މަސްވެރިކަމަށް ޒުވާނުންގެ ޝައުގުވެރިކަން އިތުރުކުރުމަށް ޚާއްސަ ޕްރޮގްރާމެއް

މަސްވެރިކަމުގެ ދާއިރާއިން ޒުވާނުން ތަމްރީނުކޮށް އެ ދާއިރާއަށް ޒުވާނުންގެ ހިތްތަކުގައި ޝައުގުވެރިކަން އުފެއްދުމަށް، މިނިސްޓްރީ އޮފް ފިޝަަރީޒް އެންޑް އޯޝަން ރިސޯސަސްއިން އިސްނަގައިގެން، ވޯލްޑް ބޭންކްގެ އެހީތެރިކަމާއެކު، ޚާއްސަ ޕްރޮގްރާމެއް ހިންގަަން ނިންމަައިފިއެވެ.

އެ މިނިސްޓްރީން ބުނީ މި ޕްރޮގްރާމަކީ ޒުވާނުންގެ މެދުގައި މަސްވެރިކަމަށް ޝައުގުވެރިކަން އުފައްދައި، މަސްވެރިކަމާއި މަސްވެރިކަމުގެ ދާއިރާއާ ގުޅޭ މަސައްކަތްތަކަށް ޒުވާނުން ނެރުމަށް، ކަމާއިގުޅޭ ތަމްރީނާއި ހުނަރު ހޯދުމުގެ ފުރުސަތު ޒުވާނުންނަށް ފަހިކޮށްދިނުމުގެ ގޮތުން ހިންގާ ޕްރޮގްރާމެއް ކަމެވެ. 

މި ތަމްރީނު ޕްރޮގްރާމްގައި މަސްވެރިކަމާ ބެހޭ ފަންނީ މަޢުލޫމާތު ދިނުމާއި އަމަލީގޮތުން މަސްވެރިކަމުގައި ހަރަކާތްތެރިވުމުގެ ފުރުސަތު ޕްރޮގްރާމުގެ ބައިވެރިންނަށް ފަހިކޮށްދެވޭނެކަމަށް އެ މިނިސްޓްރީން ބުނެފައިވެއެވެ.  މިގޮތުން، ކަޅުބިލަމަހުގެ ދޮށީގެ މަސްވެރިކަމުގައި ރާއްޖޭގައި ހަރަކާތްތެރިވާ އުޅަނދުތަކުގެ ތެރެއިން ނިސްބަތުން އެންމެ ފާހަގަކޮށްލެވޭ ދޮށީގެ މަސްވެރިކަން ކުރާ އުޅަނދެއްގައި ޢަމަލީގޮތުން މަސްވެރިކަމުގައި ހަރަކާތްތެރިވެ މަސްވެރިކަން ކުރާ ގޮތުގެ ތަމްރީނާއި ހުނަރު ރާއްޖޭގެ އެންމެ ފުންނާބު އުސް ކެޔޮޅުންގެ ފަރާތުން އުނގެނި ދަސްކުރުމުގެ ފުރުސަތު ލިބޭނެކަމަށް ވެސް މިނިސްޓްރީން ވަނީ ބުނެފައެވެ.

އަންނަ ނޮވެމްބަރު މަހު ފަށާ މި ޕްރޮގްރާމް ކުރިއަށް ގެންދާނީ ޖަނަވަރީ މަހުގެ ނިޔަލަށެވެ. ތިން މަހުގެ މުއްދަތަކަށް ކުރިއަށްގެންދާ މި ޕްރޮގްރާމްގެ ބައިވެރިންނަށް އެ މުއްދަތުގައި، ދުވަހު އެލަވަންސް ދިނުމަށް ހަމަޖެހިފައިވާކަމަށް ބުނެފައިވެއެވެ.