ޗައިނާގެ ބައިނަލްއަޤްވާމީ އިންވެސްޓްމަންޓް ފެއަރގައި ބައިވެރިވުމުގެ ފުރުސަތު ދިވެހި ކުންފުނިތަކަށް ހުޅުވާލައިފި

ޗައިނާގެ ޒިއަމެންގައި މިއަހަރު ބޭއްވުމަށް ހަމަޖެހިފައިވާ 26 ވަނަ "ޗައިނާ އިންޓަނޭޝަނަލް ފެއަރ ފޯ އިންވެސްޓްމަންޓް އެންޑް ޓްރޭޑް" ގައި ބައިވެރިވުމުގެ ފުރުސަތު ދިވެހިރާއްޖެއަށް ހުޅުވާލެވިފައިވާ ކަމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން ހާމަކޮށްފިއެވެ.

މިނިސްޓްރީން މައުލޫމާތު ދެއްވި ގޮތުގައި، ޗައިނާ ސަރުކާރުގެ މިނިސްޓްރީ އޮފް ކޮމާސް އިން އިންތިޒާމުކޮށްގެން ކޮންމެ އަހަރަކު ބާއްވާ މި ބައިނަލްއަޤްވާމީ އިންވެސްޓްމަންޓް މައުރަޒު މިއަހަރު ކުރިއަށްދާނީ ސެޕްޓެމްބަރު މަހުގެ 8 އިން 11 އަށެވެ. މި މައުރަޒުގައި ރާއްޖޭގެ ކުންފުނިތަކާއި، އެކި ސިނާއީ މަސައްކަތްތަކުގައި ހަރަކާތްތެރިވާ ފަރާތްތަކުން ބައިވެރިވުމަށް މައުރަޒު އިންތިޒާމުކުރާ ފަރާތުން ވަނީ ރަސްމީކޮށް ދައުވަތު އަރުވާފައެވެ.

މި މައުރަޒު ބޭއްވުމުގެ މައިގަނޑު މަޤްސަދަކީ އަމަލީ ގޮތުން ކުރެވޭ އިންވެސްޓްމަންޓްތަކަށް އެކަށީގެންވާ މާހައުލެއް ހޯދައިދިނުމާއި، އިންވެސްޓްމަންޓްތަކާ ގުޅުންހުރި ސިޔާސަތުތަކާ ބެހޭގޮތުން މަޝްވަރާކުރުމުގެ ފުރުސަތު ފަހިކޮށްދިނުމެވެ. މީގެ އިތުރުން، ވިޔަފާރިތަކުގެ މެދުގައި ބޭއްވޭ ބައްދަލުވުންތަކާއި، އިންވެސްޓްމަންޓް ސެމިނާރތަކުގެ އިތުރުން ތަފާތު މަޝްރޫއުތައް ދައްކާލުމަށް ބާއްވާ ހަރަކާތްތަކުގައި ބައިވެރިވުމުގެ ފުރުސަތުވެސް ބައިވެރިންނަށް ލިބިގެންދާނެއެވެ.

އިކޮނޮމިކް މިނިސްޓްރީން ވިދާޅުވީ، މި މައުރަޒުގައި ބައިވެރިވުމަށް ޝައުގުވެރިވާ ފަރާތްތަކުން މައުރަޒުގެ ރަސްމީ ވެބްސައިޓް މެދުވެރިކޮށް އޮންލައިންކޮށް އެޕްލިކޭޝަން ފުރިހަމަކުރަންޖެހޭނެ ކަމަށެވެ. އަދި އެޕްލިކޭޝަން ފުރިހަމަކުރުމަށްފަހު، ބައިވެރިވާކަމުގެ މައުލޫމާތު މިނިސްޓްރީގެ އީމެއިލް އެޑްރެހަށް ފޮނުވުމަށްވެސް ވަނީ އެދިފައެވެ.

މި މައުރަޒަކީ ދިވެހި ވިޔަފާރިތަކަށް ބައިނަލްއަޤްވާމީ މައިދާނުގައި އިންވެސްޓަރުންނާ ބައްދަލުކޮށް، ރާއްޖޭގައި ހުރި ފުރުސަތުތައް ދައްކާލުމަށް ލިބޭ އަގުހުރި ފުރުސަތެއްކަމަށް ފާހަގަކުރެވެއެވެ. މައުރަޒާ ގުޅޭ އިތުރު ތަފްސީލުތައް ޗައިނާ އިންޓަނޭޝަނަލް ފެއަރ ފޯ އިންވެސްޓްމަންޓް އެންޑް ޓްރޭޑްގެ ރަސްމީ ވެބްސައިޓުން ލިބެން ހުންނާނެއެވެ.