2027 އިން 2029 އަށް ލަފާކުރާ މެދު ރާސްތާގެ ބަޖެޓަށް ހުށަހެޅުމުގެ ފުރުސަތު ފިނޭންސް މިނިސްޓްރީން ހުޅުވާލައިފި

2027 ވަނަ އަހަރުން ފެށިގެން 2029 ވަނަ އަހަރުގެ ނިޔަލަށް ސަރުކާރުން ކަނޑައަޅާ މެދު ރާސްތާގެ ބަޖެޓު ތައްޔާރުކުރުމުގެ މަސައްކަތް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސްއިން ފަށައިފިއެވެ.

މި މަސައްކަތުގެ ދަށުން، ދައުލަތުގެ ހުރިހާ މުއައްސަސާތަކަކުން ވެސް ކުރިއަށް އޮތް ތިން އަހަރުގެ ބޭސްލައިން ބަޖެޓު ތައްޔާރުކޮށް ހުށަހެޅުމަށް މިނިސްޓްރީން ވަނީ އަންގާފައެވެ. ބޭސްލައިން ބަޖެޓަކީ މިހާރު ހިނގަމުންދާ މަޝްރޫއުތަކާއި ހަރަކާތްތައް އެ ފެންވަރުގައި ކުރިއަށް ގެންދިއުމަށް ބޭނުންވާނެ މާލީ އަންދާޒާއެކެވެ. މީގެ ތެރޭގައި އަލަށް ފަށާ މަޝްރޫއުތަކާއި، އަލަށް އިތުރުކުރާ މަގާމުތަކަށް ބޭނުންވާ ފައިސާ ނުހިމެނޭނެ ކަމަށް ފިނޭންސް މިނިސްޓްރީން ބުނެފައިވެއެވެ.

މި ބަޖެޓު ތައްޔާރުކުރަންވާނީ ކޮންމެ އިދާރާއަކަށްވެސް ކަނޑައަޅާފައިވާ ބަޖެޓް ސީލިންގްތަކުގެ ތެރޭގައެވެ. އަދި ބަޖެޓު ސާކިއުލާގައި ބަޔާންކޮށްފައިވާ އުސޫލުތަކާ އެއްގޮތަށް އެސް.އޭ.ޕީ ބީ.ޕީ.ސީ (SAP BPC) މޮޑިއުލް މެދުވެރިކޮށް ބަޖެޓު ހުށަހެޅުމަށް ވަނީ އަންގާފައެވެ.

ފިނޭންސް މިނިސްޓްރީން ހާމަކުރި ގޮތުގައި މި މެދު ރާސްތާގެ ބަޖެޓުގެ މައިގަނޑު މަގްސަދަކީ ދައުލަތުގެ މާލީ ދެމެހެއްޓެނިވިކަން ކަށަވަރުކުރުމާއި، ދައުލަތުގެ ހަރަދުތައް އިތުރަށް ހަރުދަނާކޮށް، ރައްޔިތުންނަށް ދެވޭ އިޖުތިމާއީ އަދި އަސާސީ ހިދުމަތްތަކުގެ ފެންވަރު ރަނގަޅުކުރުމެވެ. ހާއްސަކޮށް އެންމެ ބޮޑަށް އެހީތެރިކަން ބޭނުންވާ ފަރާތްތަކަށް އިސްކަންދީގެން ރައްޔިތުންގެ ދިރިއުޅުމުގެ ފެންވަރު މަތިކުރުމަށް މި ބަޖެޓުގައި އިސްކަންދޭނެއެވެ.

ހަރަދު ކުޑަކުރުމަށް ހާއްސަ ފިޔަވަޅުތަކެއް

އައު ބަޖެޓު އެކުލަވައިލާއިރު ހަރަދު ކުޑަކުރުމަށް ގިނަ ފިޔަވަޅުތަކެއް އެޅުމަށް ވަނީ އިރުޝާދު ދީފައެވެ. އޭގެ ތެރޭގައި:

• މުވައްޒަފުންގެ ހަރަދުތައް ބަލަންވާނީ މި މަހުގެ ނިޔަލަށް އައްޔަންކޮށްފައިވާ ނުވަތަ ހުއްދަދީފައިވާ މަގާމުތަކަށް އެކަންޏެވެ. އިތުރުގަޑީގެ ފައިސާއާއި އެލަވަންސްތައް ހިމަނަންވާނީ މިހާރު ދެމުންދާ ރޭޓުންނެވެ.

• ރަސްމީ ދަތުރުތައް ކޮންމެހެން ކުރަންޖެހޭ ދަތުރުތަކަށް އެކަނި މަދުކޮށް، އެންމެ ހަރަދު ކުޑަވާނެ ގޮތަށް ރޭވުން.

• އޮފީސްތަކުގެ އަހަރީ ދުވަހުގެ ހަފުލާތަކާއި އެފަދަ އެހެނިހެން މުނާސަބަތުތަކަށް ބަޖެޓުގައި ފައިސާ ނުޖެހުން.

• މަރާމާތުގެ މަސައްކަތްތަކަށް ފައިސާ ކަނޑައަޅަންވާނީ ހިދުމަތް މެދުނުކެނޑި ކުރިއަށް ގެންދިއުމަށް ކޮންމެހެން ބޭނުންވާ މިންވަރަށެވެ.

ފިނޭންސް މިނިސްޓްރީން ބުނީ ހުރިހާ އިދާރާތަކުން ވެސް 20 އޯގަސްޓް 2026 ވާ ބުރާސްފަތި ދުވަހުގެ މެންދުރުފަހު 2:00 ގެ ކުރިން ބޭސްލައިން ބަޖެޓު ހުށަހަޅަންޖެހޭނެ ކަމަށެވެ. އަދި މި މުއްދަތުގެ ތެރޭގައި ބަޖެޓު ހުށަނާޅާ އިދާރާތަކުގެ ބަޖެޓު، މިނިސްޓްރީން ކަނޑައަޅާ އުސޫލެއްގެ ތެރެއިން ތައްޔާރުކުރާނެ ކަމަށްވެސް އެ މިނިސްޓްރީން ވަނީ ހާމަކޮށްފައެވެ.