އައިޔޫއެމްގެ ސަނަބިލް ޕްރޮޖެކްޓަށް ފަންޑު ހޯދައިފި

ދިވެހިރާއްޖޭގެ އިސްލާމިކް ޔުނިވާސިޓީ (އައިޔޫއެމް) އިން ކުރިއަށް ގެންދިޔުމަށް ހަމަޖެހިފައިވާ ސަނަބިލް ޕްރޮޖެކްޓަށް ސުކޫކް އިސްތިސްނާ (އިސްލާމިކް ޕްރޮޖެކް ބޮންޑް)ގެ ދަށުން ފައިސާ ހަމަޖެހިއްޖެއެވެ.

އައިޔޫއެމްގެ ސަނަބިލް ޕްރޮޖެކްޓަކީ ހުޅުމާލޭގައި ފެންވަރު ރަނގަޅު މަތީ ތަޢުލީމު ފޯރުކޮއްދޭ މަރުކަޒެއް ޤާޢިމްކޮށް، އެމަރުކަޒުން ދިވެހިރާއްޖޭގެ އެކި ކަންކޮޅުތަކަށް މަތީ ތަޢުލީމު ހާޞިލުކުރުމުގެ ފުރުސަތު ފަހިކޮއްދިނުމާއި، އާންމު މުޖުތަމަޢުއަށް އިޖްތިމާޢީ، އިޤްތިސާދީ އަދި އެހެނިހެން ކުރިއެރުންތަށް ހޯދައިދިނުމަށް އަމާޒުކޮށް ހިންގުމަށް ހަމަޖެހިފައިވާ ޕްރޮޖެކްޓެކެވެ.

މި އަހަރުގެ ޖޫން މަހުގެ 23 ހުން ފެށިގެން އޮގަސްޓް މަހުގެ 8 ކަށް، އިސްލާމިކް ފައިނޭންސްގެ ސުކޫކް އިސްތިސްނާގެ ދަށުން މި ޕްރޮޖެކްޓްގައި އިންވެސްޓު ކުރުމަށް ހުޅުވައިލެވުނު ފުރުސަތުގައި އެތަށް ބޭފުޅުންނެއް އިންވެސްޓު ކުރައްވާފައިވެއެވެ. އައިޔޫއެމް އިން ވަނީ މި ޕްރޮޖެކްޓަށް އެއްބާރުލުން ދެއްވި އެންމެހާ ފަރާތްތަކުން އިސްލާމިކް ފައިނޭންސްއާއި، މަތީ ތަޢުލީމާއި، ޒުވާން ޖީލުގެ ކުރިއެރުމާއި ދިވެހިރާއްޖޭގެ ތަރައްޤީއަށް ދެއްވާ އަހަމިއްޔަތު ހާމަވާކަން ފާހަކަކުރައްވައި، އެބޭފުޅުންނަށް ޝުކުރުޢަދާކުރައްވާފައެވެ.

މިނިސްޓްރީ އޮފް ހަޔަރ އެޑިޔުކޭޝަން،ލޭބަރ އެންޑް ސްކިލްސް ޑިވެލޮޕްމަންޓްގެ ދަށުން ހިންގާ ދިވެހިރާއްޖޭގެ އިސްލާމިކް ޔުނިވާސިޓީ އިން އަންނަނީ އެ ޔުނިވާސިޓީގެ ފަރާތުން ފޯރުކޮއްދޭ މަތީ ތަޢުލީމުގެ ފެންވަރު ރަނގަޅުކުރުމަށާއި، ދިވެހިރާއްޖޭގެ އެކި ކަންކޮޅުތަކަށް މަތީ ތަޢުލީމުގެ ފުރުސަތު ފަހިކޮއްދިނުމަށް، އެކި މުޢައްސަސާތަކާއި ޖަމިއްޔާ ޖަމާޢަތްތަކާއި، އެކި ރަށްރަށުގެ ކައުންސިލްތަކާއި ގުޅިގެން ތަފާތު އެތަށް ޕޮރޮގްރަމެއް ކުރިއަށް ގެންދަމުންނެވެ.