މައިންނާއި ކުޑަކުދިންގެ ދުޅަހެޔޮކަމަށް ފާއިތުވި ދެ އަހަރުތެރޭ ބޮޑެތި ކުރިއެރުންތަކެއް ހޯދިއްޖެ: ފަސްޓް ލޭޑީ

ފާއިތުވި ދެ އަހަރު ދުވަހުގެ ތެރޭގައި ރާއްޖޭގެ މައިންނާއި ކުޑަކުދިންގެ ސިއްހީ ރައްކާތެރިކަމާއި ދުޅަހެޔޮކަން ކަށަވަރުކުރުމަށް ބޮޑެތި ކުރިއެރުންތަކެއް ހޯދިފައިވާ ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.

މި އަހަރުގެ ދުނިޔޭގެ ގާތުންދިނުމުގެ ހަފުތާއާ ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ފަސްޓް ލޭޑީ ވިދާޅުވީ، ދަރިންނަށް ގާތުން ކިރުދިނުމަށްޓަކައި މައިން ކުރާ ގުރުބާނީއަކީ މައިވަންތަ ލޯބީގެ އެންމެ މަތިވެރި ރަމްޒު ކަމަށެވެ. ގާތުން ކިރުދިނުމުގެ ސަބަބުން ކުއްޖާގެ ދިފާއީ ނިޒާމު ވަރުގަދަވެ، މަންމައާއި ދަރިފުޅުގެ ގުޅުން ބަދަހިވެ، މުޅި އުމުރަށް ދެމިގެންދާނެ ސިއްހީ ދުޅަހެޔޮކަމުގެ ބިންގާ އެޅިގެންދާކަން އެކަމަނާ ފާހަގަކުރެއްވިއެވެ.

ސަރުކާރުން މައިންނަށް ދެމުންދާ އެހީތެރިކަމަށް އަލިއަޅުވާލައްވަމުން ފަސްޓް ލޭޑީ ވިދާޅުވީ، ވަޒީފާ އަދާކުރާ މައިންނަށް ދޭ "ނާސިންގ ބްރޭކް" ނުވަތަ ކިރުދޭ ވަގުތު އެއް އަހަރުން ދެ އަހަރަށް އިތުރުކޮށްފައިވާ ކަމަށެވެ. މީގެ އިތުރުން މެޓަރނިޓީ ލީވް ނުވަތަ ވިހެއުމާ ގުޅިގެންދޭ ޗުއްޓީ ހަރުދަނާކޮށް، މައިންނާއި ކުދިންގެ ސިއްހީ ރައްކާތެރިކަން ފުޅާކުރުމަށް ގިނަ ފިޔަވަޅުތަކެއް އަޅާފައިވާކަން އެކަމަނާ ފާހަގަކުރެއްވިއެވެ.

ވަޒީފާގެ ގާނޫނަށް ދާދިފަހުން ގެނައި އިސްލާހުގެ ދަށުން، ވިހެއުމަށްފަހު ވަޒީފާއަށް ނުކުންނަ މައިންނަށް ދަރިފުޅަށް ކިރުދިނުމަށްޓަކައި މަސައްކަތު ކޮންމެ ދުވަހަކު 30 މިނެޓުގެ ދެ ވަގުތު (އުޖޫރަ ލިބޭ ގޮތަށް) ލިބިދެއެވެ. މީގެ ކުރިން އެއް އަހަރު ދުވަހަށް އޮތް މި ފުރުސަތު، މިއަހަރުގެ މާރިޗު މަހުގެ މެދުތެރޭގައި ގެނައި އިސްލާހާއެކު ވަނީ ދެ އަހަރަށް އިތުރުކޮށްފައެވެ. އަދި ގާނޫނުގައިވާ ގޮތުން ކޮންމެ މަންމައަކަށްވެސް ވިހެއުމާ ގުޅިގެން 6 މަސް ދުވަހުގެ ޗުއްޓީއެއް ލިބިދެއެވެ.

މި އަހަރުގެ ގާތުންދިނުމުގެ ހަފުތާގެ ޝިއާރަކީ "ގާތުންދިނުމަށް އިސްކަންދީ: ދެމެހެއްޓެނިވި އެހީތެރިކަމުގެ ނިޒާމެއް ގާއިމުކުރަމާ" މިއެވެ. މި ޝިއާރާ އެއްގޮތަށް، މައިންނަށް އެހީތެރިކަން ފޯރުކޮށްދިނުމަކީ އާއިލާއާއި، ވަޒީފާދޭ ފަރާތްތަކާއި މުޅި މުޖުތަމައުގެ ޒިންމާއެއްކަން ފަސްޓް ލޭޑީ ހަނދާންކޮށްދެއްވިއެވެ. އަދި ސަރުކާރުން ފަހިކޮށްދީފައިވާ ހައްގުތަކާއި ފުރުސަތުތަކުގެ ބޭނުން ފުރިހަމައަށް ހިފުމަށް ހުރިހާ މައިންނަށް އެކަމަނާ އިލްތިމާސްކުރެއްވިއެވެ.

ކޮންމެ އަހަރެއްގެވެސް އޮގަސްޓް މަހުގެ ފުރަތަމަ ހަފުތާ ފާހަގަކުރަނީ ދުނިޔޭގެ ގާތުންދިނުމުގެ ހަފުތާގެ ގޮތުގައެވެ.