އިންޑޮނޭޝިއާގެ ނޮން-ރެސިޑެންޓް ސަފީރުކަމަށް ޑރ. ޝަބީނާ އައްޔަނުކުރުމަށް މަޖިލީހުން ރުހުން ދީފި
އިންޑޮނޭޝިއާ އަށް ކަނޑައަޅާ ނޮން-ރެސިޑެންޓް ސަފީރުގެ މަގާމަށް ޑރ. މަރްޔަމް ޝަބީނާ އަޙްމަދު އައްޔަނުކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މި ނިންމުން ފާސްކޮށްފައިވަނީ ވޯޓުގައި ބައިވެރިވެވަޑައިގަތް 49 މެންބަރުންގެ އިއްތިފާގުންނެވެ.
ޑރ. ޝަބީނާ މި މަގާމަށް އައްޔަނުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ހުށަހެޅުއްވީ މި އަހަރުގެ މެއި މަހުގެ 13 ވަނަ ދުވަހުއެވެ. މި ހުށަހެޅުއްވުން ރައީސް ފޮނުއްވާފައިވަނީ ދިވެހިރާއްޖޭގެ ޚާރިޖީ ޚިދުމަތުގެ ގާނޫނުގެ 14 ވަނަ މާއްދާގެ ދަށުންނެވެ.
މި ނޮމިނޭޝަން ދިރާސާކުރުމަށްފަހު، މަޖިލީހުގެ ޚާރިޖީ ގުޅުންތަކުގެ ކޮމިޓީން ޑރ. ޝަބީނާ އައްޔަނުކުރުމަށް ރުހުން ދީފައިވަނީ ޖޫން މަހުގެ 22 ވަނަ ދުވަހުއެވެ.
ޑރ. ޝަބީނާ މިހާރުވެސް ގެންދަވަނީ މުހިންމު ޚާރިޖީ މަގާމުތަކެއް ފުރުއްވަމުންނެވެ. އެގޮތުން އެކަމަނާއަކީ މެލޭޝިއާއަށް ކަނޑައަޅާފައި ހުންނަވާ ހައިކޮމިޝަނަރުގެ އިތުރުން ފިލިޕީންސަށް ކަނޑައަޅާފައި ހުންނަވާ ނޮން-ރެސިޑެންޓް ސަފީރުވެސް މެއެވެ. މިއަދުގެ ނިންމުމާއެކު އިންޑޮނޭޝިއާގެ ނޮން-ރެސިޑެންޓް ސަފީރުކަންވެސް އެކަމަނާ ކުރައްވާނެއެވެ.
ދިވެހިރާއްޖޭގެ ޚާރިޖީ ޚިދުމަތުގެ ގާނޫނު ބުނާގޮތުން، ރާއްޖޭއިން ބޭރަށް ކަނޑައަޅާ ސަފީރުންނާއި ނޮން-ރެސިޑެންޓް ސަފީރުން އައްޔަނުކުރައްވާނީ ރައްޔިތުންގެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
