ޖައިކާގެ ރެޒިޑެންޓް ރިޕްރެޒެންޓޭޓިވް އާ އިޖުތިމާއީ އަދި ޢާއިލީ ތަރައްޤީއާ ބެހޭ ވުޒާރާއިން ބައްދަލުކޮށްފި

ޖަޕާން އިންޓަރނޭޝަނަލް ކޯޕަރޭޝަން އޭޖެންސީ (ޖައިކާ) އާއި އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބައްދަލުކޮށްފިއެވެ.

މި ބައްދަލުވުމުގައި ބައިވެރިވެވަޑައިގަތީ ޖައިކާގެ ފަރާތުން ރެޒިޑެންޓް ރިޕްރެޒެންޓޭޓިވް ޓާކީ މޯޓޯއާއި ޕްރޮޖެކްޓް އޮފިސަރ ހަލީމަތު ނަޖުލާ އަހްމަދެވެ. އަދި އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާގެ ފަރާތުން ބައިވެވަޑައިގަންނަވާފައިވަނީ ޑެޕިއުޓީ މިނިސްޓަރ އައިމިނަތު ނަމްޒާއާއި، ޕްރޮގްރާމް އޮފިސަރ އައިޝަތު ސާހާ ސޮބާހްއާއި އިންޓަރނޭޝަނަލް ރިލޭޝަންސް އޮފިސަރ އައިމިނަތު އާނިމާއެވެ.

މި ބައްދަލުވުމުގައި، ޖައިކާއަކީ އިންސާނީ ވަސީލަތްތައް ތަރައްޤީކުރުމަށް ގިނަ ތަމްރީނު ފުރުޞަތުތައް ހޯއްދަވައިދެއްވާފައިވާ، އަދި މިހާރުވެސް ހޯއްދަވައިދެމުން އަންނަ އޭޖެންސީއެއްކަން ފާހަގަކުރައްވާ ޑެޕިއުޓީ މިނިސްޓަރ އައިމިނަތު ނަމްޒާ ވަނީ ޖައިކާއަށް ޝުކުރު އަދާކުރައްވާފައެވެ. އެއާއެކު، މިފަދަ ފުރުޞަތުތައް މުސްތަޤްބަލުގައިވެސް ފަހިކޮށްދެއްވާނެކަމަށް އުންމީދުކުރައްވާކަމަށް ޑެޕިއުޓީ މިނިސްޓަރ ފާހަގަކުރެއްވިއެވެ.

މިގޮތުން ޖައިކާއިން ކޮންމެ އަހަރަކު ކުރު ތަމްރީނުތައް ހޯއްދަވައިދެއްވާ ދާއިރާތަކުގެ އިތުރުން، މިފަދަ ތަމްރީނުތައް ބޭނުންވާ، މިވުޒާރާގެ މަސައްކަތްތަކާ ގުޅުންހުރި އިތުރު ދާއިރާތަކާ މެދު މި ބައްދަލުވުމުގައި މަޝްވަރާކުރެވުނެވެ.

މިއަދުގެ މި ބައްދަލުވުމުގައި، ޖަޕާނަކީ އިސްރަށްވެހިންނަށް ވަރަށް ޚާއްސަ ސަމާލުކަމެއް ދީގެން ސިޔާސަތުތައް ކަނޑައަޅާފައިވާ ޤައުމަކަށް ވުމާއެކު، ރާއްޖޭގައި އިސްރަށްވެހިންނަށް ޚާއްސަކޮށް އުސޫލުތަކާއި އޮނިގަނޑުތައް އަދި ޕްރޮގްރާމްތައް ކަނޑައެޅުމުގައި ޖަޕާނުގެ ސިޔާސަތުތަކާއި ތަޖުރިބާތަކުގެ ބޭނުން ޖައިކާ މެދުވެރިކޮށް ހިފޭނެ މަގުހޯދައިދިނުމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ވަނީ އެދިވަޑައިގެންފައެވެ.

އަދި މީގެ އިތުރުން، އިޖުތިމާޢީ ރައްކާތެރިކަން ކަށަވަރުކުރުމަށް މި ވުޒާރާއިން މަސައްކަތްކުރަމުންދާ އެކި ދާއިރާތަކުން ތަޖުރިބާހުރި ޖަޕާނުގެ ވޮލަންޓިއަރުން މިވުޒާރާއާ ގުޅިގެން މަސައްކަތްކުރުމަކީ މި ދާއިރާއަށް ލިބޭނެ ވަރަށް ބޮޑު ކުރިއެރުމެއްކަމަށް ޑެޕިއުޓީ މިނިސްޓަރ އައިމިނަތު ނަމްޒާ ފާހަގަކުރެއްވިއެވެ. އަދި އެފަދަ ވޮލަންޓިއަރުން ހޯއްދަވައިދެއްވުމަށް މަސައްކަތްކުރައްވާނެކަމުގެ ޔަޤީންކަން ޖައިކާގެ މޮޓޯ ދެއްވެވިއެވެ.

މީގެ އިތުރުން، ނުކުޅެދުންތެރިކަން ހުންނަ ފަރާތްތަކާއި، އެފަރާތްތަކަށް ސިޔާސަތުތަކާއި ޕްރޮގްރާމްތައް އެކުލަވާލުމަށް މަސައްކަތްކުރާ ފަރާތްތަކާއި، ނުކުޅެދުންތެރިކަން ހުންނަ ފަރާތްތަކާއެކު މަސައްކަތްކުރާ ފަރާތްތަކަށް ތަމްރީނުތައް ހޯދައިދިނުމަށްވެސް މަޝްވަރާކުރެވުނެވެ. ވަކިން ޚާއްސަކޮށް ސައިން ލޭންގުއޭޖް ފަދަ ކޯސްތައް ހިންގުމުގައި ޖަޕާނުގެ ތަޖުރިބާތަކުން ރާއްޖެއަށް ފައިދާކުރާނެކަމަށް ޤަބޫލުކުރެވޭތީ، މިދާއިރާއިންވެސް ގުޅިގެން މަސައްކަތްކުރުމަށް މި ބައްދަލުވުމުގައި ވަނީ މަޝްވަރާކުރެވިފައެވެ.