އޯއައިސީގެ ކުއްލި ބައްދަލުވުމުގައި ބައިވެރިވެވަޑައިގަތުމަށް ޚާރިޖީ ވަޒީރު ސައޫދީ އަރަބިއްޔާއަށް ފުރާވަޑައިގެންފި

އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ޚާރިޖީ ވަޒީރުންގެ ކައުންސިލުގެ ކުއްލި ބައްދަލުވުމުގައި ބައިވެރިވެވަޑައިގަތުމަށް ދިވެހިރާއްޖޭގެ ޚާރިޖީ ވަޒީރު އިރުތިޝާމް އާދަމް ސައޫދީ އަރަބިއްޔާއަށް ފުރާވަޑައިގެންފިއެވެ. މި ބައްދަލުވުމުގައި މައިގަނޑު ގޮތެއްގައި މަޝްވަރާކުރުމަށް ހަމަޖެހިފައިވަނީ ފަލަސްތީނުގެ އެންމެ ފަހުގެ ހާލަތާ ގުޅޭގޮތުންނެވެ.

މި އޮގަސްޓް މަހުގެ 27 ވަނަ ދުވަހު ސައޫދީ އަރަބިއްޔާގެ ޖިއްދާގައި ހުންނަ އޯއައިސީގެ ޖެނެރަލް ސެކްރެޓޭރިއަޓްގެ މައި އިދާރާގައި ބޭއްވުމަށް ހަމަޖެހިފައިވާ މި ބައްދަލުވުމުގައި، ދިވެހިރާއްޖޭގެ ފަރާތުން މިނިސްޓަރު އިރުތިޝާމް ތަޤުރީރު ކުރައްވާނެއެވެ. މި ތަޤުރީރުގައި ފަލަސްތީނުގެ ރައްޔިތުންގެ ހައްޤުތަކާ ގުޅޭގޮތުން ރާއްޖެއިން ގެންގުޅޭ ސާބިތު ސްޓޭންޑް ތަކުރާރު ކުރައްވާނެ ކަމަށް ބެލެވެއެވެ.

ފުރާވަޑައިގަތުމުގެ ކުރިން ވާހަކަފުޅު ދައްކަވަމުން މިނިސްޓަރު އިރުތިޝާމް ވިދާޅުވީ، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ޢަމަލުތައް ރާއްޖެއިން މި ބައްދަލުވުމުގައި އެންމެ ހަރުކަށި އިބާރާތުން ކުށްވެރިކުރާނެ ކަމަށާއި، އެ ޢަމަލުތަކަށް އިސްރާއީލު ޒިންމާދާރުކުރުވުމަށް ގޮވާލައްވާނެ ކަމަށެވެ. އަދި ޣައްޒާގައި ސުލްހަ ޤާއިމުކުރުމަށް ބައިނަލްއަޤުވާމީ ފެންވަރުގައި ކުރެވެމުންދާ މަސައްކަތްތަކަށް ރާއްޖެއިން އަބަދުވެސް ވަކާލާތު ކުރަމުން ގެންދާނެ ކަމަށްވެސް އެކަމަނާ ވިދާޅުވިއެވެ.

ދިވެހިރާއްޖެއަކީ 1967 ގެ ކުރީގެ ބޯޑަރުތަކުގެ މައްޗަށް ބިނާކޮށް، އިރުމަތީ ޤުދުސްއަކީ ވެރިރަށް ކަމުގައި ކަނޑައަޅައި، ފަލަސްތީނުގެ މިނިވަން އަދި މުސްތަޤިއްލު ދައުލަތެއް ޤާއިމުކުރުމަށް އަބަދުވެސް އެއްބާރުލުން ދެމުން އަންނަ ޤައުމެކެވެ. މިގޮތުން، ދިވެހި ސަރުކާރުން އަބަދުވެސް ދަނީ ބައިނަލްއަޤުވާމީ އެކި މަންސަތަކުގައި ފަލަސްތީނުގެ ރައްޔިތުންގެ ހައްޤުގައި ވަކާލާތު ކުރަމުންނެވެ.

މި ކުއްލި ބައްދަލުވުމުގައި ފަލަސްތީނުގެ މައްސަލައިގެ އިތުރުން، އޯއައިސީގެ އައު ސެކްރެޓަރީ ޖެނެރަލަކު ހޮވުމަށްވެސް ވަނީ ހަމަޖެހިފައެވެ. މި މަޤާމަށް އައު ބޭފުޅަކު އިންތިޚާބު މި ކުރަނީ، 2021 ވަނަ އަހަރުގެ ނޮވެމްބަރު މަހުން ފެށިގެން އެ މަޤާމު ފުރުއްވަމުން ގެންދަވާ ހުސައިން ބްރާހިމް ތާހާގެ ދައުރު މި އަހަރުގެ ނޮވެމްބަރު މަހަށް ހަމަވާތީއެވެ.

މީގެއިތުރުން، އޯއައިސީގެ މެންބަރު ޤައުމުތަކުގެ މަސްލަހަތު ހިމާޔަތްކުރުމަށާއި، އިސްލާމީ ޤައުމުތަކުގެ މެދުގައި އޮންނަ ގުޅުން ހަރުދަނާކޮށް ގުޅިގެން މަސައްކަތްކުރުމާ ގުޅޭގޮތުން، ކުރިއަށް އޮތް މަރުހަލާގައި އެ ޖަމްޢިއްޔާއިން އިސްކަންދޭނެ ކަންކަމާ މެދުވެސް މި ބައްދަލުވުމުގައި މަޝްވަރާކުރެވޭނެއެވެ. މި ދަތުރުފުޅުގެ ހަވާސާގައި، އަރަބި ޤައުމުތަކުގެ ޚާރިޖީ ވަޒީރުންނާ މިނިސްޓަރު އިރުތިޝާމް ބައްދަލުކުރައްވައި ދޭދޭ މަޝްވަރާތައް ކުރިއަށް ގެންދެވުމަށްވެސް ވަނީ ހަމަޖެހިފައެވެ.