ޔޫއޭއީގައި ސޯޝަލް މީޑިއާ ބޭނުންކުރެވޭ އެންމެ ހަގު އުމުރަކީ 15 އަހަރު ކަމަށް ކަނޑައަޅައިފި

ޔުނައިޓެޑް އެރަބް އެމިރޭޓްސް (ޔޫއޭއީ) ގައި ސޯޝަލް މީޑިއާގެ މަންސަތައް އަމިއްލައަށް ބޭނުންކުރެވޭނެ އެންމެ ދަށް އުމުރަކީ 15 އަހަރު ކަމަށް އެ ގައުމުގެ ސަރުކާރުން ނިންމައިފިއެވެ. ޔޫއޭއީގެ ކެބިނެޓުން މި ޤަވާއިދު ފާސްކުރީ ޑިޖިޓަލް ވަސީލަތްތަކުގެ ސަބަބުން ކުޑަކުދިންނާއި ފުރާވަރުގެ ކުދިންނަށް ކުރިމަތިވާ ނުރައްކާތަކުން އެކުދިން ސަލާމަތްކޮށް، އިންޓަނެޓްގެ ރައްކާތެރިކަން އިތުރުކުރުމުގެ މަޤްސަދުގައެވެ.

އަލަށް އަމަލުކުރަން ފަށާ މި އުސޫލުގެ ދަށުން، 15 އަހަރު ނުފުރޭ ކުދިން ސޯޝަލް މީޑިއާގައި އެކައުންޓް ހަދައިގެން ޕޯސްޓްކުރުމާއި، ކޮމެންޓްކުރުމާއި، މެސެޖްކުރުން ފަދަ މުޢާމަލާތްތައް ކުރުން މަނާވާނެއެވެ. ކަމާބެހޭ ފަރާތްތަކުން ހާމަކުރި ގޮތުގައި މި ނިންމުމުގެ ބޭނުމަކީ ކުޑަކުދިންނަށް ނޭދެވޭ ކޮންޓެންޓް ފެނުމާއި، ސައިބަރ ބުލީންގް އަދި އޮންލައިންކޮށް ކުރިމަތިވާ އެކި ބާވަތުގެ ގޯނާތަކުން އެކުދިން ރައްކާތެރިކުރުމެވެ.

މި ޤަވާއިދުގައިވާ ގޮތުން 15 އަހަރާއި 16 އަހަރާ ދެމެދުގެ ކުދިންނަށް ސޯޝަލް މީޑިއާ ބޭނުންކުރެވޭނީ ހަރުކަށި އުސޫލުތަކެއްގެ ދަށުންނެވެ. މީގެ ތެރޭގައި ނޭދެވޭ ކޮންޓެންޓް ފިލްޓަރ ކުރާ ނިޒާމުތައް ބޭނުންކުރުމާއި، ނުދަންނަ މީހުންނާ ވާހަކަދެއްކުން ހަނިކުރުމާއި، ސްކްރީން ޓައިމް ކޮންޓްރޯލްކުރުމުގެ އިތުރުން ބެލެނިވެރިންނަށް އެކުދިންގެ ހަރަކާތްތައް މޮނިޓަރ ކުރެވޭނެ ވަސީލަތްތައް ހިމެނެއެވެ. ސަރުކާރުން ބުނި ގޮތުގައި މިއީ ކުދިންގެ ދުޅަހެޔޮކަމަށް އިސްކަންދީގެން އެޅި ފިޔަވަޅެކެވެ.

ސޯޝަލް މީޑިއާ ކުންފުނިތަކަށް ލާޒިމްކޮށްފައިވަނީ ބަޔޯމެޓްރިކް ޓެކްނޮލޮޖީ އާއި ޑިޖިޓަލް އައިޑެންޓިފިކޭޝަން ބޭނުންކޮށްގެން ބޭނުންކުރާ މީހުންގެ އުމުރު ކަށަވަރުކުރުމަށެވެ. އަދި އުމުރު ހަމަނުވާ ކުދިން އެކައުންޓް ހެދުން ހުއްޓުވުމާއި، އެކުދިންގެ ޒާތީ މައުލޫމާތު އެއްކުރުން ވެސް ވަނީ މަނާކޮށްފައެވެ. މި ގަވާއިދަށް ފުރިހަމައަށް އަމަލުކުރުމަށްޓަކައި ސޯޝަލް މީޑިއާ ކުންފުނިތަކަށް 12 މަސްދުވަހުގެ މުހުލަތެއް ވަނީ ދީފައެވެ. މި މުހުލަތުގެ ތެރޭގައި އިސްލާހު ނުވާ ކުންފުނިތަކާ މެދު ގާނޫނީ ފިޔަވަޅު އަޅާނެ ކަމަށް ސަރުކާރުން ވަނީ އިންޒާރު ދީފައެވެ.

ޔޫއޭއީގެ ތަފާސްހިސާބުތަކުން ދައްކާ ގޮތުގައި އެ ގައުމުގެ ކުޑަކުދިން ދުވާލަކު އެވްރެޖްކޮށް ތިން ގަޑިއިރު ސޯޝަލް މީޑިއާގައި ހޭދަކުރެއެވެ. މިއީ އެކުދިންގެ ނަފްސާނީ ދުޅަހެޔޮކަމަށާއި އަމިއްލަ ތަރައްގީއަށް އޮތް ގޮންޖެހުމެއް ކަމަށް ތަޖުރިބާކާރުން ބުނެއެވެ. މި އާ ޤަވާއިދާއެކު ޔޫއޭއީ ވެގެންދާނީ ސޯޝަލް މީޑިއާ ބޭނުންކުރުމަށް މިފަދަ ފުރިހަމަ އުމުރުގެ އުސޫލެއް ކަނޑައެޅި އަރަބި ދުނިޔޭގެ ފުރަތަމަ ގައުމަށެވެ.