މާލޭގެ ބޮޑުތަކުރުފާނު މަގު ތަރައްގީކުރުމުގެ މަޝްރޫއު ރައީސުލްޖުމްހޫރިއްޔާ ބައްލަވާލައްވައިފި
މާލޭގެ އުތުރު ފަރާތުގެ ބޮޑުތަކުރުފާނު މަގު އަޕްގްރޭޑް ކުރުމުގެ މަޝްރޫއު ކުރިއަށްދާ ގޮތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބައްލަވާލައްވައިފިއެވެ. މި މަޝްރޫއަކީ މާލޭގެ މަގުތައް މަރާމާތުކޮށް ތަރައްގީކުރުމުގެ ފުރަތަމަ ފިޔަވަހީގެ ދަށުން ކުރިއަށްދާ މުހިންމު މަސައްކަތެކެވެ.
މި ޒިޔާރަތުގައި ރައީސުލްޖުމްހޫރިއްޔާގެ އަރިހުގައި މިނިސްޓަރ އޮފް އިނފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް ޑރ. އަބްދުﷲ މުއްތަލިބާއި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ އިސް ވެރިން ބައިވެރިވެވަޑައިގެންނެވިއެވެ.
މި މަޝްރޫއުގެ ފުރަތަމަ ފިޔަވަހީގެ ދަށުން ތަރައްގީކުރަނީ ރަސްމީ ފާލަމުން ފެށިގެން ހެންވޭރު ފެރީ ޓާމިނަލާ ހަމައަށް އޮތް ފަސް ސަރަހައްދެކެވެ. ރައީސުލްޖުމްހޫރިއްޔާގެ މި ޒިޔާރަތުގައި، މަޝްރޫއުގެ މަސައްކަތްތައް ގޮސްފައިވާ ހިސާބާއި، ކުރިއަށް ހުރި މަރުހަލާތަކާ ބެހޭ މައުލޫމާތު ކަމާބެހޭ އިސް އޮފިޝަލުން ވަނީ އެމަނިކުފާނަށް އަރުވާފައެވެ.
މަސައްކަތުގެ ކޮންޓްރެކްޓަރު އެމްޓީސީސީން ހާމަކުރި ގޮތުގައި، މިހާރު ވަނީ މަގުގައި ތާރު އެޅުމުގެ މަސައްކަތް ފަށާފައެވެ. އެގޮތުން ހެންވޭރު ފެރީ ޓާމިނަލުން ފެށިގެން ފޮރިން މިނިސްޓްރީއާ ހަމައަށް ތާރު އަޅައި މިހާރު ވަނީ ނިންމާލާފައެވެ. އަދި ފޮރިން މިނިސްޓްރީން ފެށިގެން ރަސްމީ ފާލަމާ ހަމައަށް އޮތް ބައިގައި ތާރު އެޅުމުގެ މަސައްކަތް ވަރަށް އަވަހަށް ފެށޭނެ ކަމަށް އެ ކުންފުނިން ބުނެއެވެ.
މި މަޝްރޫއުގެ ދަށުން މަގާ އިންވެގެން އޮތް ހުސްބިން ހިއްކައިގެން، 500 ސައިކަލު ޕާކު ކުރެވޭނެ އާ ޕާކިންގ ސަރަހައްދެއް ތަރައްގީ ކުރުމަށްވެސް ވަނީ ހަމަޖެހިފައެވެ.
އެމްޓީސީސީގެ އަމާޒަކީ މި މަޝްރޫއުގެ ހުރިހާ މަސައްކަތްތަކެއް ނިންމައި، އަންނަ ޖުލައި މަހުގެ 26 ވަނަ ދުވަހަށް މަގު އާންމުންނަށް ހުޅުވާލުމެވެ. ސަރުކާރުން ގަބޫލުކުރާ ގޮތުގައި މި މަގު ތަރައްގީވެގެން ދިއުމާއެކު މާލޭގެ ޓްރެފިކް ފްލޯއަށް ބޮޑު ކުރިއެރުމެއް ލިބި، މަގުތަކުގެ ތޮއްޖެހުމަށް ބޮޑު ލުޔެއް ލިބިގެންދާނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
