ޚާރިޖީ ސިޔާސަތު ތަންފީޒުކުރުމާ ގުޅޭގޮތުން ސަފީރުންނާއެކު ފޮރިން މިނިސްޓަރު މުހިންމު ބައްދަލުވުމެއް ބާއްވަވައިފި

ދިވެހިރާއްޖޭގެ ޚާރިޖީ ވަޒީރު، އިރުތިޝާމް އާދަމް، ރާއްޖެއިން ބޭރުގައި ގާއިމުކޮށްފައިވާ ދިވެހި އެމްބަސީތަކާއި ޑިޕްލޮމެޓިކް މިޝަންތަކުގެ އިސްވެރިންނާ އެކު މަތީ ފަންތީގެ މުހިންމު ބައްދަލުވުމެއް ބާއްވަވައިފިއެވެ.

ޚާރިޖީ ވުޒާރާގައި ބޭއްވުނު މި ބައްދަލުވުމަކީ، މިޝަންތަކުގެ މިހާރުގެ މަސައްކަތްތައް ބައްލަވައިލެއްވުމަށާއި، މި ސަރުކާރުގެ ޚާރިޖީ ސިޔާސަތުގެ ސްޓްރެޓީޖިކް ރޯޑްމެޕް ހާމަކުރެއްވުމުގެ މަގުސަދުގައި ބޭއްވެވި ބައްދަލުވުމެކެވެ.

މި ބައްދަލުވުމުގައި ވާހަކަފުޅު ދައްކަވަމުން މިނިސްޓަރު އިރުތިޝާމް ވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "ދިވެހިރާއްޖެ އިސްކުރުން" ނުވަތަ "މޯލްޑިވްސް-ފަސްޓް" ޚާރިޖީ ސިޔާސަތު ކުރިއެރުވުމުގައި ބޭރު ގައުމުތަކުގައި ތިއްބަވާ ސަފީރުންނާއި މިޝަންތަކުން އަދާކުރާ މުހިންމު ދައުރު ފާހަގަކުރައްވާފައެވެ. އަދި ދިވެހިރާއްޖޭގެ މިނިވަންކަމާއި ސިޔާދަތަށް އިހުތިރާމްކުރާ އަދި ދިވެހި ރައްޔިތުންގެ ލާބަޔާއި މަންފާއަށް މަސައްކަތްކުރާ ކޮންމެ ގައުމަކާއި ބައިނަލްއަގުވާމީ ޖަމްއިއްޔާއަކާ އެކު ގުޅުން ބަދަހިކުރުމަށް ރާއްޖެ އަބަދުވެސް ތައްޔާރަށް އޮތްކަން މިނިސްޓަރު ހާމަކުރެއްވިއެވެ. މީގެއިތުރުން، މި ސިޔާސަތު އަމަލީ ގޮތުން ތަންފީޒުކޮށް، ނަތީޖާ ނެރުމުގެ އެންމެ ކުރީ ސަފުގައި މަސައްކަތްކުރައްވާ ބޭފުޅުންނަކީ ޚާރިޖީ މަންދޫބުންކަން ވެސް އެކަމަނާ ފާހަގަކުރެއްވިއެވެ.

މި ބައްދަލުވުމުގައި އިގްތިސާދީ ޑިޕްލޮމެސީއަށް ޚާއްސަ އަހައްމިއްޔަތުކަމެއް ދެއްވައި، ރާއްޖޭގެ ފަތުރުވެރިކަން ޕްރޮމޯޓްކުރުމަށާއި، ބޭރުގެ އިންވެސްޓަރުންނަށް ހުރި ފުރުސަތުތައް ފަހިކޮށްދިނުމަށް އިސްކަންދެއްވުމަށް މިނިސްޓަރު އިރުތިޝާމް ސަފީރުންނަށް އިލްތިމާސްކުރެއްވިއެވެ. އަދި ރާއްޖޭގެ މުހިންމު އިގްތިސާދީ ދާއިރާތައް ކުރިއެރުވުމަށާއި، ދެފަރާތުގެ ވިޔަފާރިއާއި ތަރައްގީގެ އާ ފުރުސަތުތައް ހޯދުމަށް ބޭރު ގައުމުތަކާއެކު ގާތުން މަސައްކަތްކުރުމަށް ވެސް އެދިވަޑައިގެންނެވިއެވެ.

ހަމައެއާއެކު، ގައުމުތަކާއެކު އޮންނަ ގުޅުން އިތުރަށް ބަދަހިކޮށް، ގައުމީ ތަރައްގީއަށް ފައިދާހުރި ފުރުސަތުތައް ހޯދައިދިނުމަށާއި، ރާއްޖެއިން ބޭރުގައި ދިރިއުޅޭ އަދި އެކި ބޭނުންތަކުގައި ދަތުރުކުރާ ދިވެހި ރައްޔިތުންނަށް ފަސޭހަކަމާއެކު ފެންވަރު ރަނގަޅު ކޮންސިއުލަރ ޚިދުމަތްތައް އަވަހަށް ފޯރުކޮށްދީ، ރައްޔިތުންގެ ލާބައާއި މަންފާއަށް އިސްކަންދިނުމަށް ޚާރިޖީ ވަޒީރު ވަނީ މިޝަންތަކުގެ އިސްވެރިންނަށް ގޮވާލައްވާފައެވެ.