ކުންފުނިތަކުގެ ޚަރަދު ކުޑަކުރުމަށް ފެނަކައާއި އާރުޑީސީ އުވާލައި، ދިރާގާއި އެމްޑަބްލިޔުއެސްސީގެ ހިއްސާ އިތުރުކުރަން ނިންމައިފި

ސަރުކާރު ހިއްސާވާ ކުންފުނިތައް ހިންގުން ހަރުދަނާކޮށް، ޚަރަދުކުޑަ ނިޒާމެއްގެ ދަށުން ރައްޔިތުންނަށް ޚިދުމަތް ފޯރުކޮށްދިނުމަށްޓަކައި ސަރުކާރު ހިއްސާވާ ބައެއް ކުންފުނިތައް އުވާލައްވައި، ކުންފުނިތަކުގައި އޮތް ސަރުކާރުގެ ހިއްސާ އިތުރުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

މި މުހިންމު ނިންމެވުންތައް އެމަނިކުފާނު އިޢުލާންކުރެއްވީ، މިއަދު މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމެއްގައެވެ.

އެގޮތުން، ސަރުކާރުގެ ބޮޑު ދެ ކުންފުންޏެއް އުވާލެއްވުމަށް ނިންމަވާފައިވާކަން ހާމަކުރައްވަމުން ރައީސުލްޖުމްހޫރިއްޔާ ވިދާޅުވީ، ފެނަކަ ކޯޕަރޭޝަން ލިމިޓެޑް އުވާލައްވައި، އެ ކުންފުނިން ދެމުންދިޔަ ޔޫޓިލިޓީގެ ޚިދުމަތްތައް ސްޓް އިލެކްޓްރިކް ކޮމްޕެނީ (ސްޓެލްކޯ) ގެ ދަށަށް ބަދަލުކުރުމަށް ނިންމަވާފައިވާ ކަމަށެވެ. އަދި ހަމައެއާއެކު، ރޯޑް ޑިވަލޮޕްމަންޓް ކޯޕަރޭޝަން (އާރު.ޑީ.ސީ) އުވާލައްވައި، އެ ކުންފުނިން ކުރަމުންދިޔަ މަސައްކަތްތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) ގެ ދަށަށް ބަދަލުކުރުމަށް ނިންމަވާފައިވާ ކަމަށްވެސް ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވި ގޮތުގައި، މި ބަދަލުތަކާއެކު ކުންފުނިތަކުން މުވައްޒަފުން މަދުކުރައްވައި، ކުންފުނިތައް ރަނގަޅު ސައިޒަކަށް ކުޑަކުރެވި، އިސްރާފުވެގެންދާ ޚަރަދުތައް ވަރަށް ބޮޑަށް ކުޑަކުރެވިގެންދާނެއެވެ.

މީގެ އިތުރުން، ދިވެހިރާއްޖޭގެ ގުޅުން (ދިރާގު) އިން ސަރުކާރަށް މެޖޯރިޓީ ހިއްސާ ހޯދުމަށާއި، މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމް.ޑަބްލިޔު.އެސް.ސީ) ގެ ބޭރު ފަރާތަކަށް ވިއްކާލާފައިވާ ހިއްސާ އަލުން ސަރުކާރަށް ހޯދުމުގެ މަސައްކަތް ފައްޓަވާފައިވާކަންވެސް ރައީސް މިއަދު އިޢުލާންކުރެއްވިއެވެ. ވަޒީރުންގެ މަޖިލީހުގެ މަޝްވަރާއާއެކު ނިންމެވި މި ނިންމެވުމުގެ ދަށުން، ކުރިން ދޫކޮށްލާފައިވާ ދިރާގުގެ މެޖޯރިޓީ ހިއްސާ އަލުން ސަރުކާރަށް ނަގައި، އެ ކުންފުންޏަކީ ސަރުކާރުގެ 51 އިންސައްތަ ހިއްސާ އޮތް ކުންފުންޏަކަށް ހެދުމަށް ވަނީ ހަމަޖެހިފައެވެ. އަދި އެމް.ޑަބްލިޔު.އެސް.ސީ އަކީ ސައްތަ އިންސައްތަ ދިވެހި ސަރުކާރުގެ ހިއްސާ އޮންނަ ކުންފުންޏަކަށް ހެދުމުގެ މަސައްކަތްވެސް މިހާރު ވަނީ ފެށިފައެވެ.

ރައީސުލްޖުމްހޫރިއްޔާ ޑރ. މުޢިއްޒު އިތުރަށް ވިދާޅުވީ، މި ބަދަލުތަކާއެކު ކުންފުނިތަކުގެ ހިންގުން މިހާރަށްވުރެ ހަރުދަނާވެގެންދާނެ ކަމަށެވެ. އަދި ސަރުކާރުގެ ހިންގުން ހަރުދަނާކުރުމަށް މިއަދާ ހަމައަށް ގިނަ މަސައްކަތްތަކެއް ކުރެވިފައިވާއިރު، ކުރިއަށް އޮތް ތަނުގައިވެސް ޚަރަދުކުޑަ ނިޒާމެއްގެ ދަށުން ކުންފުނިތައް ހިންގުމަށް ގިނަ ފިޔަވަޅުތަކެއް އަޅުއްވަމުން ގެންދަވާނެ ކަމުގެ ޔަގީންކަން އެމަނިކުފާނު ދެއްވިއެވެ.