ރާއްޖެއާއި އިންޑިއާގެ އިގްތިސާދީ މުސްތަގުބަލު އޮތީ ފިންޓެކް އަދި އިއާދަކުރަނިވި ހަކަތައިގެ ދާއިރާގައި: ހައިކޮމިޝަނަރު

ރާއްޖެއާއި އިންޑިއާއާ ދެމެދު އޮތް އިގްތިސާދީ ގުޅުން ކުރިއަށް އޮތް ތަނުގައި އެންމެ ބޮޑަށް ބިނާވާނީ މާލީ ޓެކްނޮލޮޖީ (ފިންޓެކް) އާއި އިއާދަކުރަނިވި ހަކަތައިގެ ދާއިރާއިން ލިބޭ ފުރުސަތުތަކުގެ މައްޗަށް ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރު ޖީ. ބާލަސުބްރަމާނިއަން ވިދާޅުވެއްޖެއެވެ.

މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑުން ތައްޔާރުކުރާ "ޓްރޭޑް ޑެސްކް" ޕޮޑްކާސްޓުގައި ވާހަކަދައްކަވަމުން ބާލަސުބްރަމާނިއަން ވިދާޅުވީ، އިންޑިއާގެ ކުންފުނިތަކުން މިހާރުވެސް ރާއްޖޭގެ އެކި ދާއިރާތަކުގައި ބޮޑެތި އިންވެސްޓްމަންޓްތަކެއް ކޮށްފައިވާ ކަމަށެވެ. ހާއްސަކޮށް ފަތުރުވެރިކަމާއި ދަނޑުވެރިކަމުގެ ދާއިރާގައި އިންޑިއާގެ ހިއްސާ ބޮޑުކަން އޭނާ ފާހަގަކުރެއްވިއެވެ.

އެގޮތުން، ބާ އަތޮޅުގައި އިންޑިއާގެ ކުންފުންޏަކުން މިހާރުވެސް ދަނޑުވެރިކަމުގެ ބޮޑު މަޝްރޫއެއް ހިންގަމުންދާ ކަމަށާއި، މިއަހަރުގެ ފަހުކޮޅު އިންޑިއާގެ އިތުރު ކުންފުންޏަކުން ރާއްޖޭގައި އައު އިންވެސްޓްމަންޓެއް ފަށާނެ ކަމަށް އޭނާ ވިދާޅުވިއެވެ. މީގެ އިތުރުން، ފަތުރުވެރިކަމުގެ ދާއިރާގައި އިންޑިއާގެ ހަޔަކަށް ނުވަތަ ހަތް ކުންފުންޏަކުން މިހާރުވެސް އައު ރިސޯޓުތައް ތަރައްގީކުރަމުންދާކަން ހައިކޮމިޝަނަރު ފާހަގަކުރެއްވިއެވެ.

ދެ ގައުމުގެ އިގްތިސާދީ އެއްބާރުލުމުގެ ދެން އޮތް މަރުހަލާއާ ގުޅޭގޮތުން ވާހަކަދައްކަވަމުން ބާލަސުބްރަމާނިއަން ވިދާޅުވީ، ކުރިއަށް އޮތް ތަނުގައި ފަތުރުވެރިކަމާއި ދަނޑުވެރިކަމުގެ އިތުރުން ފިންޓެކް އަދި ހަކަތައިގެ ދާއިރާއަށް އިސްކަންދެވޭނެ ކަމަށެވެ.

"އަޅުގަނޑު ދެކޭގޮތުގައި މުސްތަގުބަލު އޮތީ މާލީ ޓެކްނޮލޮޖީގެ ތެރޭގައި. މީގެ ތެރޭގައި ފިންޓެކް، ހަކަތަ ފޯރުކޮށްދިނުން އަދި އިއާދަކުރަނިވި ހަކަތައިގެ ދާއިރާ ހިމެނޭ. މިސާލަކަށް، ރާއްޖޭގައި ޔޫޕީއައި (UPI) ފަދަ ފިންޓެކް ނިޒާމުތައް ގާއިމުކުރުމަށް އަޅުގަނޑުމެން ދަނީ ދިވެހި ސަރުކާރާއި ޕޭމަންޓް މޯލްޑިވްސްއާ ގުޅިގެން ގާތުން މަސައްކަތް ކުރަމުން،" އޭނާ ވިދާޅުވިއެވެ.

ދެ ގައުމުގެ ދެމެދުގައި އޮތް ވިޔަފާރީގެ ގުޅުން އިތުރަށް ވަރުގަދަކުރުމަށްޓަކައި، އިންވެސްޓްމަންޓްތައް ހިމާޔަތްކުރުމުގެ އެއްބަސްވުމެއް (Bilateral Investment Treaty) ފައިނަލްކުރުމުގެ މަސައްކަތް ކުރަމުންދާ ކަމަށްވެސް އޭނާ ވިދާޅުވިއެވެ. އަދި މިނިވަން ވިޔަފާރީގެ އެއްބަސްވުމެއް (FTA) ގާއިމުކުރުމުގެ މަޝްވަރާތައް ފެށި، އެކަމުގެ "ޓާމްސް އޮފް ރެފަރެންސް" ގައި މިހާރު ސޮއިކުރެވިފައިވާކަން އޭނާ ހާމަކުރެއްވިއެވެ.

ބާލަސުބްރަމާނިއަން ވިދާޅުވި ގޮތުގައި، މިހާރުވެސް ސާކްގެ އޮނިގަނޑުގެ ތެރެއިން މިނިވަން ވިޔަފާރީގެ އެއްބަސްވުމެއް އޮތް ނަމަވެސް، އަލަށް މަސައްކަތް ކުރަމުންދަނީ "ސާފްޓާ ޕްލަސް" ފެންވަރުގެ ދޭދޭ އެއްބަސްވުމެއް ގާއިމުކުރުމަށެވެ. މީގެ ސަބަބުން މުދަލާއި ހިދުމަތް އެކްސްޕޯޓް ކުރުމުގައި ދިވެހިންނަށާއި އިންޑިއާ މީހުންނަށް ދިމާވާ ހުރަސްތަކަށް ހައްލެއް ލިބިގެންދާނެއެވެ.

ރާއްޖޭގެ ފަތުރުވެރިކަމުގެ ދާއިރާއިން އިންޑިއާއަށް އަހަރަކު 300 މިލިއަނާއި 400 މިލިއަން ޑޮލަރާ ދެމެދުގެ ހިދުމަތް ފޯރުކޮށްދޭކަން ފާހަގަކުރައްވައި، ހައިކޮމިޝަނަރު ވިދާޅުވީ މި ދާއިރާ އިތުރަށް ކުރިއެރުވުމުގެ ފުރުސަތު އެބައޮތް ކަމަށެވެ. އަދި މިހާރުވެސް ރާއްޖޭގެ ކަނޑުމަސް އިންޑިއާއަށް ޑިއުޓީއާ ނުލައި އެކްސްޕޯޓް ކުރެވޭއިރު، އައު އެއްބަސްވުމާއެކު ދެ ގައުމުގެ ދެމެދުގައި ކުރެވޭ ވިޔަފާރިއަށް އިތުރު ދޮރުތަކެއް ހުޅުވިގެންދާނެ ކަމަށް އޭނާ ވިދާޅުވިއެވެ.