މީސްލްސް ފެތުރެމުންދާތީ އައިޖީއެމްއެޗް ގައި "ފީވަރ އެންޑް ރެޝް ހެލްޕް ޑެސްކެއް" ގާއިމްކޮށްފިި

ރާއްޖޭގައި ހިިމަބިހި ނުވަތަ މީސްލްސްގެ ކޭސްތައް އިތުރުވަމުންދާތީ، އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ހާއްސަ "ފީވަރ އެންޑް ރެޝް ހެލްޕް ޑެސްކެއް" ގާއިމްކޮށް ޚިދުމަތް ދޭން ފަށައިފިއެވެ.

މި ހެލްޕް ޑެސްކާ ގުޅޭގޮތުން އައިޖީއެމްއެޗް އިން ބުނީ، މި ޚިދުމަތް ގާއިމްކޮށްފައިވަނީ އެ ހޮސްޕިޓަލުގެ މެއިން އީއާރު (އީއާރު) އެންޓްރަންސް ކައިރީގައިވާ އެމްބިއުލަންސް ޕޯޓިކޯ ސަރަހައްދުގައި ކަމަށެވެ. މި ހެލްޕް ޑެސްކް ކޮންމެ ދުވަހަކު ހެނދުނު 8:00 އިން ރޭގަނޑު 11:00 އަށް ހުޅުވާލެވިފައި ހުންނާނެ ކަމަށް އެ ހޮސްޕިޓަލުން މައުލޫމާތު ދެއެވެ.

ހޮސްޕިޓަލުން އިރުޝާދު ދީފައިވާ ގޮތުގައި، ހުން އައުމާއެކު ހަމުގައި ރަތް ކުލައިގެ ކުދި ބިހިތަކެއް (ރޭޝް) ހުރި ހުރިހާ ފަރާތްތަކުން ސީދާ މި ހެލްޕް ޑެސްކަށް ރިޕޯޓް ކުރަންވާނެއެވެ. މީގެ ތެރޭގައި ކުޑަކުދިންނާއި ބަނޑުބޮޑު އަންހެނުން ވެސް ހިމެނޭ ގޮތަށް، މިފަދަ އަލާމާތްތައް ފެންނަ ހުރިހާ އެންމެން އެ ހެލްޕް ޑެސްކަށް ދިއުމަށް ވަނީ އެދިފައެވެ.

ރޭގަނޑު 11:00 ގެ ފަހުން އަވަސް ފަރުވާއަށް ބޭނުންވާ ފަރާތްތަކަށް ހަމަޖެހިފައިވާ އުސޫލަކީ:

• ބޮޑެތި މީހުންނާއި ބަނޑުބޮޑު އަންހެނުން: މެއިން އެމަޖެންސީ ރޫމުގެ ޓްރިއާޖް ނަރުހަށް މައުލޫމާތު ދިނުން.

• ކުޑަކުދިން: ޕީޑިއެޓްރިކް އެމަޖެންސީ ރޫމުގެ ނަރުހަށް އެކަން އެންގުން.

މީގެ އިތުރުން، ބަލީގެ ނުރައްކާ ކުޑަކުރުމަށާއި ރައްކާތެރިކަމުގެ ފިޔަވަޅެއްގެ ގޮތުން، ހުން އައިސް ރެޝް ހުރެގެން ހޮސްޕިޓަލަށް ދާ އެންމެހާ ފަރާތްތަކުން މާސްކް އެޅުމަށް އައިޖީއެމްއެޗް އިން ވަނީ ހާއްސަ ސަމާލުކަމެއް ދިނުމަށް އެދިފައެވެ.

މި ހެލްޕް ޑެސްކާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާ ފަރާތްތަކުން 3335335 ނަންބަރަށް ގުޅުމަށް އެ ހޮސްޕިޓަލުން އިރުޝާދު ދެއެވެ.