2026 ވަނަ އަހަރުގެ ވޯލްޑް ޓްރެވަލް އެވޯޑްސް އޭޝިއާ ކްރޮސްރޯޑްސް މޯލްޑިވްސްގައި ބޭއްވުމަށް އެއްބަސްވުމެއްގައި ސޮއިކޮށްފި

2026 ވަނަ އަހަރު ބޭއްވުމަށް ހަމަޖެހިފައިވާ "ވޯލްޑް ޓްރެވަލް އެވޯޑްސް (ޑަބްލިއުޓީއޭ) އޭޝިއާ، އޯޝޭނިއާ އެންޑް އިންޑިއަން އޯޝަން" ކްރޮސްރޯޑްސް މޯލްޑިވްސްގައި ބޭއްވުމަށްޓަކައި، ވިޒިޓް މޯލްޑިވްސް ކޯޕަރޭޝަން (ވީއެމްސީ) އާއި ކްރޮސްރޯޑްސް މޯލްޑިވްސްއާ ދެމެދު މުހިންމު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ވިޒިޓް މޯލްޑިވްސް ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝިއުރީއެވެ. ކްރޮސްރޯޑްސް މޯލްޑިވްސްގެ ފަރާތުން ސޮއިކުރެއްވީ ސައި ލެގޫން މޯލްޑިވްސް އަދި ކްރޮސްރޯޑްސް މެރީނާގެ ޖެނެރަލް މެނޭޖަރ އެލެގްޒެންޑަރ ޓްރޭގަރއެވެ.

ދުނިޔޭގެ ފަތުރުވެރިކަމުގެ ދާއިރާގައި ދެވޭ އެންމެ ޝަރަފުވެރި އެއް އެވޯޑް ކަމަށްވާ ވޯލްޑް ޓްރެވަލް އެވޯޑްސް ރާއްޖޭގައި ބޭއްވުމަކީ، އޭޝިއާ، ޕެސިފިކް، އޮސްޓްރޭލިއާ އަދި އިންޑިއާ ކަނޑުގެ ސަރަހައްދުތަކުގެ ފަތުރުވެރިކަމުގެ ދާއިރާގެ އިސް ފަރާތްތައް ރާއްޖެއަށް ޖަމާވާނެ ކަމެކެވެ. ވީއެމްސީން ހާމަކުރި ގޮތުގައި، މި އެވޯޑް ހަފުލާ ރާއްޖޭގައި ބޭއްވުމަކީ ދުނިޔޭގެ ފަތުރުވެރިކަމުގެ މާކެޓުގައި ރާއްޖެއަށް އޮތް މަގުބޫލުކަމާއި އިތުބާރު ހާމަކޮށްދޭ ކަމެކެވެ. އަދި މިއީ ރާއްޖޭގެ ފަތުރުވެރިކަމުގެ އުފެއްދުންތަކާއި ހިދުމަތްތައް ބައިނަލްއަގުވާމީ މައިދާނުގައި އިތުރަށް އިޝްތިހާރު ކުރުމަށް ލިބޭ ރަނގަޅު ފުރުސަތެކެވެ.

އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަދައްކަވަމުން ޝިއުރީ ވިދާޅުވީ، ދުނިޔޭގެ ފެންވަރުގެ މިފަދަ ޝަރަފުވެރި އެވޯޑް ހަފުލާއެއް އަލުން ރާއްޖެއަށް ގެނައުމަކީ ލިބޭ ވަރަށް ބޮޑު ފަޚުރެއް ކަމަށެވެ. އަދި މިއީ ބައިނަލްއަގުވާމީ މައިދާނުގައި ރާއްޖޭގެ ފަތުރުވެރިކަން އޮތް ވަރުގަދަ މަގާމު ދައްކުވައިދޭ ހެއްކެއް ކަމަށް އޭނާ ފާހަގަކުރެއްވިއެވެ. ޝިއުރީ އިތުރަށް ވިދާޅުވީ، މި އެވޯޑް ހަފުލާ ރާއްޖޭގައި ބޭއްވުމުން، ރާއްޖެއަކީ ދުނިޔޭގެ ފެންވަރުގެ މެހެމާންދާރީއާއި، ތަފާތު ތަޖުރިބާތައް ފޯރުކޮށްދޭ މަންޒިލެއްގެ ގޮތުގައި އޮތް އޮތުން އިތުރަށް ވަރުގަދަވެގެންދާނެ ކަމަށެވެ.

ވީއެމްސީން ވަނީ މި އެވޯޑް 2026 ވަނަ އަހަރު ރާއްޖޭގައި ބޭއްވުމަށް ކްރޮސްރޯޑްސް މޯލްޑިވްސްއާއި ވޯލްޑް ޓްރެވަލް އެވޯޑްސް އިން ދެއްވާ އެއްބާރުލުމަށް ޝުކުރު އަދާކޮށްފައެވެ. މި ބައިވެރިވުމަކީ ރާއްޖޭގެ ފަތުރުވެރިކަން ދުނިޔޭގެ ފެންވަރުގައި އިތުރަށް ކުރިއެރުވުމަށް ކުރެވޭ މުހިންމު މަސައްކަތެއް ކަމަށް އެ ކޯޕަރޭޝަނުން ބުނެއެވެ.