ރައީސުލްޖުމްހޫރިއްޔާގެ އަމިއްލަ ދަތުރުފުޅުތަކަށް ދައުލަތުން އެއްވެސް ޚަރަދެއް ނުކުރައްވާ: ރައީސް އޮފީހުގެ ތަރުޖަމާނު

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވާ އަމިއްލަ ދަތުރުފުޅުތަކަކީ ދައުލަތުގެ ބަޖެޓުން އެއްވެސް ޚަރަދެއް ހިނގާ ކަންކަން ނޫން ކަމަށާއި، އެފަދަ ދަތުރުފުޅުތަކުގެ ހުރިހާ ޚަރަދެއް ބަލަހައްޓަވަނީ ރައީސް އަމިއްލަފުޅަށް ކަމަށް ރައީސް އޮފީހުގެ ތަރުޖަމާނު ވިދާޅުވެއްޖެއެވެ.

"ޕްރެސް ވިތު ދަ ސްޕޯކްސް" ޕްރޮގްރާމުގައި ވާހަކަދައްކަވަމުން ތަރުޖަމާނު ވިދާޅުވީ، ރައީސުލްޖުމްހޫރިއްޔާގެ ދަތުރުފުޅުތަކާ ގުޅޭ މަޢުލޫމާތަކީ މަޢުލޫމާތު ހޯދައި ލިބިގަތުމުގެ ޙައްޤުގެ ދަށުން (އާރު.ޓީ.އައި) ހާމަކުރަމުންދާ މަޢުލޫމާތުތަކެއް ކަމަށެވެ. އެގޮތުން ރައީސް ކުރައްވާ އަމިއްލަ ދަތުރުފުޅުތަކުގެ ޓިކެޓް ޚަރަދާއި، ހުރުމާއި ކެއުންބުއިމުގެ ޚަރަދަކީ ސަރުކާރުން އުފުލާ ޚަރަދުތަކެއް ނޫންކަން ތަރުޖަމާނު ކަށަވަރުކޮށްދެއްވިއެވެ. އަދި ރައީސްގެ އަރިހުގައި ދަތުރުފުޅުގައި ވަޑައިގަންނަވާ ބޭފުޅުންވެސް އެ ބޭފުޅުންގެ އަމިއްލަ ޚަރަދުތައް ކުރައްވަނީ އަމިއްލަ ޖީބުން ކަމަށް އޭނާ ވިދާޅުވިއެވެ.

ދަތުރުފުޅުތަކުގައި ބޭނުންކުރާ ވީ.އައި.ޕީ ޚިދުމަތްތަކާ ގުޅޭގޮތުން ވާހަކަދައްކަވަމުން ތަރުޖަމާނު ވިދާޅުވީ، އެއްވެސް ޤައުމެއްގެ ވީ.އައި.ޕީ ޚިދުމަތެއް އަގުދީގެން ސަރުކާރުން ބޭނުންކޮށްފައި ނުވާނެ ކަމަށެވެ. މިސާލެއްގެ ގޮތުން ޔޫ.އޭ.އީ އަށް ބަލާއިރު، އެ ޤައުމުގައި "އަލް މަޖިލިސް" ގެ ނަމުގައި ޚާއްޞަ ވީ.އައި.ޕީ ތަނެއް އޮންނަކަން ފާހަގަކުރައްވައި، ތަރުޖަމާނު ވިދާޅުވީ އެތަން ހިލޭ ހަމަޖައްސައި ނުދޭނަމަ ރައީސް އެތަން ބޭނުން ނުކުރައްވާ ކަމަށެވެ. ރަސްމީ ދަތުރުފުޅެއްގައި ވަޑައިގެންނެވި ނަމަވެސް އަގުދީގެން އެފަދަ ތަންތަން ބޭނުން ނުކުރައްވާ ކަމަށް އޭނާ ވިދާޅުވިއެވެ.

މީގެ އިތުރުން، އެމްބަސީތަކުން ދޭ ޚިދުމަތްތަކާ ގުޅޭގޮތުން ތަރުޖަމާނު ވިދާޅުވީ، ރައީސުލްޖުމްހޫރިއްޔާ ނުވަތަ ނައިބު ރައީސް ބޭރު ޤައުމަކަށް ވަޑައިގަތުމުން އެ ޤައުމެއްގެ ފޮރިން މިނިސްޓްރީން ނުވަތަ އެމްބަސީން އިސްތިޤުބާލު ކުރުމާއި ކާރުކޮޅު ހަމަޖެއްސުމަކީ އާންމު އުސޫލުން ކުރާ ކަމެއް ކަމަށެވެ. އެއީ އެމްބަސީތަކުގެ ބަޖެޓުން ހަމަޖައްސާ ކަންކަން ކަމަށާއި، ރައީސްގެ އަމިއްލަ ދަތުރުފުޅުގެ ޚަރަދުގެ ތެރޭގައި އެކަން ނުހިމެނޭނެ ކަމަށްވެސް ވިދާޅުވިއެވެ.

ތަރުޖަމާނު އިތުރަށް ވިދާޅުވީ، ރައީސުލްޖުމްހޫރިއްޔާ އާއި ނައިބު ރައީސްގެ އިތުރުން ވަޒީރަކު ބޭރު ޤައުމަކަށް ވަޑައިގަތަސް، ރަޙުމަތްތެރި ޤައުމުތަކުގެ ފޮރިން މިނިސްޓްރީން އަމިއްލައަށް ކާރުކޮޅު ހަމަޖައްސައިދޭ ކަމަށެވެ. އަދި އެފަދަ ދަތުރުފުޅުތަކުގައި ސަފީރުން ދުއްވަން އޮންނަ ކާރު ބޭނުންކުރަން ނުޖެހޭނެ ކަމަށާއި، އެ ޤައުމުތަކުން ކާރުކޮޅު ފޮނުވާނެ ކަމަށްވެސް ތަރުޖަމާނު ވިދާޅުވިއެވެ.