"ގްލޯބަލް ސުމޫދު ފްލޮޓިލާ" އަށް އިސްރާއީލުން ދިން ހަމަލާތައް ރާއްޖެއިން ކުށްވެރިކޮށްފި

"ގްލޯބަލް ސުމޫދު ފްލޮޓިލާ" އަށް އިސްރާއީލުން ދިން ހަމަލާތައް ރާއްޖެއިން ކުށްވެރިކޮށްފިއެެވެ.

ދިވެހިރާއްޖެ، ބްރެޒިލް، އުރުދުން، ޕާކިސްތާން، ސްޕެއިން، މެލޭޝިއާ، ބަންގްލަދޭޝް، ކޮލަމްބިއާ، ދެކުނު އެފްރިކާ، ތުރުކީވިލާތް އަދި ލީބިޔާގެ ޚާރިޖީ ވަޒީރުން ވަނީ، ގާޒާގައި ހިނގަމުންދާ އިންސާނީ ކާރިސާއަށް ބައިނަލްއަގުވާމީ މުޖުތަމައުގެ ސަމާލުކަން ހޯދުމަށް މަދަނީ ޖަމިއްޔާތަކުން އިސްނަގައިގެން ކުރިއަށްގެންދިޔަ ސުލްހަވެރި އިންސާނީ އެހީގެ ހަރަކާތެއް ކަމަށްވާ "ގްލޯބަލް ސުމޫދު ފްލޮޓިލާ" އަށް އިސްރާއީލުން ދިން ހަމަލާތައް އެންމެ ހަރުކަށި އިބާރާތުން ކުށްވެރިކުރައްވާފައެވެ.

ބައިނަލްއަގުވާމީ ކަނޑުގެ ސަރަހައްދުގެ ތެރޭގައި އެހީ ހިފައިގެން ދަތުރުކުރި އުޅަނދުފަހަރަށް އިސްރާއީލުން ދިން ހަމަލާތަކާއި، އިންސާނީ އެހީ ފޯރުކޮށްދިނުމަށް މަސައްކަތްކުރާ އެކްޓިވިސްޓުން ގާނޫނާ ހިލާފަށް ހިފަހައްޓާފައިވާ ހިފެހެއްޓުމަކީ، ބައިނަލްއަގުވާމީ ގާނޫނުތަކާއި ބައިނަލްއަގުވާމީ އިންސާނީ ގާނޫނުތަކާ ކަނޑައެޅިގެން ހިލާފު އަމަލުތަކެއް ކަމަށް އެ ވަޒީރުން ފާހަގަކުރެއްވިއެވެ.

އެ އުޅަނދުފަހަރުގައި ތިބި މަދަނީ އެކްޓިވިސްޓުންގެ ސަލާމަތާއި ރައްކާތެރިކަމާ މެދު ޚާރިޖީ ވަޒީރުން ނުހަނު ބޮޑަށް ކަންބޮޑުވުން ފާޅުކުރައްވައި، އެ ފަރާތްތައް ވަގުތުން މިނިވަންކުރުމަށް ބޭނުންވާ އެންމެހައި ފިޔަވަޅުތައް އެޅުމަށް އިސްރާއީލުގެ ކަމާބެހޭ ފަރާތްތަކަށް ވަނީ ގޮވާލައްވާފައެވެ.

މީގެ އިތުރުން، ބައިނަލްއަގުވާމީ ގާނޫނުތައް ނެގެހެއްޓުމަށާއި، އާންމު ރައްޔިތުން ހިމާޔަތްކުރުމަށާއި، މިފަދަ ގާނޫނާ ހިލާފު އަމަލުތައް ހިންގާ ފަރާތްތައް ޒިންމާދާރުކުރުވުމަށްޓަކައި ބައިނަލްއަގުވާމީ މުޖުތަމައުން އަދާކުރަންޖެހޭ އަހުލާގީ އަދި ގާނޫނީ ޒިންމާތައް ފުރިހަމައަށް އަދާކުރުމަށް ވެސް އެ ގައުމުތަކުގެ ޚާރިޖީ ވަޒީރުން ވަނީ ގޮވާލައްވާފައެވެ.