ކަނޑުގެ ހިމާޔަތްކުރެވިފައިވާ ސަރަހައްދުތައް ބެލެހެއްޓުމަށް ފަޒާގެ ޑޭޓާ ބޭނުންކުރުމާ ގުޅޭގޮތުން މިނިސްޓަރ ޢަލީ ޝަރީފް މަޝްވަރާކުރައްވައިފި

ކަނޑުގެ ހިމާޔަތްކުރެވިފައިވާ ސަރަހައްދުތައް (އެމް.ޕީ.އޭ) ކަނޑައެޅުމާއި، އެ ތަންތަން މޮނިޓަރކޮށް ބެލެހެއްޓުމުގައި ފަޒާގެ ޑޭޓާ ނުވަތަ ޖައްވީ މައުލޫމާތު ބޭނުންކުރެވިދާނެ ގޮތްތަކާ ގުޅޭގޮތުން މިނިސްޓަރ ޢަލީ ޝަރީފް، މޯލްޑިވްސް ސްޕޭސް ރިސާޗް އޯގަނައިޒޭޝަން (އެމް.އެސް.އާރު.އޯ) އާއެކު ތަފްސީލީ މަޝްވަރާތަކެއް ބާއްވަވައިފިއެވެ.

މި ބައްދަލުކުރެއްވުމުގައި މައިގަނޑު ގޮތެއްގައި އަލިއަޅުވާލާފައިވަނީ، ރާއްޖޭގެ ކަނޑުގެ މާހައުލު ހިމާޔަތްކުރުމަށް ކުރެވޭ މަސައްކަތްތަކުގައި ޒަމާނީ ޓެކްނޮލޮޖީ އާއި ސެޓެލައިޓް މައުލޫމާތު ބޭނުންކޮށްގެން ނެރެވިދާނެ ނަތީޖާތަކުގެ މައްޗަށެވެ. ޚާއްޞަކޮށް، ހިމާޔަތްކުރެވިފައިވާ ސަރަހައްދުތަކަށް އަންނަ ބަދަލުތައް ދެނެގަތުމަށާއި، އެ ސަރަހައްދުތަކުގެ ގަވާއިދުތައް ތަންފީޒުކުރުމަށް ފަޒާގެ ޑޭޓާގެ އެހީގައި ކުރެވިދާނެ މަސައްކަތްތަކާ ގުޅޭގޮތުން ދެފަރާތުން ޚިޔާލު ބަދަލުކުރެއްވިއެވެ.

މީގެއިތުރުން، ކަނޑުގެ ދިރުންތައް ހިމާޔަތްކުރުމުގެ މަސައްކަތްތައް އިތުރަށް ހަރުދަނާކޮށް ކުރިއެރުވުމަށްޓަކައި، އެމް.އެސް.އާރު.އޯ އާއި ސަރުކާރާ ގުޅިގެން މަސައްކަތްކުރެވޭނެ އައު ދާއިރާތައް ހޯދުމާ ގުޅޭގޮތުންވެސް މި ބައްދަލުވުމުގައި ވާހަކަދެކެވުނެވެ. މިގޮތުން، މަޢުލޫމާތާއި ތަފާސްހިސާބު ހިއްސާކުރުމުގެ ފުރުސަތުތައް ފަހިކުރުމާއި، މި ދާއިރާއިން ފަންނީ ގާބިލުކަން އިތުރުކުރެވޭނެ ގޮތްތަކާ ގުޅޭގޮތުން ފުޅާދާއިރާއެއްގައި މަޝްވަރާކުރައްވާފައިވެއެވެ.

މި ބައްދަލުވުމަކީ ރާއްޖޭގެ ގުދުރަތީ ވަސީލަތްތައް ހިމާޔަތްކުރުމުގައި ސައިންސާއި ޓެކްނޮލޮޖީގެ ބޭނުން އެންމެ ފުރިހަމަ ގޮތުގައި ހިފުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ބޭއްވުނު މުހިންމު ބައްދަލުވުމެކެވެ. އެމް.އެސް.އާރު.އޯ އަކީ ރާއްޖޭގައި ޖައްވީ ސައިންސާއި ޓެކްނޮލޮޖީ ކުރިއެރުވުމަށް މަސައްކަތްކުރާ އަމިއްލަ ޖަމިއްޔާއެކެވެ.