ރައްޔިތުންނަށް ވެވަޑައިގެންނެވި ހުރިހާ ވަޢުދެއް ޝާއިޢުކުރައްވަން ކެރިވަޑައިގަތް ފުރަތަމަ ރައީސަކީ ޑރ. މުޢިއްޒު: މިނިސްޓަރ ސަޢީދު

ދިވެހިރައްޔިތުންނަށް ވެވަޑައިގެންނެވި ހުރިހާ ވަޢުދުފުޅުތަކެއް އެއްކުރައްވައި ފޮތެއްގެ ސިފައިގައި ޝާއިޢުކުރައްވަން ކެރިވަޑައިގަތް ފުރަތަމަ ރައީސަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.

މިނިސްޓަރ ސަޢީދު ވިދާޅުވީ، ރައީސް ޑރ. މުޢިއްޒު އެކަން އެގޮތަށް ކުރެއްވީ ނުހަނު ހާމަކަމާއި ތެދުވެރިކަމާއެކު، އެ ވަޢުދުތައް ފުއްދެވުމުގެ ސާފު ހެޔޮ ނިޔަތުގައި ކަމަށެވެ. މިއީ މީގެ ކުރީގެ އެއްވެސް ވެރިއަކު ކުރައްވާފައި ނުވާފަދަ ހިތްވަރުގަދަ އަދި ޒިންމާދާރު ނިންމެވުމެއްކަން މިނިސްޓަރ ފާހަގަކުރެއްވިއެވެ.

ރައީސް ޑރ. މުޢިއްޒު މިއަދުގެ ވަރަށް ގިނަ ވަގުތު ޚާއްޞަކުރެއްވީވެސް ސަރުކާރުގެ މަޝްރޫޢުތަކާއި ވަޢުދުތަކުގެ އަދާހަމަ ބެއްލެވުމަށް ކަމަށް މިނިސްޓަރ ސަޢީދު ވިދާޅުވިއެވެ. އެގޮތުން، ކޮންމެ މަޝްރޫޢެއްގެ އަދާހަމަ ރައީސް އަމިއްލަފުޅަށް ބައްލަވައި، ކަންކަން ނިމެމުންދާ މިންވަރު ވަޒަންކުރެއްވި ކަމަށާއި، މަޝްރޫޢުތައް ކުރިއަށް ގެންދިއުމުގައި އެއްވެސް ދައްޗެއް އޮތް ނަމަ، އެކަމަށް ޙައްލު ހޯއްދަވައިދެއްވުމަށް ސީދާ ރައީސުލްޖުމްހޫރިއްޔާ އިސްނެންގެވި ކަމަށް މިނިސްޓަރ ވިދާޅުވިއެވެ.

މީގެއިތުރުން، ކޮންމެ ވަޢުދަކާ ގުޅޭ މަސައްކަތްތަކުގައި ޝާމިލްވާ ހުރިހާ ޒިންމާދާރު ފަރާތްތަކާ އެއް ޙާޒިރުގައި ބައްދަލުކުރައްވައި، ރައްޔިތުންނަށް ކޮށްދެއްވަން ހުރި ކަންކަމަށް އެންމެ އިސްކަން ދެއްވައިގެން ރައީސް ވަގުތު ޚާއްޞަކުރައްވަނީ އިޚްލާޞްތެރިކަމާއެކު ޤައުމަށް ޚިދުމަތްކުރެއްވުމަށް އެމަނިކުފާނުގެ ހިތްޕުޅުގައި އޮތް ޝައުޤާއި ސަމާލުކަމުގެ ބޮޑުކަމުން ކަމަށް ސަޢީދު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މިފަދަ ހަރުދަނާ އަދި އިޚްލާޞްތެރި މަސައްކަތްޕުޅުތަކަކީ ވެރިކަންކުރާ ޕާޓީއަށްވެސް ލިބިގެންދާ ވަރަށް ބޮޑު ހިތްހަމަޖެހުމެއް އަދި ފަޚުރެއް ކަމުގައި މިނިސްޓަރ ސަޢީދު ވަނީ ފާހަގަކުރައްވާފައެވެ.