ރައީސް ޑރ. މުޢިއްޒަށް އިންޖިނިއަރިންގ އެވޯޑެއް ދޭ ވާހަކައަކީ ކަނޑައެޅިގެން ދޮގެއް: މިނިސްޓަރު މުއްޠަލިބް

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އިންޖިނިއަރިންގ އެވޯޑެއް ދޭން އުޅޭ ކަމަށް ބުނެ ފަތުރަމުންދަނީ ކަނޑައެޅިގެން ދޮގު ޚަބަރެއް ކަމަށް މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އާބަން ޑިވަލޮޕްމެންޓް، ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

މިނިސްޓަރު މުއްޠަލިބް މިކަން ހާމަކުރެއްވީ މީސްމީޑިއާ މަންސަ "އެކްސް" ގައި ކުރެއްވި ޕޯސްޓެއްގައެވެ.

މިނިސްޓަރު ވިދާޅުވީ، ދިވެހިރާއްޖޭގެ އިންޖިނިއަރިންގ އެވޯޑަކީ ވަކި އުޞޫލެއް އެކުލަވާލައި ސަރުކާރުގެ ގެޒެޓުގައި ޝާއިޢުކުރުމަށްފަހު، އެވޯޑަށް އެދި ހުށަހެޅުމުގެ ފުރުޞަތު ޢާންމުކޮށް ހުޅުވާލައިގެން ކުރިއަށްގެންދިޔަ ކަމެއް ކަމަށެވެ. އަދި މި އެވޯޑަށް ކުރިމަތިލީ ފަރާތްތަކުގެ ތެރެއިން އެވޯޑް ލިބޭ ފަރާތްތައް ކަނޑައަޅާފައިވަނީ ލިބުނު އެޕްލިކޭޝަންތައް މިނިވަން ކޮމިޓީއަކުން ވަރަށް ފުރިހަމައަށް ބަލައި، އިންޓަވިއު ކުރުމަށްފަހު ކަމަށްވެސް މިނިސްޓަރު ފާހަގަކުރެއްވިއެވެ.

އެހެންކަމުން، ރައީސުލްޖުމްހޫރިއްޔާއަށް މިފަދަ އެވޯޑެއް ދޭން އުޅޭ ކަމަށް ދެކެވޭ ވާހަކަތަކުގައި އެއްވެސް ޙަޤީޤަތެއް ނެތް ކަމަށް ވިދާޅުވެ، އެ ވާހަކަތައް މިނިސްޓަރު ވަނީ ދޮގުކުރައްވާފައެވެ.

މީގެއިތުރުން، މި މައްސަލައާ ގުޅުވައިގެން 'އަދަދު' ނޫހުގައި ލިޔެފައިވާ ޚަބަރަށް އިޝާރާތް ކުރައްވަމުން މިނިސްޓަރު މުއްޠަލިބް ވިދާޅުވީ، އެއްވެސް ޙަޤީޤަތެއް ނެތް މިފަދަ ޚަބަރެއް އެ ނޫހުން ލިޔެފައިވަނީ ރައީސް ޑރ. މުޢިއްޒަކީ އިންޖިނިއަރިންގ ދާއިރާއިން މި ޤައުމަށް ނުހަނު އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅަކަށް ވާތީ، އެމަނިކުފާނަށް އެ އެވޯޑް ލިބުން ޙައްޤު ކަމަށް އެ ނޫހަށް ޤަބޫލުކުރެވޭތީ ކަމަށް ދެކެވަޑައިގަންނަވާ ކަމަށެވެ.