ލިބިފައިވަނީ 16.4 މިލިއަން ޑޮލަރެވެ.

ފައިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން، މި އަހަރުގެ ފުރަތަމަ އަށް މަސްދުވަހު ދައުލަތަށް އާމްދަނީ އާއި ހިލޭ އެހީގެ ގޮތުގައި ޖުމްލަ 1.86 ބިލިއަން ޑޮލަރު ވަނީ ލިބިފައެވެ. މިއީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއާ އަޅާބަލާއިރު 6.2 އިންސައްތައިގެ ކުރިއެރުމެކެވެ. ދައުލަތުގެ އާމްދަނީއަށް 109.6 މިލިއަން ޑޮލަރު އިތުރުވެފައިވަނީ މައިގަނޑު ގޮތެއްގައި ޓެކްސް އާމްދަނީ އިތުރުވުމާ ގުޅިގެން ކަމަށް މިނިސްޓްރީން ބުނެފައިވެއެވެ. އެގޮތުން ޓެކްސް އާމްދަނީ ވަނީ 1.34 ބިލިއަން ޑޮލަރުން 1.45 ބިލިއަން ޑޮލަރަށް (8.5 އިންސައްތަ) އިތުރުވެފައެވެ.

އާމްދަނީ އިތުރުވި ނަމަވެސް، މި މުއްދަތުގައި ދައުލަތުގެ ހަރަދުތައް ވެސް ވަނީ އިތުރުވެފައެވެ. އެގޮތުން ޖުމްލަ ހަރަދު ވަނީ 2 ބިލިއަން ޑޮލަރަށް އަރާފައެވެ. މިއީ މިދިޔަ އަހަރުގެ މި މުއްދަތުގައި ހަރަދުވި 1.71 ބިލިއަން ޑޮލަރާ އަޅާބަލާއިރު 17 އިންސައްތައިގެ އިތުރުވުމެކެވެ. ރިކަރަންޓް ހަރަދު 1.48 ބިލިއަން ޑޮލަރުން 1.75 ބިލިއަން ޑޮލަރަށް (18.6 އިންސައްތަ) މައްޗަށް ގޮސްފައިވާއިރު، ކެޕިޓަލް ހަރަދު ވަނީ 235.4 މިލިއަން ޑޮލަރުން 251.6 މިލިއަން ޑޮލަރަށް (6.9 އިންސައްތަ) އިތުރުވެފައެވެ.

މި މުއްދަތުގައި ދަރަންޏާއި އިންޓްރެސްޓް ނުހިމަނައި، ހަރަދަށްވުރެ ލިބުނު އާމްދަނީ އިތުރުވެ، ޕްރައިމަރީ ސާޕްލަސްގެ ގޮތުގައި 82.4 މިލިއަން ޑޮލަރު ވަނީ ރެކޯޑުކުރެވިފައެވެ. ނަމަވެސް، މިއީ ވޭތުވެދިޔަ އަހަރު ރެކޯޑުކުރެވުނު 262.0 މިލިއަން ޑޮލަރުގެ ޕްރައިމަރީ ސާޕްލަސްއާ އަޅާބަލާއިރު 68.6 އިންސައްތަ ދަށް އަދަދެކެވެ.

މީގެ އިތުރުން، ދަރަންޏާއި އިންޓްރެސްޓް ހިމަނައިގެން ބަޖެޓުގެ ޖުމްލަ ހިސާބުތަކަށް ބަލާއިރު، މި މުއްދަތުގައި ވަނީ 138.1 މިލިއަން ޑޮލަރުގެ ޑެފިސިޓެއް ރެކޯޑުކުރެވިފައެވެ. ވޭތުވެދިޔަ އަހަރުގެ މި މުއްދަތުގައި ބަޖެޓުގައި ރެކޯޑުކުރެވިފައިވަނީ 42.7 މިލިއަން ޑޮލަރުގެ ސާޕްލަސްއެކެވެ.