ފަލަސްޠީނުގެ މިނިވަންކަމަށާއި ގުދުސްގެ ޙިމާޔަތަށް ބައިނަލްއަޤްވާމީ މައިދާނުގައި ރާއްޖެއިން އަޑުއުފުލައިފި

ފަލަސްޠީނަކީ މިނިވަން އަދި މުސްތަޤިއްލު ދައުލަތެއްގެ ގޮތުގައި ބަލައިގަތުމަށާއި، ގުދުސްގެ މުގައްދަސް ބިންތައް ހިމާޔަތްކުރުމަށް ބައިނަލްއަޤްވާމީ މުޖުތަމަޢަށް ދިވެހިރާއްޖެއިން މިއަދު ގޮވާލައިފިއެވެ.

މިކަމަށް ގޮވާލާފައިވަނީ މިސްރުގެ ކައިރޯގައި މިއަދު ބޭއްވި "2026 ކޮންފަރެންސް އޮން ދަ ކުއެއްޝަން އޮފް ޖެރޫސަލެމް" ގައެވެ. "ޖެރޫސަލަމް: ދަ ފްރޮންޓްލައިން އޮފް ޑިސްޕްލޭސްމަންޓް އެންޑް އެނެކްސޭޝަން އެންޑް ދަ ކީ ޓޫ ޖަސްޓް އެންޑް ލެސްޓިންގ ޕީސް" ގެ ނަމުގައި ބޭއްވި މި ކޮންފަރެންސަކީ ޔޫނައިޓެޑް ނޭޝަންސް ކޮމިޓީ އޮން ދަ އެކްސަރސައިޒް އޮފް ދަ އިނޭލިއަނަބަލް ރައިޓްސް އޮފް ދަ ޕަލަސްޓިނިއަން ޕީޕަލް (ސީ.އީ.އައި.އާރް.ޕީ.ޕީ.) އާއި އޯގަނައިޒޭޝަން ފޯ އިސްލާމިކް ކޯޕަރޭޝަން (އޯ.އައި.ސީ.) ގުޅިގެން ބޭއްވި ބައްދަލުވުމެކެވެ.

މި ބައްދަލުވުމުގައި ދިވެހިރާއްޖޭގެ ފަރާތުން ބައިވެރިވެވަޑައިގެން ތަޤްރީރު ކުރެއްވީ އޯ.އައި.ސީ. އަށް ދިވެހިރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު، އަދި ސައޫދީ އަރަބިއްޔާއަށް ރާއްޖެއިން ކަނޑައަޅުއްވާފައި ހުންނަވާ ސަފީރު އަޙްމަދު ސަރީރުއެވެ.

ސަފީރުގެ ތަޤްރީރުގައި، އިސްރާއީލުގެ އިސްތިއުމާރުގެ ސަބަބުން ފަލަސްޠީނުގެ ރައްޔިތުން ތަހައްމަލު ކުރަމުންދާ ހިތްދަތި ހާލަތަށް އަލިއަޅުއްވާލެއްވިއެވެ. އަދި ބައިނަލްއަޤްވާމީ ޤާނޫނުތަކާއި އިންޓަރނޭޝަނަލް ކޯޓް އޮފް ޖަސްޓިސް (އައި.ސީ.ޖޭ.) ގެ ނިންމުންތަކާ ޚިލާފަށް، ފަލަސްޠީނުގެ ބިންތައް ފޭރުމަށް އިސްރާއީލުން ހިންގަމުންދާ ޣައިރުޤާނޫނީ ޢަމަލުތައް މިހާރުން މިހާރަށް ހުއްޓާލުމަށް ރާއްޖެއިން ވަނީ ބާރުއަޅާފައެވެ.

މީގެ އިތުރުން، ފަލަސްޠީނުގެ ރެފިއުޖީންނަށް އެހީތެރިކަން ފޯރުކޮށްދޭ އދ. ގެ އެޖެންސީ (އަންރުވާ) އިން ކުރަމުންދާ މުހިންމު މަސައްކަތްތައް ފާހަގަކޮށް، އެ އެޖެންސީއަށް ބޭނުންވާ މާލީ އެހީތެރިކަން ފޯރުކޮށްދިނުމަށް ދުނިޔޭގެ ޤައުމުތަކަށް ރާއްޖެއިން އިލްތިމާސްކުރިއެވެ.

ރާއްޖޭގެ ބަޔާނުގައި އިތުރަށް ބަޔާންކޮށްފައިވަނީ، ގުދުސްގެ މުގައްދަސް ބިންތަކުގެ ޤާނޫނީ ހައިސިއްޔަތާއި ތާރީޚީ އަދި ދީނީ މުހިންމުކަން ދެމެހެއްޓޭނީ، 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ޤުދުސްއަކީ ފަލަސްޠީނުގެ ވެރިރަށް ކަމުގައި ހިމެނޭ ގޮތަށް މިނިވަން ދައުލަތެއް ޤާއިމުކޮށްގެން ކަމަށެވެ.

ސީ.އައި.އާރް.ޕީ.ޕީ. އަކީ 1975 ވަނަ އަހަރު އދ. ގެ އާއްމު މަޖިލީހުން އުފެއްދި ކޮމިޓީއެކެވެ. ފަލަސްޠީނުގެ ރައްޔިތުންގެ ޙައްޤުތަކަށް ވަކާލާތުކުރުމުގައި ރައީސް ޑރ. މުޙައްމަދު މުޢިއްޒުގެ ސަރުކާރުން ބައިނަލްއަޤްވާމީ މައިދާނުގައި އަންނަނީ ސާބިތުކަމާއެކު މަސައްކަތް ކުރައްވަމުންނެވެ.