ފ. ނިލަންދޫ މަސް ފެކްޓްރީއަށް ބޭނުންވާ ބިން ހިއްކުމުގެ މަސައްކަތް ނިމުމަކަށް

ފ. ނިލަންދޫގެ އުތުރު ފަރާތުގައި އަޅާ މަސް ކެނިން ފެކްޓްރީއަށް ބޭނުންވާ ހަތް ހެކްޓަރުގެ ބިން ހިއްކުމުގެ މަސައްކަތް ނިމުމަކާ ގާތްވެފައިވާ ކަމަށް އެ ރަށު ކައުންސިލުން ހާމަކޮށްފިއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްވެރިކަމުގެ ސިނާއަތް ފުޅާކުރުމަށް ކުރަމުންދާ މަސައްކަތުގެ ދަށުން ކުރިއަށްގެންދާ މުހިންމު މަޝްރޫޢެކެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދާ މި މަޝްރޫޢުގެ އަމަލީ މަސައްކަތް ފަށާފައިވަނީ މިއަހަރުގެ މާރިޗު މަހުގައެވެ. ބިން ހިއްކުމުގެ އިތުރުން ބަނދަރު ހެދުމުގެ މަސައްކަތް ވެސް މި މަޝްރޫޢުގެ ތެރޭގައި ހިމެނެއެވެ.

ނިލަންދޫ ކައުންސިލްގެ ރައީސް ޢަލީ އަޙްމަދު ވިދާޅުވީ، ބިން ހިއްކުމުގެ ގާތްގަނޑަކަށް 80 އިންސައްތަ މަސައްކަތް މިހާރު ނިމިފައިވާ ކަމަށެވެ. އަދި ބިން ހިއްކުމުގެ މަސައްކަތާ އެކުއެކީގައި ރިވެޓްމަންޓް ޖެހުމާއި ބަނދަރު ތަރައްޤީކުރުމުގެ މަސައްކަތް ވެސް ބާރުސްޕީޑުގައި ކުރިއަށްދާކަން އޭނާ ފާހަގަކުރެއްވިއެވެ.

މިނިސްޓްރީ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސްއިން ހާމަކޮށްފައިވާ ގޮތުގައި، މި ފެކްޓްރީ އޮޕަރޭޝަނަށް އަންނައިރު ދުވާލަކު 50 ޓަނުގެ މަސް ބަންދުކުރުމުގެ ގާބިލުކަން ހުންނާނެއެވެ. މީގެ އިތުރުން، 1،500 މެޓްރިކް ޓަނުގެ މަސް ރައްކާކުރެވޭ ކޯލްޑް ސްޓޯރޭޖެއް ވެސް މި މަޝްރޫޢުގެ ދަށުން އެ ރަށުގައި ގާއިމުކުރެވޭނެއެވެ.

"މިއީ މި ސަރަހައްދުގެ އިޤްތިޞާދަށް ލިބިގެންދާނެ ވަރަށް ބޮޑު ކުރިއެރުމެއް. ރައްޔިތުން އުންމީދުވެސް ނުކޮށް ތިއްބާ މިފަދަ ބޮޑު މަޝްރޫޢެއް މިވަނީ ފެށިފައި،" ޢަލީ އަޙްމަދު ވިދާޅުވިއެވެ. އޭނާ އިތުރަށް ވިދާޅުވީ، މިހާރު ކުރިއަށްދާ ފުރަތަމަ މަރުހަލާގެ މަސައްކަތްތައް ނިމުމާއެކު، މަޝްރޫޢުގެ ދެން ހުރި ބައިތައް ފެށިގެންދާނެ ކަމުގެ ޔަގީންކަން ލިބިފައިވާ ކަމަށެވެ.

މި މަޝްރޫޢަކީ ރާއްޖޭގެ މަސްވެރިކަމުގެ ސިނާއަތުގައި މަސް ބަންދުކުރާ މިންވަރު އިތުރުކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން، މުޅި ރާއްޖެއަށް އަމާޒުކޮށްގެން ކުރިއަށްގެންދާ ސިނާއީ މަސައްކަތްތަކުގެ ތެރޭގައި ހިމެނޭ މުހިންމު ބައެކެވެ.