މާލީ އެހީތެރިކަން ފޯރުކޮށްދިނުމުގެ އައު ސްކީމްތަކެއް ފެށުމަށް ތައްޔާރުވަނީ

އަމިއްލަ ބޯހިޔާވަހިކަމެއް ބިނާކުރުމަށާއި ގަތުމަށް ފައިސާގެ ތަދިކަން ކުރިމަތިވެފައިވާ ފަރާތްތަކަށް ޚާއްޞަކޮށްގެން، މާލީ އެހީތެރިކަން ފޯރުކޮށްދިނުމުގެ އައު ސްކީމްތަކެއް ފެށުމަށް ތައްޔާރީތައް ވަމުން އަންނަކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ހާމަކޮށްފިއެވެ.

ޕީއެސްއެމްގެ 'ރާއްޖެމިއަދު' ޕްރޮގްރާމުގައި ވާހަކަދައްކަވަމުން، އެ ވުޒާރާގެ ސްޓޭޓް މިނިސްޓަރ އަލްއުސްތާޛު އަޙުމަދު ނާޒީމް މުޙައްމަދު ފާހަގަކުރެއްވި ގޮތުގައި، ޝަރުތު ހަމަނުވުމުގެ ސަބަބުން ބޭންކުތަކުން ގެދޮރު އެޅުމުގެ ލޯނު ނުލިބި ތިބި ވަރަށް ގިނަ ރައްޔިތުން އެބަތިއްބެވެ.

މިފަދަ ދަތިތަކަށް ހައްލެއް ހޯދައިދިނުމަށް ސަރުކާރުން އިސްނަގައިގެން ކުރިއަށްގެންދިޔަ ހިޔާވެހި ސްކީމަށް ގިނަ އަދަދެއްގެ މީހުން ހުށަހަޅާފައިވާއިރު، އެ މަޝްރޫޢުގެ ދަށުން 1.1 ބިލިއަން ރުފިޔާ ދޫކުރުމަށް ވަނީ ކަނޑައަޅާފައެވެ.

ނާޒިމް އިތުރަށް ވިދާޅުވީ، ގެދޮރު ބިނާކުރުމަށް އެހީތެރިވުމުގެ ގޮތުން ބޭންކުތަކާ ގުޅިގެން އިތުރު ދެ ފައިނޭންސިންގ ޕްރޮގްރާމެއް ފެށުމަށް މަސައްކަތްކުރަމުންދާ ކަމަށެވެ. މި ސްކީމްތަކުގައި ސަރުކާރުން އެހީވަނީ، އަމިއްލަ ބިން އޮވެ ގެދޮރު ނޭޅިފައިވާ މީހުން ބޭންކުތަކުން ލޯނު ހޯދުމަށް ދައްކަންޖެހޭ މައިގަނޑު ޝަރުތެއް ކަމަށްވާ އިކުއިޓީ ފައިސާ ހަމަޖައްސައިދިނުމުގައެވެ.

މިގޮތުން، ދެ ލައްކަ ރުފިޔާގެ އިކުއިޓީ ސަރުކާރުން ހަމަޖައްސައިދީގެން އެއް މިލިއަން ރުފިޔާއާ ހަމައަށް ބޭންކު މެދުވެރިކޮށް ލޯނު ލިބޭނެ ގޮތް ހަމަޖައްސައިދޭނެ ކަމަށާއި، ކުރިއަށް އޮތް ދެ މަސްދުވަހުގެ ތެރޭގައި މި ސްކީމް އިފްތިތާޙުކުރުމަށް އަމާޒުހިފާފައިވާ ކަމަށް ނާޒިމް ވިދާޅުވިއެވެ.

މީގެއިތުރުން، އަތޮޅުތަކުގައި ކުރިއަށްގެންދާ ފްލެޓް މަޝްރޫޢުތަކުން ހައުސިންގ ޔުނިޓެއް ބައްލަވައިގަތުމަށް އިކުއިޓީ ނެތް ފަރާތްތަކަށްވެސް އެހީތެރިކަން ދިނުމަށް ވަނީ ހަމަޖެހިފައެވެ. މި ބައިގެ ދަށުން އިކުއިޓީގެ ގޮތުގައި 2.5 ލައްކަ ރުފިޔާ ދޫކުރެވޭނެ ކަމަށްވެސް އޭނާ ހާމަކުރެއްވިއެވެ.

މި އެހީތެރިކަން ފޯރުކޮށްދިނުމަށްޓަކައި ހަތަރު ބޭންކަކާއެކު ފަހުމުނާމާ އެކުލަވާލުމުގެ މަސައްކަތް ހިނގަމުންދާއިރު، ސަރުކާރުގެ ވިސްނުމަކީ ނޮވެމްބަރު މަހުގެ ތެރޭގައި މި ސްކީމްތަކަށް ހުށަހެޅުމުގެ ފުރުޞަތު ހުޅުވާލުމެވެ.