ވޯލްޑް ބޭންކުން ރާއްޖެއަށް ލަފާދިނީ ފެންޝަން ނިޒާމު ބަދަލުކުރުމަށް

ރާއްޖޭގެ އިޤްތިސާދު ރަނގަޅުކޮށް ޚަރަދު ކުޑަ ކުރުމަށްޓަކައި ޕެންޝަން ނިޒާމު ބަދަލުކުރުމަށް ވޯލްޑު ބޭންކުން ރާއްޖެއަށް ލަފާދީފިއެވެ.

 ދެކުނު އޭޝިއާގެ ގައުމުތަކާ ބެހޭގޮތުން ރީތިންކިން ސޯޝަލް ޕްރޮޓެކްޝަން އިން ސައުތު އޭޝިއާ: ޓްވާޑްސް ޕްރޮގްރެސިވް އުނިވާސަލިޒަމް ގެ ނަމުގައި މި މަހު ނެރެފައިވާ ތަފްސީލީ ރިޕޯޓެއްގައި ވޯލްޑު ބޭންކުން ލަފާކުރާ ގޮތުގައި 2050 ވަނަ އަހަރާ ހަމަޔަށް މުޅި ދެކުނު އޭޝިއާގައި އުމުރުން ދުވަސްވީ މީހުންގެ އާބާދީ ނިސްބަތުން އެންމެ ބޮޑުވާނީ ރާއްޖޭގައެވެ.

އެގޮތުން އެބޭންކުން ލަފާކުރި ގޮތުގައި 2020 ވަނަ އަހަރުން ފެށިގެން އުމުރުން ދުވަސްވީ މީހުންގެ އަދަދު އިތުރުވެ ހަތަރު ގުނައަށް އިތުރުވާނެ ކަމަަށް ލަފާކުރެއެވެ. އަދި އުމުރުން ދުވަސްވީ މީހުންގެ ނިސްބަތް 32 އިންސައްތައް 2060 ވަނަ އަހަރު އިތުރުވާނެ ކަމަށްވެސް އެރިޕޯޓުގައި ބުނެފައިވެއެވެ. ވޯލްޑް ބޭންކުން ރާއްޖޭގެ ޕެންޝަން ނިޒާމު ބަދަލުކުރުމަށް ލަފާދީފައިވަނީ އުމުރުން ދުވަސްވީ މީހުންގެ ނިސްބަތް އިތުރުވާނެ ކަމަށް ލަފާކޮށްފައެވެ. 

މީގެ އިތުރުން ރިޕޯޓުގައިވާ ތަފާސްހިސާބުތަކުން ދައްކާ ގޮތުން ރާއްޖޭގައި ހިންގާ އިޖުތިމާއީ ރައްކާތެރިކަމުގެ ޕްރޮގްރާމްތަކަށް ހޭދަކުރާ ފައިސާގެ ގާތްގަނޑަކަށް 90 އިންސައްތަ ހަރަދު ކުރަނީ ޕެންޝަން ސްކީމަށެވެ.