ނުކުޅެދުންތެރިކަން ހުންނަ ފަރާތްތައް ވަޒީފާއަށް ތައްޔާރުކޮށް ނެރުމުގެ މަސައްކަތް ދަނީ ކުރެވެމުން

އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާގައި ވަކި ސެކްޝަނެއް ހަދައިގެން ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ހަމަހަމަ ފުރުސަތުތައް ހޯދައިދިނުމަށް ގިނަގުނަ މަސައްކަތްތަކެއް ކުރެވެމުންދާ ކަމަށް އެ ވުޒާރާގެ ސްޓޭޓް މިނިސްޓަރ އައިޝަތު ޒުހުރުބާން ވިދާޅުވެއްޖެ އެވެ.

ސްޓޭޓް މިނިސްޓަރ ޒުހުރުބާން މިފަދައިން ވިދާޅުވެފައި ވަނީ ފާއިތުވި 9 މަސް ދުވަހު އިޖުތިމާއީ އަދި އާއިލީ ތަރައްގީއާއި ބެހޭ ވުޒާރާއިން ހާސިލްކޮށްފައިވާ މުހިންމު ކާމިޔާބީތަކާއި ގުޅޭގޮތުން ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން ނެވެ.

ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމަށް ކުރެވެމުން އަންނަ މުހިންމު މަސައްކަތްތަކުގެ ތަފްސީލު ހިއްސާ ކުރައްވަމުން ސްޓޭޓް މިނިސްޓަރ ޒުހުރުބާން ވިދާޅުވީ އެ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމަށް ސަރުކާރު ހިއްސާވާ ކުންފުނިތަކާއި އަމިއްލަ ކުންފުނިތަކާއެކު ފަހުނާމާއެއްގެ ދަށުން މަސައްކަތް ކުރެވެމުންދާ ކަމަށެވެ.

އެގޮތުން މިއަހަރުގެ ތެރޭގައި ހިލްޓަން ރިސޯޓް އިން މޯލްޑިވްސް، މޯލްޑިވްސް އެއާޕޯޓް ކޮމްޕެނީ ލިމިޓެޑް އަދި ރޯޑް ޑިވެލޮޕްމަންޓް ކޯޕަރޭޝަނާއެކު ފަހުމު ނާމާއެއްގައި ސޮއިކުރެވި އިންޓާންޝިޕް ފުރުސަތުތައް ނުކުޅެދުންތެރިކަން ހުންނަ ފަރާތްތަކަށް ހޯދައިދެވިފައިވާކަން ސްޓޭޓް މިނިސްޓަރ ފާހަގަކުރެއްވި އެވެ.

ހަމައެއާއެކު ނުކުޅެދުންތެރިކަން ހުންނަ ފަރާތްތަކުގެ ތެރެއިން ވަޒީފާ ބޭނުންވާ ފަރާތްތަކުގެ ދަފްތަރެއް އެކުލަވާލެވި އެ ފަރާތްތަކަށް ވަޒީފާ ހޯދައިދިނުމާއި، ވަޒީފާގެ މާހައުލަށް ތައްޔާރުކުރުމުގެ މަސައްކަތް ކުރެވެމުންދާކަން ފާހަގަކޮށްފައި ވެއެވެ.

އޭގެ އިތުރުން ވަޒީފާއަށް އެދޭ ފަރާތްތަކުގެ އެސެސްމެންޓު ހެދުމާއި، އެ ފަރާތްތަކަށް ޚާއްސަ އެކި ކޯސްތައް ހިންގުމުގެ މަސައްކަތް ވެސް އެ ސެކަޝަނުން ކުރަމުންދާކަން ސްޓޭޓް މިނިސްޓަރ ޒުހުރުބާން ފާހަގަކުރެއްވި އެވެ.

އެކަމަނާ ވިދާޅުވީ ނުކުޅެދުންތެރިކަން ހުންނަ ފަރާތްތަކަށް ފަހިކޮށްދެވޭ މިފަދަ ފުރުސަތުތަކާއި އެކު އެ ފަރާތްތަކަކީ އަބުރުވެރިކަމާއެކު އެހެން އާއިލާތަކެކެވޭ ވެސް އެއްގޮތަށް ދިރިއުޅެވޭނެ ބައަކަށް ހެދިދާނެ ކަމަށެވެ. އަދި އޯގާތެރި މުޖުތަމައަކަށް މި މުޖުތަމައު ހެދޭނީ އެފަދަ ފަރާތްތަކަށް ވެސް ހަމަހަމަ ފުރުސަތުތަކެއް ފަހިކޮށްދެވިގެން ކަމަށް ސްޓޭޓް މިނިސްޓަރ ޒުހުރުބާން ވަނީ ވިދާޅުވެފަ އެވެ.