ޙައްޖާޖީންނަށް މޯލްޑިވިއަންއިން ދިން ޚިދުމަތަށް ވަޒީރު ޑރ. ޝަހީމް ތަޢުރީފު ކުރައްވައިފި

1447/2026 ވަނަ އަހަރުގެ ޙައްޖުގެ މަތިވެރި އަޅުކަމަށް ދިޔަ ދިވެހި ޙައްޖާޖީންނަށް، ރާއްޖޭގެ ޤައުމީ އެއަރލައިން "މޯލްޑިވިއަން" އިން ފޯރުކޮށްދިން ފުރިހަމަ ޚިދުމަތްތަކަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ތަޢުރީފު ކުރައްވައިފިއެވެ.

ވަޒީރު ޑރ. ޝަހީމް މިކަމަށް ތަޢުރީފު ކުރެއްވީ އެކްސް ގައި ކުރެއްވި ޕޯސްޓެއްގައެވެ. ވަޒީރުގެ ޕޯސްޓުގައި ވިދާޅުވީ، ޙައްޖާޖީންނަށް މޯލްޑިވިއަންއިން ދިން ފެންވަރު ރަނގަޅު ޚިދުމަތްތަކާމެދު ފަޚުރުވެރިވާ ކަމަށާއި، އެކަމަށްޓަކައި އެ އެއަރލައިނަށް އިޚްލާޞްތެރިކަމާއެކު ޝުކުރު އަދާކުރައްވާ ކަމަށެވެ.

ޙައްޖާޖީންގެ ދަތުރުތައް އަމާންކަމާއި، އަރާމުކަމާއި އަދި އެއްވެސް ދަތިކަމެއް ނެތި އޮމާންކަމާއެކު ކުރިއަށް ގެންދިއުމަށް މޯލްޑިވިއަންގެ މުވައްޒަފުން ދެއްކެވި ފަންނީ ހުނަރާއި، ބެހެއްޓެވި ގާތްކަމާއި، އަދި ކުރެއްވި ބުރަ މަސައްކަތް ވަޒީރު ވަނީ ވަރަށް ބޮޑަށް ފާހަގަކުރައްވާފައެވެ. އަދި މިއީ ވަރަށް މަތިވެރި އިންސާނީ ޚިދުމަތެއްގެ ގޮތުގައިވެސް އެމަނިކުފާނު ސިފަކުރެއްވިއެވެ.

ޑރ. ޝަހީމް އިތުރަށް ވިދާޅުވީ، ދިވެހި ޙައްޖާޖީންނަށް ޚިދުމަތް ކުރުމުގައި މޯލްޑިވިއަންއިން ދައްކަމުންދާ ފުރިހަމަ ނަމޫނާއާއި، ބަހައްޓާ ފަރުވާތެރިކަން ބަލައިގަންނަ ކަމަށެވެ. އަދި މިފަދަ އަގުހުރި ޚިދުމަތްތަކުގެ ސަބަބުން ޤައުމަށާއި ރައްޔިތުންނަށް އިތުރު ކުރިއެރުމާއި ލާބަ ލިބުމަށް އެދިވަޑައިގަންނަވާ ކަމަށްވެސް ވަޒީރުގެ ޕޯސްޓުގައި ވިދާޅުވެފައިވެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޙައްޖާޖީންނަށް ދޭ ޚިދުމަތްތައް ހަރުދަނާކުރުމަށް ކުރަމުންދާ މަސައްކަތުގެ ދަށުން، މޯލްޑިވިއަންއިން ވަނީ ޙައްޖާޖީން އުފުލުމުގައި މުހިންމު ދައުރެއް އަދާކޮށްފައެވެ.