ތިން ވޯޓު ބާތިލްކަމަށް ކަނޑައެޅުމުން ވޭވަށު ކައުންސިލް ގޮނޑި ޕީއެންސީއަށް ލިބިއްޖެ

ނިމިގެން ދިޔަ ލޯކަލް ކައުންސިލް އިންތިހާބުގައި މ. ވޭވަށު ކައުންސިލްގެ އާންމު މެންބަރު ހޮވުމަށް ބޭއްވި އިންތިހާބުގައި ސައްހަ ވޯޓުގެ ގޮތުގައި އިލެކްޝަންސް ކޮމިޝަނުން ކަނޑައެޅި ތިން ވޯޓެއް ބާތިލްކަމަށް ހައިކޯޓުން މިއަދު ހުކުމް ކުރުމާ ގުޅިގެން އެ ގޮނޑި ޕީއެންސީގެ ކެންޑިޑޭޓަށް ކާމިޔާބުވެއްޖެއެވެ.

މި މައްސަލައަކީ އިންތިހާބުގެ ނަތީޖާއާ މެދު ހިތްހަމަނުޖެހިގެން ޕީއެންސީގެ ކެންޑިޑޭޓުގެ ފަރާތުން ހައިކޯޓަށް ހުށަހެޅި އިންތިހާބީ ޝަކުވާގެ މައްސަލައެކެވެ.

ވޭވަށު ކައުންސިލްގެ އާންމު ދެ މެންބަރުން ހޮވުމަށް ބޭއްވި މި އިންތިހާބުގެ ވަގުތީ ނަތީޖާ ދެއްކި ގޮތުން، އެމްޑީޕީގެ ކެންޑިޑޭޓް އަހްސަން ނައީމް އިންތިހާބު ކާމިޔާބު ކުރެއްވީ ދެ ވޯޓުގެ ތަފާތަކުންނެވެ. އަހްސަންއަށް 121 ވޯޓު ލިބިފައިވާއިރު، މައްސަލަ ހުށަހެޅި ޕީއެންސީގެ ކެންޑިޑޭޓް މުހައްމަދު ނަޒީހަށް ލިބިފައިވަނީ 119 ވޯޓެވެ. ނަމަވެސް ހައިކޯޓުގެ ނިންމުމާއެކު މި ނަތީޖާއަށް ވަނީ ބޮޑު ބަދަލެއް އައިސްފައެވެ.

ހައިކޯޓުން މި މައްސަލަ ނިންމިއިރު ފަނޑިޔާރުންގެ މެދުގައި ރައުޔު ތަފާތުވެފައިވީ ނަމަވެސް، މައްސަލައިގެ އަގުލަބިއްޔަތުން ނިންމާފައިވަނީ އިންތިހާބުގައި މައްސަލަ ޖެހުނު ތިން ވޯޓަކީ ބާތިލް ވޯޓުތަކެއްގެ ގޮތުގައެވެ. އެއީ އެމްޑީޕީގެ ކެންޑިޑޭޓަށް ލިބިފައިވާ ތިން ވޯޓެވެ. މި ތިން ވޯޓު ބާތިލް ކުރުމުން އަހްސަން ނައީމަށް ލިބުނު ވޯޓުގެ އަދަދު 118 އަށް ވަނީ ދަށްވެފައެވެ. އެހެންކަމުން 119 ވޯޓާއެކު މި ގޮނޑި މިހާރު ކާމިޔާބު ކުރީ ޕީއެންސީގެ ކެންޑިޑޭޓް މުހައްމަދު ނަޒީހެވެ.

މި މައްސަލައިގެ ހުކުމް އިއްވަވަމުން ހައިކޯޓުގެ ފަނޑިޔާރު މުޙައްމަދު ޝަނީޒު ވިދާޅުވީ، ވޯޓު ކަރުދާހެއްގައި އިތުރު ފާހަގައެއް ނުވަތަ ނިޝާނެއް އޮވެގެން ނުވާނެ ކަމަށް ގާނޫނުގައި ސަރީހަކޮށް ބަޔާންކޮށްފައިވާ ކަމަށެވެ. އަދި ވޯޓު ކަރުދާހުގައި ވަކި ހާއްސަ ނިޝާނެއް ހުރުމަކީ ވޯޓުގެ ސިއްރުކަން ގެއްލިގެންދާނެ ކަމެއްކަން ފަނޑިޔާރު ފާހަގަކުރެއްވިއެވެ. މީގެ އިތުރުން، ވޯޓު ކަރުދާސްތައް ވަކިވަކިން ޗެކްކޮށް، އެފަދަ ނިޝާނެއް ނެތްކަން ކަށަވަރު ކުރުމަކީ އިލެކްޝަންސް ކޮމިޝަނުގެ ޒިންމާއެއް ކަމަށްވެސް ޝަރީއަތުން ވަނީ ކަނޑައަޅާފައެވެ.

ޝަރީއަތުން އިތުރަށް ފާހަގަކުރި ގޮތުގައި، ވޯޓު ކަރުދާހުގައި ހުރި ނިޝާނަކީ ކަރުދާސް ޕްރިންޓު ކުރުމުގެ ތެރޭގައި ދިމާވި ކަމެއް ކަމަށް ވީނަމަވެސް، އޭގެ ސަބަބުން ވޯޓުގެ ސިއްރުކަން ގެއްލޭނަމަ އެއީ ސައްހަ ވޯޓެއްގެ ގޮތުގައި ބަލައިގަނެވިގެން ނުވާނެއެވެ. މި ސަބަބުތަކަށް ރިއާޔަތްކޮށް، އެމްޑީޕީގެ ކެންޑިޑޭޓަށް ލިބިފައިވާ ތިން ވޯޓަކީ ބާތިލް ވޯޓުތަކެއް ކަމަށް ހައިކޯޓުގެ އަގުލަބިއްޔަތުން ވަނީ ނިންމާފައެވެ.