އެމްއެމްޕީއާރުސީ ޚިޔާނާތް: ބައްސާމްގެ މައްޗަށް އިތުރު ދައުވާކުރަނީ

އެމްއެމްޕީއާރުސީގެ ބޮޑު ޚިޔާނާތުގެ ފައިސާގެ ތެރެއިން 29،000 އެމެރިކާ ޑޮލަރު އަމިއްލަ އެކައުންޓަށް ޖަމާކުރި ކަމަށް ތުހުމަތުކުރެވޭ މައްސަލައިގައި، ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް މަނީ ލޯންޑަރިންގެ ދައުވާ ކުރުމަށް އެންޓި-ކޮރަޕްޝަން ކޮމިޝަން (އޭސީސީ) އިން ޕްރޮސިކިއުޓަރ ޖެނެރަލްގެ އޮފީހަށް ފޮނުވައިފިއެވެ.

އޭސީސީން ހާމަކޮށްފައިވާ ގޮތުގައި، މި މައްސަލައަކީ އެމްއެމްޕީއާރުސީ މެދުވެރިކޮށް ދައުލަތަށް ލިބެންޖެހޭ ފައިސާގެ ތެރެއިން، އެސްއޯއެފް ޕްރައިވެޓް ލިމިޓެޑުން ބައްސާމް އަދީލް ޖަލީލްގެ އަމިއްލަ ބޭންކް އެކައުންޓަށް 29،000 ޑޮލަރު (ގާތްގަނޑަކަށް 447,180 ރުފިޔާ) ޖަމާކޮށްފައިވާ މައްސަލައެކެވެ. މި ފައިސާ ބައްސާމްގެ އެކައުންޓަށް ޖަމާކޮށްފައިވަނީ އެމްއެމްޕީއާރުސީގެ ޚިޔާނާތުގެ އަމަލުތައް ހިނގަމުންދިޔަ ދުވަސްވަރުގައެވެ.

ކޮމިޝަނުން ކުރިއަށްގެންދިޔަ ތަހުގީގަށް ފަހު، ބައްސާމްގެ މައްޗަށް މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން ދައުވާކުރުމަށް ވަނީ ނިންމާފައެވެ. އޭސީސީން ބުނީ، އެސްއޯއެފްގެ އެކައުންޓުން ބައްސާމްގެ އެކައުންޓަށް ޖަމާވި މި ފައިސާއަކީ ކުށް ކޮށްގެން ހޯދާފައިވާ ފައިސާކަން އެނގިހުރެ، އެ ފައިސާ ބޭނުންކޮށްފައިވާކަން ތަހުގީގަށް ސާބިތުވާ ކަމަށެވެ.

ބައްސާމްގެ މައްޗަށް މިހާރުވެސް އެފްއޭއެމްގެ ފައިސާއަށް ޚިޔާނާތްތެރިވި ކަމުގެ އެހެން މައްސަލަތަކެއްގައި ކޯޓުގައި ދައުވާތަކެއް އުފުލިފައިވާކަން ފާހަގަކުރެވެއެވެ. އޭގެ ތެރޭގައި އެފްއޭއެމްއަށް ފީފާއިން ދިން ފައިސާ އަމިއްލަ ކަންކަމަށް ބޭނުންކުރި ކަމުގެ ތުހުމަތުތައް ހިމެނެއެވެ.

އެމްއެމްޕީއާރުސީގެ މައްސަލައަކީ ރާއްޖޭގެ ތާރީޚުގައި ހިނގި އެންމެ ބޮޑު ކޮރަޕްޝަންގެ މައްސަލައަށްވާއިރު، މި މައްސަލައިގައި ޝާމިލުވާ ފަރާތްތަކަށް ގާނޫނީ ފިޔަވަޅު އެޅުމަކީ މި ސަރުކާރުންނާއި ކަމާބެހޭ މުއައްސަސާތަކުން އިސްކަންދޭ ކަމެކެވެ. މި މައްސަލައިގައި ދައުވާކުރުމަށް ޕީޖީ އޮފީހަށް ފޮނުވުމާ ގުޅިގެން، ބައްސާމްގެ މައްޗަށް ރަސްމީކޮށް ދައުވާ އުފުލުމާ މެދު ގޮތެއް ނިންމާނީ އެ އޮފީހުންނެވެ.