ސްޕޯޓް ފިޝިންގްގައި ހަރަކާތްތެރިވާ ފަރާތްތަކަށް ބާއްވާ ބައްދަލުވުމުގައި ބައިވެރިވުމުގެ ފުރުސަތު ހުޅުވާލައިފި
ރާއްޖޭގެ އެކި ކަންކޮޅުތަކުގައި މުނިފޫހިފިލުވުމަށް މަސްވެރިކަން ކުރާ ފަރާތްތަކާއި، ސްޕޯޓް ފިޝިންގްގައި ހަރަކާތްތެރިވާ ފަރާތްތަކަށް އަމާޒުކޮށްގެން ބާއްވާ ހާއްސަ ބައްދަލުވުމެއްގައި ބައިވެރިވުމުގެ ފުރުސަތު މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ހުޅުވާލައިފިއެވެ.
މި ބައްދަލުވުމަކީ މުނިފޫހިފިލުވުމަށް ކުރާ މަސްވެރިކަމުގެ މެނޭޖްމަންޓް ޕްލޭން އެކުލަވާލުމަށްޓަކައި އެ ވުޒާރާއިން ކުރިއަށްގެންދާ ސިލްސިލާ މަޝްވަރާ ބައްދަލުވުންތަކުގެ ތެރެއިން ބާއްވާ ބައްދަލުވުމެކެވެ. މިއީ މި މަޝްރޫއުގެ ދަށުން މާލޭގައި ބާއްވާ މިފަދަ ދެވަނަ ބައްދަލުވުމެވެ.
އަންނަ އޮގަސްޓް މަހުގެ 15 ވަނަ ދުވަހު މާލޭގައި ބޭއްވުމަށް ހަމަޖެހިފައިވާ މި ބައްދަލުވުމުގައި، ރާއްޖޭގެ އެކި ކަންކޮޅުތަކުގައި ސްޕޯޓް ފިޝިންގްގެ ދާއިރާގައި ހަރަކާތްތެރިވާ ފަރާތްތަކަށް ބައިވެރިވުމުގެ ފުރުސަތު މިހާރު ވަނީ ހުޅުވާލާފައެވެ. ރަށްރަށުން މި ބައްދަލުވުމަށް ވަޑައިގަންނަވާ ބައިވެރިންގެ ދަތުރުފަތުރުގެ ހަރަދު މިނިސްޓްރީން ހަމަޖައްސައިދޭ ގޮތަށް ވަނީ ނިންމާފައެވެ.
މި ބައްދަލުވުމުގައި ބައިވެރިވުމަށް ޝައުގުވެރިވާ ފަރާތްތަކުން އޮގަސްޓް މަހުގެ 2 ވަނަ ދުވަހުގެ ކުރިން ރަޖިސްޓްރީ ކުރަންޖެހެއެވެ. ބައިވެރިވުމަށް އެދޭ ފަރާތްތަކުން https://tinyurl.com/4smwztxa ލިންކް މެދުވެރިކޮށް ރަޖިސްޓްރީ ކުރެއްވުމަށް އެ ވުޒާރާއިން އިލްތިމާސްކުރެއެވެ.
މި ބައްދަލުވުމުގެ މައިގަނޑު މަގްސަދަކީ ރާއްޖޭގައި ކުރިއަރަމުން އަންނަ ސްޕޯޓް ފިޝިންގް ނުވަތަ މުނިފޫހިފިލުވުމަށް ކުރާ މަސްވެރިކަން ހަރުދަނާ ނިޒާމެއްގެ ދަށުން ބެލެހެއްޓޭނެ ގޮތްތަކެއް ކަނޑައެޅުމުގައި އެ ދާއިރާގައި އުޅޭ ފަރާތްތަކުގެ ހިޔާލާއި މަޝްވަރާ ހޯދުމެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
