ފިނޭންސް މިނިސްޓަރުގެ މަޤާމަށް ޙަސަން ޒަރީރު ރައީސުލްޖުމްހޫރިއްޔާ އައްޔަންކުރައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިޒަސްގެ މަޤާމަށް އަލްފާޟިލް ޙަސަން ޒަރީރު މިއަދު އައްޔަންކުރައްވައިފިއެވެ.

މި މަޤާމަށް އޭނާ އައްޔަންކުރެއްވުމުގެ ރަސްމިއްޔާތު އޮތީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ. މަޤާމުގެ ފަތްކޮޅު އެރުވުމުގެ ކުރިން، ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު މުޙައްމަދު ސަލީމްގެ ކުރިފުޅުމަތީގައި ޙަސަން ޒަރީރު ވަނީ ވަޒީރުންގެ މަޖިލީހުގެ މެންބަރެއްގެ ހައިސިއްޔަތުން ކުރަންޖެހޭ އިޤުރާރުގައި ސޮއިކުރައްވައި، މަޤާމުގެ ހުވާ ކުރައްވާފައެވެ.

ޙަސަން ޒަރީރަކީ ދައުލަތުގެ މާލީ ނިޒާމާއި، ޓެކްސްއާއި، އޮޑިޓްކުރުން އަދި ކޯޕަރޭޓް ގަވަރނަންސްގެ ދާއިރާއިން 20 އަހަރަށްވުރެ ދިގު މުއްދަތުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. މި މަޤާމަށް އައްޔަންކުރެއްވުމުގެ ކުރިން އޭނާ ހުންނެވީ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމުގައެވެ. މީގެ އިތުރުން އޭނާއަކީ އޯ.އީ.ސީ.ޑީ ގެ ގްލޯބަލް ފޯރަމް އޮން ޓެކްސް ޓްރާންސްޕޭރަންސީގެ އޭޝިއާ އިނީޝިއޭޓިވްގެ ކޯ-ޗެއަރވެސް މެއެވެ.

ތަޢުލީމީ ގޮތުން ބަލާއިރު، ޒަރީރު ވަނީ އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިއާ (އައި.އައި.ޔޫ.އެމް) އިން މާސްޓަރ އޮފް ސައިންސް އިން ފައިނޭންސް އަދި ބެޗްލަރ އޮފް އެކައުންޓިންގ ފުރިހަމަކުރައްވާފައެވެ. އޭނާއަކީ ފައިނޭންސް އަދި މެނޭޖްމަންޓް އެކައުންޓިންގ ދާއިރާއިން އެންމެ މޮޅު ދަރިވަރުގެ ވަނަ ހިމެނޭހެން އެތައް އެކަޑަމިކް އެވޯޑްތަކެއް ހާސިލުކުރައްވާފައިވާ ބޭފުޅެކެވެ.

ޒަރީރު ކުރިން ފުރުއްވާފައިވާ މުހިންމު މަޤާމުތަކުގެ ތެރޭގައި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމާއި، ފިނޭންސް މިނިސްޓްރީގެ ޗީފް ޕަބްލިކް އެކައުންޓްސް އެގްޒެކެޓިވްގެ މަޤާމު ހިމެނެއެވެ. އަދި ބޭންކް އޮފް މޯލްޑިވްސްގެ ބޯޑުގެ ޗެއަރޕާސަންކަމާއި، ވިލާ ގްރޫޕުގެ ގްރޫޕް ޗީފް ކޮމްޕްލަޔަންސް އޮފިސަރުގެ މަޤާމުގެ އިތުރުން ސްޓެލްކޯ، މޯލްޑިވްސް ޕޯސްޓް ލިމިޓެޑް އަދި މޯލްޑިވްސް ނެޝަނަލް އޮއިލް ކޮމްޕެނީ ފަދަ ސަރުކާރުގެ ބޮޑެތި ކުންފުނިތަކުގެ ބޯޑު މެންބަރުކަންވެސް އޭނާ ވަނީ ކުރައްވާފައެވެ.

ޙަސަން ޒަރީރު މި މަޤާމަށް އައްޔަންކުރައްވާފައިވަނީ ދައުލަތުގެ މާލީ މެނޭޖްމަންޓް ހަރުދަނާކުރުމާއި، ޓެކްސްގެ ނިޒާމު އިތުރަށް ތަރައްޤީކުރުމުގެ އިތުރުން ޕަބްލިކް ސެކްޓަރގެ އިޞްލާޙީ ބަދަލުތައް ގެނައުމަށް ސަރުކާރުން ޚާއްޞަ އިސްކަމެއް ދީގެން މަސައްކަތްކުރަމުންދާ ދަނޑިވަޅެއްގައެވެ. އޭނާގެ ތަޖުރިބާގެ އަލީގައި ރާއްޖޭގެ އިޤްތިޞާދީ އަދި މާލީ ސިޔާސަތުތައް ބައްޓަންކުރުމުގައި މުހިންމު ދައުރެއް އަދާކުރައްވާނެ ކަމަށް ބެލެވެއެވެ.