ޝަހުޒާން ޖަލަށްލީ ކޯޓުގެ ހުރުމަތް ކެނޑުމުންކަމަށާއި އެކަމާއި ނޫސްވެރިކަމާ ގުޅުމެއް ނެތްކަމަށް ވަކީލު ސިއްދީގު ބުނެފި

ކޯޓުގެ ހުރުމަތް ކެނޑުމުގެ ކުށުގައި މުހައްމަދު ޝަހުޒާން 15 ދުވަހަށް ޖަލަށްލުމަށް ކުރި ހުކުމް ތަންފީޒު ކުރަން ފަށާފައިވަނީ ޖިނާއީ ކުށެއް ސާބިތުވެގެން ކަމަށާއި، އެއީ ނޫސްވެރިކަމާ އެއްވެސް ގުޅުމެއް އޮތް ކަމެއް ނޫންކަން ގާނޫނީ ވަކީލު އަހުމަދު ސިއްދީގު ހާމަކުރައްވައިފިއެވެ.

ވަކީލު ސިއްދީގު އެކްސްގައި ކުރެއްވި ޕޯސްޓެއްގައި ވިދާޅުވީ، ޝަހުޒާންގެ މައްޗަށް 4 މަހާއި 24 ދުވަހުގެ ޖަލު ހުކުމެއް އައީ ކޯޓުގެ ހުރުމަތް ކަނޑައިގެން ކަން، މައްސަލަ ބެއްލެވި ކޯޓުގެ ތިން ގާޒީންގެ އިއްތިފާގުން ކުރި ހުކުމުން ސާފުކޮށް އެނގެން އޮތް ކަމަށެވެ. އަދި މިއީ އޭނާ ކުރާ ނޫސްވެރިކަމުގެ މަސައްކަތާ ގުޅިގެން ކުރި ހުކުމެއް ނޫން ކަމަށާއި، އެއީ ނޫސްވެރިކަމަށް ދިން އަދަބެއް ނޫންކަންވެސް ވަކީލު ފާހަގަކުރެއްވިއެވެ.

ހުކުމުގެ ތަފްސީލަށް ބަލާއިރު، ޝަހުޒާންގެ ހުކުމަށް ކޯޓުން ވަނީ ބޮޑެތި ލުއިތަކެއް ދީފައެވެ. އެގޮތުން ހުކުމުގެ ބޮޑުބައި ކަމަށްވާ 4 މަހާއި 9 ދުވަސް ޖަލުގައި ހޭދަކުރުމުގެ ބަދަލުގައި، އެ މުއްދަތު ވަނީ 25,800 ރުފިޔާގެ ޖޫރިމަނާއަކަށް ބަދަލުކޮށްދީފައެވެ. މި ލުޔާއެކު އޭނާ ޖަލުގައި ތަންފީޒު ކުރަން ޖެހެނީ އެންމެ 15 ދުވަހުގެ މުއްދަތެކެވެ.

ސިއްދީގު އިތުރަށް ވިދާޅުވީ، ނޫސްވެރިކަމުގެ ފާހަކީ ކޯޓުގެ އަމުރުތަކަށް ނުކިޔަމަންތެރިވުމަށް އޮތް ހުއްދައެއް ނޫންކަން ނޫސްވެރިންވެސް ގަބޫލުކުރަން ޖެހޭނެ ކަމަށެވެ. އަދި ނޫސްވެރިން ސިޔާސީ ނުވެ، ހަމަހަމަކަމާއެކު ޚަބަރާއި މައުލޫމާތު ފެތުރުމަކީ އާންމުންގެ އިތުބާރު ނޫސްވެރިންނަށް ލިބިގެންދާނެ ކަމެއްކަންވެސް އޭނާ ފާހަގަކުރެއްވިއެވެ.

މި މައްސަލައާ ގުޅިގެން ގިނަ ބަޔަކު ބުނަމުންދަނީ، ގާނޫނުގެ ކުރިމަތީގައި އެންމެންނަކީ ހަމަހަމަ ބައެއް ކަމަށާއި، ކޯޓުތަކުގެ ހުރުމަތް ހިފެހެއްޓުމަކީ ކޮންމެ ފަރުދެއްގެ މައްޗަށްވެސް އޮތް ޒިންމާއެއް ކަމަށެވެ.