ރިޒޯޓުތައް 99 އަހަރަށް ދޭން ފާސްކުރީ ރައީސް ޔާމީންގެ ވެރިކަމުގައި: ބަންޑާރަނައިބު އުޝާމް

ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް ބަދަލުކޮށްފައިވަނީ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ވެރިކަމުގައި ކަމަށް ބަންޑާރަނައިބު އަޙްމަދު އުޝާމް ވިދާޅުވެއްޖެއެވެ. ބަންޑާރަނައިބު މިހެން ވިދާޅުވީ، ރަސްމާލެ މަޝްރޫޢާ ގުޅުވައިގެން ސަރުކާރުން ޤައުމު ވިއްކާލުމުގައި ބައިވެރިވާ ކަމަށާއި ޤާނޫނު އަރާ ހަމަކުރާނެ ކަމަށް ވިދާޅުވެ، މިނިސްޓަރ މުއްޠަލިބާއި ބަންޑާރަނައިބު އުޝާމަށް ރައީސް ޔާމީން ދެއްވި އިންޒާރަށް ރައްދު ދެއްވަމުންނެވެ.

އެކްސްގައި ކުރެއްވި ޕޯސްޓެއްގައި ބަންޑާރަނައިބު އުޝާމް ވިދާޅުވީ، ރައީސް ޔާމީން މިއަދު އެކަން ހަނދުމަފުޅު ނެތީ ކަމަށް ވެދާނެ ކަމަށެވެ. އަދި ރާއްޖޭގައި ބިން ދިގު މުއްދަތަށް ދޫކުރުމުގެ ޤާނޫނީ ތާރީޚަށް އަލިއަޅުއްވާލައްވަމުން އުޝާމް ވިދާޅުވީ، ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނު 1999 ވަނަ އަހަރު ރިޒޯޓުތައް ކުއްޔަށް ދެމުން އައީ ގިނަވެގެން 25 އަހަރު ދުވަހުގެ މުއްދަތަށް ކަމަށެވެ.

އޭގެ ފަހުން 2010 ވަނަ އަހަރު ރައީސް މުޙައްމަދު ނަޝީދުގެ ވެރިކަމުގައި ގެނައި އިސްލާހަކުން އެ މުއްދަތު 50 އަހަރަށް އިތުރުކުރެވުނު ކަމަށާއި، މި މުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައި ކަމަށް ބަންޑާރަނައިބު ފާހަގަކުރެއްވިއެވެ.

މީގެ އިތުރުން ޓޫރިޒަމާބެހޭ ޤާނޫނުގެ 8 ވަނަ މާއްދާއާ ހަވާލާދެއްވައި އުޝާމް ވިދާޅުވީ، ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެ ރަށެއްގައި ކޮށްފައިވާ އިންވެސްޓްމަންޓެއްގެ އަގުން ބަލަށް ކެނޑުމަށްފަހު ޖެހޭ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަންޖެހޭ ގޮތަށް އޮންނަނީވެސް އެ ޤާނޫނުގައި ކަމަށެވެ.

ރަސްމާލެ މަޝްރޫޢުގެ ކަންކަން ހިނގަމުންދާ ގޮތް ސާފުކޮށްދެއްވަމުން ބަންޑާރަނައިބު ވިދާޅުވީ، ރަސްމާލޭގައި ހިންގުމަށް ރާވާފައިވާ މަޝްރޫޢު ކުރިއަށްދާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. އަދި މި މަޝްރޫޢާ ގުޅިގެން މިހާތަނަށް ސޮއިކޮށްފައިވަނީ ހަމައެކަނި ލެޓަރ އޮފް އިންޓެންޓް (ކޮމާޝަލް ޓަރމްސް އެގްރީމެންޓް) އެއްގައި ކަމަށްވެސް އެމަނިކުފާނު ވިދާޅުވިއެވެ.

އުޝާމް އިތުރަށް ވިދާޅުވީ، ޢަމަލީ ގޮތުން މަޝްރޫޢު ފެށުމުގެ ކުރިން މި އެގްރީމެންޓްގައިވާ ޓަރމްސްތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރުމުގެ އިތުރުން، މިކަމާ ގުޅުންހުރި ޤާނޫނުތައް ރައްޔިތުންގެ މަޖިލީހުން ފާސްކުރަންޖެހޭނެ ކަމަށެވެ. އަދި މި މަޝްރޫޢު ކުރިއަށް ގެންދިއުމުގައި ދިވެހިރާއްޖޭގެ ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމުގެ ޔަޤީންކަން ބަންޑާރަނައިބު ވަނީ ދެއްވާފައެވެ.