އިންޑިއާއަށް ދަތުރުކުރާ ފަރާތްތަކުން ސެލްފް-ޑެކްލެރޭޝަން ފޯމު ފުރިހަމަކުރަން އަންގައިފި

އިންޑިއާއަށް ދަތުރުކުރާ ހުރިހާ ފަރާތްތަކުން، ދަތުރު ފެށުމުގެ ކުރިން ސިއްހީ ހާލަތު ބަޔާންކުރާ ހާއްސަ ފޯމެއް ފުރަންޖެހޭ ގޮތަށް އެ ގައުމުގެ ސަރުކާރުން ހަމަޖައްސައިފިއެވެ.

އިންޑިއާގެ ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަން (ޑީޖީސީއޭ) އިން މިގޮތަށް ނިންމީ، ކޮންގޯގައި ހަލުވިކަމާއެކު ފެތުރެމުންދާ އިބޯލާ ވައިރަހާ ގުޅިގެން، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބައިނަލްއަގުވާމީ ސިއްހީ ކުއްލި ނުރައްކަލުގެ ހާލަތު އިއުލާނުކުރުމާ ގުޅިގެންނެވެ. ރައްކާތެރިކަމުގެ ފިޔަވަޅެއްގެ ގޮތުން އެކުލަވާލި މި އައު އުސޫލުގެ ދަށުން، ކޮންމެ ފަސިންޖަރަކުވެސް "ސެލްފް-ޑެކްލަރޭޝަން" ފޯމު ފުރިހަމަކުރުން މިހާރު ވަނީ މަޖުބޫރުކޮށްފައެވެ.

އިންޑިއާ ސަރުކާރުގެ މި ނިންމުމާ ގުޅިގެން ރާއްޖޭގެ ގައުމީ އެއާލައިން، މޯލްޑިވިއަން އިން ވަނީ ދަތުރުވެރިންނަށް މިކަމުގެ މައުލޫމާތު ހިއްސާކޮށްފައެވެ. އެ އެއާލައިނުން ބުނި ގޮތުގައި، ދަތުރުވެރިން ފުރަންޖެހޭ ފޯމު މޯލްޑިވިއަންގެ ވެބްސައިޓުން ލިބެން ހުންނާނެއެވެ. މި ފޯމު ފުރިހަމަކުރުމަށްފަހު، އިންޑިއާއަށް ގޮސް އެ ގައުމުގެ ހެލްތު އެންޑް އިމިގްރޭޝަން ކައުންޓަރަށް ހުށަހަޅަންޖެހޭނެއެވެ.

އިންޑިއާގެ އެއާޕޯޓުތަކުގައި ބަލިތައް މޮނިޓާކުރުމުގެ ނިޒާމު ވަރުގަދަކުރުމަށް އެކުލަވާލި މި އެސްއޯޕީގެ ދަށުން، ބައިނަލްއަގުވާމީ ފްލައިޓްތައް އަންނަ ޓާމިނަލްތަކުގައި ތާމަލް ސްކޭނަރު ބޭނުންކޮށްގެން ފަސިންޖަރުންގެ ހުން ހުރިތޯ ބަލާނެއެވެ. އަދި ފްލައިޓްތަކުގެ ތެރޭގައި ބަލީގެ އަލާމާތްތަކާ ބެހޭ މައުލޫމާތު ދިނުމާއި، އިބޯލާ ފެތުރިފައިވާ ގައުމުތަކަށް ދަތުރުކޮށްފައިވާ ފަރާތްތައް ދެނެގަތުމަށް ހާއްސަ އިސްކަމެއް ދެވޭނެއެވެ.

އިބޯލާ އަކީ ގައިންގަޔަށް އަރާ، ހަށިގަނޑުގެ އެތެރެއަށް ލޭ ފޭބުމަށް މެދުވެރިވާ ނުރައްކާތެރި ބައްޔެކެވެ. މި ބަލި ފެތުރެނީ ބަލިޖެހިފައިވާ މީހެއްގެ ލޭ ނުވަތަ ހަށިގަނޑުން ބޭރުވާ ތެތްކަމެއްގެ ޒަރީއާއިންނެވެ. ބަލި ޖެހުމަށްފަހު އޭގެ އަލާމާތްތައް ފެންނަން 21 ދުވަސް ނަގާފާނެ ކަމަށް ސިއްހީ މާހިރުން ބުނެއެވެ. މިހާތަނަށް އިންޑިއާއިން މި ބައްޔަށް ޝައްކު ކުރެވޭ މީހުން ފެނިފައިވީ ނަމަވެސް، އެންމެންވެސް ވަނީ ބައްޔަށް ނެގެޓިވް ވެފައެވެ. އެހެންނަމަވެސް، ރައްކާތެރިކަމުގެ ގޮތުން އެފަދަ ފަރާތްތައް ކަރަންޓީނު ކުރުމުގެ މަސައްކަތް އިންޑިއާގައި ދަނީ ކުރަމުންނެވެ.

ކޮންގޯގައި މިހާރު ފެތުރެމުންދާ އިބޯލާގެ ބާވަތަށް އަދި ވަކި ހާއްސަ ވެކްސިނެއް އުފެއްދިފައެއް ނުވެއެވެ. މި ބަލީގައި މިހާތަނަށް 260 އަށްވުރެ ގިނަ މީހުން މަރުވެފައިވާތީ، ބައިނަލްއަގުވާމީ ދަތުރުފަތުރުގައި މިފަދަ ހަރުކަށި ފިޔަވަޅުތައް އެޅުމަށް ގައުމުތަކުން ވަނީ ފަށާފައެވެ.