ޗައިނާގެ ޝިންޝިންގް ކުންފުންޏާ ސަފީރު ފަޒީލް ނަޖީބް ބައްދަލުކުރައްވައިފި

ޗައިނާގެ ސަރުކާރު ހިއްސާވާ ޝިންޝިންގް އިމްޕޯޓް އެންޑް އެކްސްޕޯޓް ކުންފުނީގެ ޑެޕިޔުޓީ ޑިރެކްޓަރ، ޑެނިއެލް ވޭންގް ދިވެހިރާއްޖެ އިން ޗައިނާ އަށް ކަނޑައަޅާފައި ހުންނަވާ ސަފީރު، ޑރ. ފަޒީލް ނަޖީބް ގެ އަރިހަށް އިޙްތިރާމްގެ ޒިޔާރަތެއް ކުރައްވައިފިއެވެ.

ޗައިނާގައި ހުންނަ ދިވެހިރާއްޖޭގެ އެމްބަސީގައި އިއްޔެ ބޭއްވުނު މި ބައްދަލުކުރެއްވުމުގައި، އެ ކުންފުނި މެދުވެރިކޮށް ދެ ގައުމުގެ ދެމެދުގައި ވިޔަފާރީގެ ރޮނގުން މަސައްކަތް ކުރެވޭނެ ދާއިރާތަކާ ގުޅޭގޮތުން ދެ ބޭފުޅުން މަޝްވަރާ ކުރެއްވިއެވެ.

ޗައިނާގެ ޝިންޝިންގް އިމްޕޯޓް އެކްސްޕޯޓް އަކީ މިލިޓަރީ ކޮންސްޓްރަކްޝަނާއި، އިކުއިޕްމަންޓް ލޮޖިސްޓިކްސް އަދި ޑިޖިޓަލް އިންޓިގްރޭޓަޑް ސޮލިޔުޝަންސް ފަދަ އެކި ދާއިރާތަކުން ވިޔަފާރި ކުރާ ކުންފުންޏެކެވެ.