ކ. ގިރިފުށީގެ ބިން ހިއްކުމުގެ މަޝްރޫޢު ކުރިއަށްދާ ގޮތް ރައީސުލްޖުމްހޫރިއްޔާ ބައްލަވާލައްވައިފި
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ކ. ގިރިފުށީގެ ބިން ހިއްކުމުގެ މަޝްރޫޢު ކުރިއަށްދާ ގޮތް ބައްލަވާލެއްވުމަށް އެ ރަށަށް ޒިޔާރަތްކުރައްވައިފިއެވެ.
މި މަޝްރޫޢަކީ ދިވެހި އަސްކަރިއްޔާ ޒަމާނީކުރުމަށާއި، ސިފައިންގެ ތަމްރީނުތަކަށް ބޭނުންވާ އުމްރާނީ ވަސީލަތްތައް ތަރައްޤީކޮށް ފުޅާކުރުމަށް ރައީސުލްޖުމްހޫރިއްޔާ ގެންގުޅުއްވާ ތަޞައްވުރުގެ ދަށުން ކުރިއަށްގެންދާ މުހިންމު މަސައްކަތެކެވެ. މި މަޝްރޫޢުގެ ތެރޭގައި ގިރިފުށިން ބިން ހިއްކުމާއި، ގޮނޑުދޮށް ހިމާޔަތްކުރުމުގެ އިތުރުން، އެ ރަށުގެ ބަނދަރުގެ ފެންވަރު މަތިކުރުމުގެ މަސައްކަތްތައް ހިމެނެއެވެ.
ރައީސުލްޖުމްހޫރިއްޔާގެ މި ޒިޔާރަތުގައި، މަޝްރޫޢު ކުރިއަށްދާ ސައިޓަށް ވަޑައިގެން، މަސައްކަތްތައް މިހާރު ގޮސްފައިވާ މިންވަރު ވަނީ ބައްލަވާލައްވާފައެވެ. އަދި މި މަސައްކަތްތައް ނިމުމުން، އަސްކަރީ ތަމްރީނުތައް ހިންގުމަށް ބޭނުންވާ ޖާގަ އިތުރުވެ، ސިފައިންގެ ތަމްރީނުތައް މިހާރަށްވުރެ ހަރުދަނާ ނިޒާމެއްގެ ދަށުން ކުރިއަށް ގެންދިއުމަށް މަގުފަހިވެގެންދާނެއެވެ.
ޤައުމީ ދިފާޢީ ބާރުގެ މައި ތަމްރީނު މަރުކަޒު ހުންނަ ގިރިފުށީގެ ތަރައްޤީއަށް ހިންގާ މި މަޝްރޫޢަކީ ރާއްޖޭގެ ދިފާޢީ ދާއިރާ ހަރުދަނާކުރުމަށް ސަރުކާރުން ދެއްވާ އިސްކަމުގެ ތެރެއިން ކުރިއަށްދާ މަސައްކަތެކެވެ. މި ޒިޔާރަތުގައި ރައީސުލްޖުމްހޫރިއްޔާގެ އަރިހުގައި ދައުލަތުގެ އިސް ބައެއް ވެރިން ބައިވެރިވެވަޑައިގެންނެވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
