ރައީސް، ވ. ކެޔޮދޫ ޢަބްދުއްލަޠީފް ޙަސަންގެ އަވަހާރަވުމުގެ ހިތާމައިގައި ތަޢުޒިޔާ ދަންނަވައިފި

ދިވެހި ދައުލަތަށް 53 އަހަރަށްވުރެ ދިގު މުއްދަތެއްގައި ޚިދުމަތް ކުރެއްވި، ފެލިދެ އަތޮޅު، ވ. ކެޔޮދޫ، އަލިވާގޭ، ޢަބްދުއްލަޠީފް ޙަސަން އަވަހާރަވުމާ ގުޅިގެން، ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެކްސް ގައި ޕޯސްޓެއް ކުރައްވައި، މަރްޙޫމްގެ ޢާއިލާއަށާއި ފެލިދެ އަތޮޅުގެ ރައްޔިތުންނަށް ތަޢުޒިޔާ ދަންނަވައިފި އެވެ.

ރައީސް އެކްސްގައި ކުރެއްވި ޕޯސްޓުގައި، ފެލިދެ އަތޮޅުވެރިކަމާއި އެ އަތޮޅުގެ އިސް މަޤާމުތަކެއް ފުރުއްވި، ހަރުދަނާ ޝަޚްޞިއްޔަތެއްކަމުގައިވާ ޢަބްދުއްލަޠީފް ޙަސަންގެ ދިގު ޚިދުމަތްތަކަށް ތަޢުރީފު ކުރައްވައި، ދިވެހި ދައުލަތަށް ކޮށްދެއްވި ގިނަގުނަ ޚިދުމަތްތައް ފާހަގަ ކުރެއްވި އެވެ.

ދިވެހި ދައުލަތަށް 53 އަހަރަށްވުރެ ދިގު މުއްދަތެއްގައި ޚިދުމަތް ކުރެއްވި ބޭފުޅަކު ދުނިޔެ ދޫކުރެއްވުމަކީ ޤައުމަށް ލިބިގެންދިޔަ ފުން ހިތާމައެއް ކަމަށް ރައީސްގެ ޕޯސްޓުގައި ފާހަގަ ކުރައްވާފައިވެ އެވެ. އަދި ހިތާމައިގައި ބައިވެރިވެ، ދިރިތިއްބެވި ޢާއިލާ ބޭފުޅުންނަށާއި ފެލިދެ އަތޮޅުގެ ލޮބުވެތި ރައްޔިތުންނަށް ނުހަނު އިޚްލާޞްތެރިކަމާ އެކު ތަޢުޒިޔާ ދަންނަވާ ކަމަށް ރައީސް ވިދާޅުވެފައިވެ އެވެ.