ކުޑަކުދިންގެ ޙައްޤުތަކުގެ ޢަމަލީ ނަތީޖާ ފެންނާނީ މަޝްވަރާތަކަށްފަހު ގެނެވޭ ހެޔޮ ބަދަލުތަކުން: މެޑަމް ސާޖިދާ

ކުޑަކުދިންގެ ޙައްޤުތަކާ ގުޅޭގޮތުން ކުރެވޭ ޤައުމީ މަޝްވަރާތަކުގެ ޙަޤީޤީ ނަތީޖާ ފެންނާނީ ހަމައެކަނި ދެކެވޭ ވާހަކަތަކަކުން ނޫން ކަމަށާއި، އެ މަޝްވަރާތަކަށްފަހު ޢަމަލީ ގޮތުން ގެނެވޭ ހެޔޮ ބަދަލުތަކުން ކަމުގައި ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

އެކަމަނާ މިފަދައިން ވިދާޅުވީ، މިނިސްޓްރީ އޮފް ހެލްތާއި، ފެމިލީ އެންޑް ވެލްފެއާ ގުޅިގެން އިންތިޒާމުކުރި ޤައުމީ ކުޑަކުދިންގެ ދުވަހުގެ "މަޝްވަރާ" ފޯރަމް އިފްތިތާޙްކޮށްދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ފޯރަމަކީ ކުޑަކުދިންގެ ރައްކާތެރިކަމާއި ޙައްޤުތައް ކަށަވަރުކުރުމަށް ހުރި ގޮންޖެހުންތަކާ މެދު މަޝްވަރާކޮށް، ހައްލު ހޯދުމަށް ބޭއްވުނު މުހިންމު ބައްދަލުވުމެކެވެ.

ރައީސުލްޖުމްހޫރިއްޔާގެ އަނބިކަނބަލުންގެ ވާހަކަފުޅުގައި، ކުދިންނަށް އަޅާލުމަކީ ހަމައެކަނި ޒަރޫރީ ބޭނުންތައް ފުއްދައިދިނުން ނޫންކަން ފާހަގަކުރެއްވިއެވެ. އޭގެ ބަދަލުގައި، ކުދިންގެ ވިސްނުން ތަރައްޤީކުރުމާއި، ޚުލްޤު ހެޔޮ ދަރިންތަކަކަށް ހެދުމުގެ އިތުރުން، އެކުދިންގެ ހިތްތަކުގައި އީމާންތެރިކަމާއި، ހަމްދަރުދީއާއި، ސާބިތުކަން އަށެގެންނެވުމަށް މަސައްކަތް ކުރުމަކީ ކޮންމެހެން ބޭނުންތެރި ކަމެއް ކަމުގައި އެކަމަނާ ވިދާޅުވިއެވެ. އަދި ޙަޤީޤީ ރައްކާތެރިކަން ފެންނާނީ ގޭތެރެއާއި، ސުކޫލުތަކާއި، މުޖުތަމަޢުގައި ދެމެހެއްޓޭ ހަރުދަނާ އުސޫލުތަކުގެ ސަބަބުން ކަމަށްވެސް ފާހަގަކުރެއްވިއެވެ.

މީގެ އިތުރުން، ކުދިންނަށް އޯގާތެރިކަމާއި އިހުތިރާމް ލިބޭނެ ފަދަ މާހައުލެއް ބިނާކުރުމަށް މައިންބަފައިންނަށާއި މުދައްރިސުންނަށް އެކަމަނާ އިލްތިމާސްކުރެއްވިއެވެ. ކުދިންނަށް ކުރިމަތިވާ އަނިޔާއާއި އިހުމާލަކީ ގިނަ ފަހަރަށް ހަނުހިމޭންކަމުގެ ތެރޭގައި ހިނގާ ކަންކަން ކަމަށް ވިދާޅުވެ، މުޖުތަމަޢުގެ ހުރިހާ އަފްރާދުން ފާރަވެރިވުމަށާއި، ކުދިންގެ ވާހަކަތައް ކަނުލާ އެހުމަށް އެކަމަނާ ބާރުއެޅުއްވިއެވެ.

ޓެކްނޮލޮޖީގެ ސަބަބުން ކުރިމަތިވާ ގޮންޖެހުންތަކަށް އަލިއަޅުއްވާލައްވަމުން މެޑަމް ސާޖިދާ ވިދާޅުވީ، ޑިޖިޓަލް މާހައުލުގައި ކުދިންނަށް ޒިންމާދާރުކަމާއެކު މަގުދައްކައިދޭން ޖެހޭ ކަމަށެވެ. އަދި ޓެކްނޮލޮޖީގެ ކުރިއެރުންތައް ހޯދަންވާނީ ކުދިންގެ ރައްކާތެރިކަމާއި، މައުސޫމުކަމާއި، ނަފްސާނީ ދުޅަހެޔޮކަން ޤުރުބާންނުކޮށް ކަމުގައި އެކަމަނާ ނަސޭހަތްތެރިވެވަޑައިގެންނެވިއެވެ.

ސަރުކާރުން ކުޑަކުދިންގެ ރައްކާތެރިކަމަށް ކުރަމުންދާ މަސައްކަތްތަކުގެ މައްޗަށް ބައްލަވާލައްވަމުން، "ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޮންސް ޓު ވައިލެންސް އެގެއިންސްޓް ޗިލްޑްރަން 2024-2028" އާއި، ކުޑަކުދިންގެ ހޮޓްލައިން 1412، އަދި އަންހެނުންނާއި ކުޑަކުދިންނަށް ޚާއްޞަ ހޮސްޕިޓަލެއް އެޅުމުގެ މަޝްރޫޢު އެކަމަނާ ފާހަގަކުރެއްވިއެވެ. ހަމައެއާއެކު، އުމުރުން 16 އަހަރުން ދަށުގެ ކުދިން ސޯޝަލް މީޑިއާ ބައެއް ޕްލެޓްފޯމްތަކަށް ވަނުން މަނާކުރުމަށް ސަރުކާރުން ނިންމާފައިވާ ނިންމުމަކީ ކުދިންގެ ރައްކާތެރިކަމަށް އެޅޭ މުހިންމު ފިޔަވަޅެއްގެ ގޮތުގައި އެކަމަނާ ސިފަކުރެއްވިއެވެ.

މި ރަސްމިއްޔާތުގައި، ކުޑަކުދިންގެ ޙައްޤުތަކާއި ތަރައްޤީއަށް ޚާއްޞަކޮށްގެން ތައްޔާރުކޮށްފައިވާ މަޖައްލާއެއްވެސް ރައީސުލްޖުމްހޫރިއްޔާގެ އަނބިކަނބަލުން ވަނީ އިފްތިތާޙްކޮށްދެއްވާފައެވެ. އެކަމަނާ ވިދާޅުވި ގޮތުގައި މިފަދަ މަސައްކަތްތަކުގެ ސަބަބުން މުޖުތަމަޢުގެ ހޭލުންތެރިކަން އިތުރުވެ، ކުޑަކުދިން ރައްކާތެރިކުރުމުގެ ޤާބިލުކަން އިތުރުވެގެންދާނެއެވެ.