ޕީއެންސީ އެންމެ ކުރީގައި އޮތީ ރައްޔިތުންނާއެކު ވާތީ، ޔާމީން އުޅުއްވަނީ ފިތުނަ އުފައްދަން: މުހައްމަދު އިސްމާއީލް

ސިޔާސީ މައިދާނުގެ އެންމެ އުހުގައި ޕީއެންސީ މިއަދު ފައިތިލަ ސާބިތުކޮށްފައިވަނީ އާންމު ރައްޔިތުންގެ އިހުސާސްތައް ދަންނަ އިޚްލާސްތެރި ލީޑަޝިޕެއް އޮތުމުން ކަމަށާއި، އިދިކޮޅުގައި ހުންނަވައިގެން ކުރީގެ ރައީސް ޔާމީން އަބްދުލްގައްޔޫމް މަސައްކަތްޕުޅު ކުރައްވަނީ މުޖުތަމައު ފަސާދަކުރަން ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަދި ޕީއެންސީގެ ޕީޖީ ގްރޫޕުގެ ޑެޕިއުޓީ ލީޑަރު މުހައްމަދު އިސްމާއީލް ވިދާޅުވެއްޖެއެވެ.

ޕީއެންސީ ހަރުގޭގައި ބޭއްވި ޖަލްސާއެއްގައި ވާހަކަދައްކަވަމުން މުހައްމަދު އިސްމާއީލް ފާހަގަކުރެއްވީ، 77،000 އަށްވުރެ ގިނަ މެންބަރުންގެ ބޮޑު ލަޝްކަރަކާއެކު މި ޕާޓީ ކުރިއަރައި ދިޔައީ އިދިކޮޅު ދަތި އުނދަގޫ ދުވަސްވަރު ވެސް ރައްޔިތުންނާއެކު ވެފައިވާ ގުރުބާނީގެ ސަބަބުން ކަމަށެވެ. އެގޮތުން، ރައްޔިތުންގެ އަޑުއައްސަވައިގެން ވެރިކަން ކުރައްވާ ހަގީގީ ދުރުވިސްނޭ ހަމައެކަނި ލީޑަރަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށާއި، ވޭތުވެދިޔަ ވެރިކަންތަކުގައި ހައްލުނުވެ ދޫކޮށްލާފައިވާ ގަވާއިދާ ޚިލާފަށް އުޅޭ ބިދޭސީންގެ ބޮޑު މައްސަލައަށް މި ސަރުކާރުން މިހާރު ނަތީޖާ ނެރެދެމުންދާ ކަމަށް އޭނާ ވިދާޅުވިއެވެ. މީގެއިތުރުން ފާއިތުވި ފަސް އަހަރުގެ ދައުރުގައި ގައުމަށް އެއްވެސް އިސްލާހެއް ނުގެނެވުނު ފަރާތްތަކަށް ދެންވެސް އެކަން ނުކުރެވޭނެކަން ފާހަގަކުރައްވައި، 2028 ވަނަ އަހަރުގެ ރިޔާސީ ދައުރު ރައީސް މުއިއްޒަށް ކާމިޔާބުކޮށްދިނުމަށް ޕާޓީގެ ސަފުތައް ބަދަހިކުރުމަށް ގޮވާލެއްވިއެވެ.

ރައީސް ޔާމީނަށް ވަރަށް ބޮޑަށް ފާޑުވިދާޅުވަމުން މުހައްމަދު އިސްމާއީލް ވަނީ ޕީޕީއެމްގެ ވެރިކަން ބަދަލުވުމަށްފަހު އިލެކްޝަންސް ކޮމިޝަނުން އެ ޕާޓީ ހިންގުމަށް ދޫކުރި ދައުލަތުގެ ބަޖެޓުގެ ފައިސާ ޚަރަދުކުރީ ރައީސް ޔާމީންގެ އަމިއްލަފުޅު ބޭނުންތަކަށް ކަމަށް ތުހުމަތުކުރައްވާފައެވެ. އެ ފައިސާއިން އެމަނިކުފާނުގެ ޝަރީއަތްތަކަށް ވަކީލުންގެ ފީ ދެއްކުމާއި، ގޭގެ ކަރަންޓު ބިލާއި ދަރިންގެ ކިޔެވުމުގެ ޚަރަދުތައް ހަމަޖެއްސި ކަމަށް ވިދާޅުވިއެވެ.

އަދި 2018 ވަނަ އަހަރު ޕާޓީ މަގުމައްޗަށް ވެއްޓުނު ހިސާބުން ފެށިގެން، ޕާޓީ އަލުން ކޮޅަށް ޖެހުމަށް ރެޔާއި ދުވާލު މަސައްކަތްކުރެއްވީ ރައީސް މުއިއްޒާއި މިހާރުގެ ލީޑަޝިޕް ކަމަށް މުހައްމަދު އިސްމާއީލް ވިދާޅުވިއެވެ. ޕާޓީގެ ސިޔާސީ ހަރަކާތްތަކުގެ ތެރެއިން އޭނާ 45 ދުވަހަށް ޖަލަށްލެވުނުއިރު ޕާޓީގެ ފަރާތުން އާއިލާއަށް އެއްވެސް އެހީތެރިކަމެއް ނުލިބުނު ކަމަށާއި، އޭރު އަނބިދަރިންގެ ހާލު ބަލައި އެހީތެރިވެދެއްވީ ރައީސް މުއިއްޒާއި މިހާރުގެ މަޖިލިސް މެންބަރުން ކަމުގައި ހާމަކުރެއްވިއެވެ.

މުހައްމަދު އިސްމާއީލް އިތުރަށް ވިދާޅުވީ، މިއަދު ރައީސް ޔާމީން އަރިހުގައި ތިއްބެވި ޑރ. ޖަމީލާއި، މަލީހް ޖަމާލާއި، ޕާޕާ އަދި ހުސެއިން ވަހީދު ފަދަ ބޭފުޅުންނަކީ އެ ދަތި އުނދަގޫ ދުވަސްވަރު ޕާޓީއަށް އެއްވެސް ޚިދުމަތެއް ކޮށްދެއްވި ބޭފުޅުން ނޫން ކަމަށެވެ. އަދި އާންމު މެންބަރުން ހަމަނުވާ ޕާޓީއެއް ހައްދަވައިގެން، ގޭގެ ސިޓިންގްރޫމުގައި ތިއްބަވައިގެން ސަރުކާރަށް މަލާމަތްކޮށް ދޮގު ވާހަކަ ފަތުރަމުންދަނީ ހަޔާތުގެ ކަންފުޅެއްވެސް ނެތުމުން ކަމަށާއި، އެއީ ގައުމަށް ހެޔޮއެދޭ ބަޔަކު ކުރާނެ ކަމެއް ނޫން ކަމަށް ވިދާޅުވެ އޭނާ ވަނީ ވަރަށް ބޮޑަށް ފާޑުވިދާޅުވެފައެވެ.