ޤަޠަރުގެ ކުރީގެ އަމީރު އަވަހާރަވުމާ ގުޅިގެން ރައީސުލްޖުމްހޫރިއްޔާ ތައުޒިޔާ ފޮނުއްވައިފި
ޤަޠަރުގެ ކުރީގެ އަމީރު ހިޒް ހައިނަސް ޝައިޚް ޙަމަދު ބިން ޚަލީފާ އައްޘާނީ އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތައުޒިޔާ ވިދާޅުވެއްޖެއެވެ. ރައީސުލްޖުމްހޫރިއްޔާ މިކަމާ ގުޅޭގޮތުން ތައުޒިޔާގެ މެސެޖު ޝާއިޢުކުރައްވާފައިވަނީ މިއަދު އެކްސް މެދުވެރިކުރައްވައެވެ.
ރައީސުލްޖުމްހޫރިއްޔާގެ މެސެޖުގައި، ޝައިޚް ޙަމަދު ބިން ޚަލީފާ އައްޘާނީ އަވަހާރަވި ޚަބަރު އެއްސެވީ ފުން ހިތާމައާއެކު ކަމަށް ވިދާޅުވެފައިވެއެވެ. އަދި އެމަނިކުފާނަކީ ޤަޠަރުގެ ތަރައްޤީއާއި ކުރިއެރުމަށް ދުރުވިސްނޭ މުހިންމު މަސައްކަތްތަކެއް ކޮށްދެއްވި ލީޑަރެއްކަން ރައީސް ފާހަގަކުރެއްވިއެވެ.
މި ހިތާމަވެރި ދަނޑިވަޅުގައި، ޤަޠަރުގެ މިހާރުގެ އަމީރު ހިޒް ހައިނަސް ޝައިޚް ތަމީމް ބިން ޙަމަދު އައްޘާނީއަށާއި، އެ ޤައުމުގެ ޝާހީ އާއިލާއަށާއި، ސަރުކާރަށް އަދި ޤަޠަރުގެ އަޚުވަންތަ ރައްޔިތުންނަށް ރައީސުލްޖުމްހޫރިއްޔާ އިޚްލާޞްތެރި ތައުޒިޔާ ފޮނުއްވާފައިވެއެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ، މަރްޙޫމް ޝައިޚް ޙަމަދު ބިން ޚަލީފާ އައްޘާނީގެ ފުރާނަފުޅަށް މާތްﷲ ރަޙްމަތްލައްވައި، ސުވަރުގޭގެ އެންމެ މަތީ ދަރަޖަ މިންވަރުކުރެއްވުން އެދި ދުޢާކުރައްވަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
