އެމްކިޔުއޭ އިން އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު އާއި ބައްދަލުކުރައްވައިފި

މޯލްޑިވިސް ކޮލިފިކޭޝަން އޮތޯރިޓީ (އެމް.ކިއު.އޭ)ގެ ސީ.އީ.އޯ މަރިޔަމް ފިޒާނާ ރަޝީދު ވަނީ، މިނިސްޓަރ އޮފް އިސްލާމިކް އެފެއާޒް، ޑރ. މުޙައްމަދު ޝަހީމް ޢަލީ ސައީދާއި ބައްދަލުކުރައްވާފައެވެ.

މިނިސްޓްރީ އޮފް އިސްލާމިކް އެފެއާޒްގައި ބޭއްވި މި ބައްދަލުވުމަކީ ޙާފިޒުންނަށް ޙަވާލުކުރެވޭ ސެޓްފިކެޓްތަށް އެމް.އެން.ކިއު.އެފް ލެވެލްއަށް ފެއްތުމާއި ގުޅޭގޮތުން މަޝްވަރާކުރެއްވުމަށް ބޭއްވި ބައްދަލުވުމެކެވެ.

މޯލްޑިވިސް ކޮލިފިކޭޝަން އޮތޯރިޓީ (އެމް.ކިއު.އޭ) އިން ކަނޑައަޅުއްވާފައިވާ އެމް.އެން.ކިއު.އެފް ލެވެލްއަކީ ސެޓްފިކެޓްތަކުގެ ފެންވަރު ދެނެގަތުމަށް ބޭނުންކުރެވޭ ނިޒާމެކެވެ. އެގޮތުން، ޙާފިޒުކަމުން ތަމްރީނުވެ، ސެޓްފިކެޓް ހާޞިލުކުރައްވާ ދަރިވަރުންނަށް ލިބޭ ސެޓްފިކެޓްގެ ފެންވަރު ކަނޑައެޅުމާއި ގުޅިގެން މި ބައްދަލުވުމުގައި މަޝްވަރާކުރެވުނެވެ.

މިބައްދަލުވުމުގައި މިނިސްޓަރ ޑރ. މުޙައްމަދު ޝަހީމް ޢަލީގެ އިތުރުން އެ ވުޒާރާގެ ބައެއް އިސް ބޭފުޅުން ވެސް ވަނީ ބައިވެރިވެވަޑައިގަންނަވާފައެވެ. އަދި މޯލްޑިވިސް ކޮލިފިކޭޝަން އޮތޯރިޓީ (އެމް.ކިއު.އޭ)ގެ ސީ.އީ.އޯ މަރްޔަމް ފިޒާނާ ރަޝީދުގެ އިތުރުން އެމް.ކިއު.އޭގެ އެހެނިހެން އިސްބޭފުޅުން ވެސް ވަނީ ބައިވެރިވެވަޑައިގަންނަވާފައެވެ.

ދިވެހިރާއްޖޭގެ ތަފާތު އެކި ދާއިރާތަކުގައި މަސައްކަތްކުރާ ޒުވާނުން، އެ ޒުވާނަކު ކުރިއަށް ދާން ބޭނުންވާ ދާއިރާތަކުން ސެޓްފިކެޓް ހާޞިލުކޮށް، ކުރިއަށް ދިޔުމަށް އެއްބާރުލުން ދިނުމާއި، އެ ދާއިރާތަކުގައި ހިންގާކޯސްތަކާއި ތަމްރީނުތަކުގެ ފެންވަރު ރަނގަޅުކަން ކަށަވަރުކުރުމަށް، މިނިސްޓްރީ އޮފް ހަޔަރ އެޑިއުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ދަށުން ހިންގާ މޯލްޑިވިސް ކޮލިފިކޭޝަން އޮތޯރިޓީ (އެމް.ކިއު.އޭ) އިން އަންނަނީ އެތަށް މަސައްކަތެއް ކުރައްވަމުންނެވެ.