އިޙުތިރާމު އަދާކުރުމުގެ 5 އަހަރު ދުވަހުގެ ޤައުމީ މަޝްރޫޢުގެ ތަފްޞީލްތައް ސަރުކާރުން ހާމަކުރައްވައިފި

ޒަމާނުއްސުރެ ދިވެހީންގެ ތެރޭގައި އޮތް ރިވެތި އަޚްލާޤާއި ސުލޫކު އަލުން އިޢާދަކުރުމަށްޓަކައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާ "އިޙުތިރާމު އަދާކުރުމުގެ ޤައުމީ މަޝްރޫޢު"ގެ މުހިންމު ތަފްޞީލުތައް ސަރުކާރުން ހާމަކުރައްވައިފިއެވެ.

މި ނިންމެވުމަކީ މި ހިނގާ އޮކްޓޫބަރު މަހުގެ 6 ވީ އާދިއްތަ ދުވަހު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި، މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖުން ހުށަހެޅުއްވި ކަރުދާހުގެ މައްޗަށް ވަޒީރުންގެ މެދުގައި ފުޅާ ދާއިރާއެއްގައި މަޝްވަރާކުރެއްވުމަށްފަހު ނިންމަވާފައިވާ ނިންމެވުމެކެވެ.

މި މަޝްރޫޢަކީ 5 އަހަރު ދުވަހުގެ މުއްދަތަށް މުޅި ރާއްޖެއަށް އަމާޒުކޮށްގެން ހިންގުމަށް ހަމަޖެހިފައިވާ މަޝްރޫޢެކެވެ. މުޖުތަމަޢުގެ ބަދަހިކަމާއި އެކުވެރިކަން ދެމެހެއްޓުމުގެ މަޤްޞަދުގައި ކުރިއަށްގެންދާ މި މަޝްރޫޢުގެ މައިގަނޑު ޝިޢާރެއްގެ ގޮތުގައި ކަނޑައަޅުއްވާފައިވަނީ "އިޙުތިރާމުގެ އުފާ – މުޖުތަމަޢުގެ ނަފާ" އެވެ.

ވަޒީރުންގެ މަޖިލީހުގެ ނިންމެވުމާ އެއްގޮތަށް މި މަޝްރޫޢުގެ އެންމެހައި ކަންކަން ރާވާ، ހިންގާ އަދި ވިލަރެސްކުރުމަށްޓަކައި މި ދާއިރާގެ ތަޖުރިބާކާރު 9 މެންބަރުންގެ މައްޗަށް އެކުލެވޭ ޚާއްޞަ ކޮމިޓީއެއް އެކުލަވައިލުމަށް ވަނީ ނިންމަވާފައެވެ. މި ކޮމިޓީގައި ހިމެނެނީ ދައުލަތުގެ މުހިންމު ވުޒާރާތަކާއި ދަޢުލަތުގެ މީޑިއާއެވެ. އެގޮތުން ހިމެނޭ އިދާރާތަކަކީ:

1. މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް

2. މިނިސްޓްރީ އޮފް ޑިފެންސް

3. މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ

4. މިނިސްޓްރީ އޮފް ފިނޭންސް

5. މިނިސްޓްރީ އޮފް އެޑިޔުކޭޝަން

6. މިނިސްޓްރީ އޮފް އިސްލާމިކް އެފެއާޒް

7. މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސް

8. މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް

9. ޕަބްލިކް ސަރވިސް މީޑިއާ (ޕީ.އެސް.އެމް)

މީގެއިތުރުން، އިޙުތިރާމު ކުރުމުގެ މަތިވެރި ސިފަ މުޖުތަމަޢުގައި އަށަގެންނެވުމުގެ ގޮތުން ޤައުމީ ފެންވަރުގައި އަހަރަކު އެއްފަހަރު "ޤައުމީ އިޙުތިރާމް އަދާކުރުމުގެ ދުވަސް" ފާހަގަކުރުމަށްވެސް ވަޒީރުންގެ މަޖިލީހުން ވަނީ ނިންމަވާފައެވެ. އަދި މި ދުވަހުގެ ގޮތުގައި ކަނޑައަޅާ ދުވަހަކީ މި ޤައުމީ ބޮޑު މަޝްރޫޢު ރަސްމީކޮށް އިފްތިތާޙު ކުރެވިގެންދާނެ ދުވަސް ކަމުގައިވެސް ސަރުކާރުން ވަނީ ހާމަކުރައްވާފައެވެ.